Libro a para Grado 1, nairuar

Nairuaren iti imprenta ti maysa a libro a para Grado 1 iti pagsasao nga Ilokano.

Napauluan iti “Ti Pamilia ken ti Komunidad,” naisagana daytoy a libro a basaen ken pagsursuruan dagiti ubbing iti umuna a grado iti elementaria a kas sagudayen ti DepEd Order 09-74 a nangituyang ti pannakaaramat ti Mother Tongue-Based Multilingual education (MTB-MLE) iti sibubukel a pagilian.

Sinurat ni Elizabeth Madarang-Raquel, Public Schools District Supervisor, Currimao District, Division of Ilocos Norte, ken nagpaayan a mismo ni Dr. Cecilia Pacis Aribuabo, Superintendent ti Division of Ilocos Norte, manamnama pay a makaparnuay ti panagsursuro dagiti ubbing iti bukodda a pagsasao iti nasingsinged a relasionda kadagiti mangisursuro kadakuada.

Sakbay a naimaldit ti libro, naglasat iti adu a panangamiris ken pannakapasayaatna iti tulong dagiti eksperto iti lengguahe a pakairamanan ni Dr. Jurlita U. Basuel, maysa a linguist a konektado iti Division of Ilocos Norte, ken sumagmamano nga Ilokano a mannurat nga agsursurat a mismo iti Bannawag, ti kangrunaan a magasin dagiti Ilokano.

Naipabasa pay ti maudi a bersion ti libro iti sumagmamano nga  opisial ti Departamento ti Edukasion iti Rehion 1 ken 2 ken dagiti mismo a mangisursuro iti Grado 1 tapno matakuatan dagiti pagkamtudan ti libro ken mapasayaat pay tapno ad-adda nga epektibo  ti pannakaaramatna.

Naaramat iti libro ti napabaro nga Ortograpia Ilokana nga inaprobaran ti Komisyon sa Wikang Filipino. (Rowena T. Nefangui)

(Naipablaak iti Bannawag, Septiembre 17, 2012 a bilang.)