December 17, 2012

Mun. Health Center ti Sto. Domingo, I.S. nagbalin a 3-kadsaaran


Iti panangpadakkel ken panangkompleto ni Mayor Amado “Lito” Tadena iti Rural Health Center ti ilina a Sto. Domingo, Ilocos Sur, intultuloyna metten ti panangpatibkerna iti kampaniana maipanggep iti nasapa a panangipakita dagiti umili kadagiti nasakitda tapno maliklikan ti idedegdegda.

Kas kunana, “Dakdakkel a gastos ti kayat a sawen ti panangitungtungkua iti marikrikna; ket no nakurang ti gasat, kayatna met a sawen ti nasapa nga ipapatay.”

Saan ketdi a mapabasol ni Mayor Tadena ti kastoy nga ugali ti dadduma ta saan met a kompleto iti ramit ti health center wenno klinika ken gapu ta kasla ad-adda a maik-ikkan iti importansia ti “Saranay” a proyekto dagiti senior citizen wenno panangitedda iti tulongda iti pumusay a padada a senior citizen.

“Ti ngamin abuloy a maawatdanto inton matayda ti ad-adda nga isagsaganaanda iti kontribusion,” impalawag ni Mayor Tadena a dina mailinged ti reggetna nga agbaliw koman ti kastoy a kapanunotan dagiti dadduma a kakailianna.

Gapu met laeng iti daytoy, inaramidna a tallo a kadsaaran ti dati a bassit a municipal health center ti Sto. Domingo, pinaaddana dagiti kangrunaan a diagnostic equipment a para iti blood chemistry, ECG, X-ray, ultrasound, agraman pay ti indonar ti kabsatna a doktor nga electronic defibrillator a mausar para kadagiti pettat ti pannakaatakeda.

Babaen met iti bukod a pundo ti munisipio ken ti P3-milion nga intulong ni Congressman Ryan Singson iti umuna a distrito ti probinsia, nanayonan ti bilang dagiti ward ken katre a para kadagiti pasiente, kuarto para kadagiti dadduma a sakit a masapulna  ti espesialisasion wenno panangipangpangruna, kasapulan nga agas, nayon a dodoktor ken nars, ken dadduma pay a ramit a para iti nasapa a pannakaamiris ken pannakataming dagiti pasiente.

Kas maysa a nabayag a nagpresidente iti Glaxo Smith-Cleine, nalatak nga International Drug Company iti sangalubongan, nauneg dagiti padasna maipanggep iti healthcare.

Maysa ngarud kadagiti ipangpangruna ita ni Mayor Tadena ti dagus a pannakataripato dagiti masakit a kakailianna tapno saan laeng a maliklikan ti dakdakkel a mabusbos no kumaro ti sakitda no di pay ket tapno maliklikan ti kaadda dagiti mabalin a pumusay kadagiti tawen a kaproduktiboda ken dida pay pannakatun-oy kadagiti arapaapda para kadagiti pamiliada ken iti bukodda a biag.

“Ngarud, kayatko a nasalun-at dagiti kakailiak, ta pudno unay ‘tay pagsasao nga awan ngatan ti dakdakkel pay a kinabaknang nga ikut ti tao no di ti nasayaat a salun-atna,” kinuna ti mayor, nga ama mety ti baro programa iti salun-at iti Sto. Domingo. (C.M. Ilustre)


(Naipablaak iti Bannawag, Disiembre 24, 2012 a bilang.)

No comments:

Post a Comment