Agsapata dagiti baro nga opisial ti GUMIL Filipinas itoy a Mayo 10

Agsapata dagiti nabotosan nga opisial ti GUMIL Filipinas (GF), nga idauluan ti nailayon a presidente, Arthur P. Urata, Sr., inton Mayo 10, 2015 iti pagtaengan dagiti Cachola iti San Antonio, Narvacan, Ilocos Sur.

Manamnama a ni Administrador Edgardo D. Zaragoza ti National Tobacco Administration (NTA) ti mamagsapata kadagiti opisial.

Idauluan ni Urata nga agsapata para iti baro a dua-a-tawen a termino 2015-2017 da Mario T. Tejada, bise-presidente; Ariel S. Tabag, sekretario-heneral; Eden Cachola-Bulong, tesorera; Estela Bisquera-Guerrero, auditor; Eliseo B. Contillo, manarawidwid; ken Neyo E. Valdez, para irakurak; ken dagiti kameng ti Board of Directors: Freddie Pa. Masuli, Vilmer V. Viloria, Roy V. Aragon, Anna Liza M. Gaspar, Remy N. Albano, Aileen R. Rambaud, Villamor C. Visaya Jr., ken Danilo A. Bautista.

Nabotosan dagiti baro nga opisial iti naangay nga eleksion iti Maika-47 a Nailian a Kombension ti GF iti Balay Expo Centro, Araneta Center, Cubao iti Siudad ti Quezon idi Abril 19. (NME Valdez)

(Naipablaak iti Bannawag, Mayo 4, 2015 a bilang.)

47th National Convention ti GF, mapagsasaritaan

Kangrunaan a mapagsasaritaan iti maika-8 a regular board meeting ti GUMIL Filipinas inton Pebrero 1, 2015 ti pannakaangay ti 47th National Covention ‘toy gunglo dagiti mannurat nga Ilokano iti Filipinas ken iti ballasiw-taaw.

Maangay ti board meeting iti Provincial Capitol ti Cagayan iti Tuguegarao City, babaen ti panangsangaili ni  GF Director Vilmer V. Viloria, agpapaay pay a kameng ti Sangguniang Panlalawigan ti Cagayan a mangibagi iti maikadua a distrito ti probinsia.

Nayiskediul a maangay ti kombension ti GF inton Abril 17-19, 2015 iti Quezon City iti panangsangaili ti GUMIL Metro Manila.

Idauluan ni GF President Arthur P. Urata, Sr. dagiti agatendar nga opisial ti gunglo, a da Mario Tejada, bise-presidente; Roy V. Aragon, sekretario-heneral;  Eden C. Bulong, tesorera; Estela Bisquera-Guerrero, auditor; Benjamin P. Pacris, business manager; Reynaldo E. Andres, press relations officer; ken dagiti direktor: Sherma E. Benosa, Emy Amad Z. Bucaneg, Eliseo B. Contillo Sr., Freddie P. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Manamnama pay ti kaaddanto dagiti mamagbaga ti gunglo, da Juan S.P. Hidalgo Jr., Jose A. Bragado, Manuel S. Diaz, Baldovino A. Valdez, ken Cles B. Rambaud.

Manamnama met ti itatabuno dagiti presidente dagiti aktibo a sanga ti gunglo.

Para iti dadduma pay nga impormasion, kontaken dagitoy a numero ti selpon: 0927-792-7913 (APU), 0915-984-2149 (VVV), wenno ag-email iti rvaragon@gmail.com, wenno ag-message iti fb.com/rvaragon.

(Naipablaak iti Bannawag, Pebrero 2, 2015 a bilang.)

KWF TARABAY ITI ORTOGRAPIA TI PAGSASAO NGA ILOKANO 2012 KAS AR-ARAMATEN TI BANNAWAG

Mabalin nga i-download babaen ti panangklik iti daytoy : KWF TARABAY ITI ORTOGRAPIA TI PAGSASAO NGA ILOKANO 2012 KAS AR-ARAMATEN TI BANNAWAG

10 nga agdadamo a mannurat nga Ilokano, fellow iti Pasnaan 5

Sangapulo nga agdadamo a mannurat nga Ilokano ti napili nga agbalin a Fellow iti Maika-5 a Pasnaan, ti workshop dagiti mannurat nga Ilokano nga imatonan ti GUMIL Filipinas, iti pannakitinnulong ti National Commission for Culture and the Arts, Bannawag, GUMIL Cagayan ken ti chapter daytoy a GUMIL Gonzaga, ken ti LGU Gonzaga (Cagayan) nga idauluan ni Mayor Carlitos F. Pentecostes, Jr.

Napili a fellow para iti Sarita da Marie Rita M. Brillantes ti San Antonio, Candon City; Ronnie E. Aguinaldo ti Minabel, Puro Camiguin, Calayan, Cagayan ken Ridel T. Cabulisan ti Masisit, Sanchez Mira, Cagayan.

Napili met fellow para iti Daniw a Para Ubbing ni Marlyn del Rosario ti San Nicolas, Villasis, Pangasinan.

Napili met a fellow para iti Daniw da Rex T. Aquino ti Maddalero, Buguey, Cagayan; Mario S. Ascueta ti Progressive, Gonzaga, Cagayan; Michael S. Naidas ti Santa Maria, Gonzaga, Cagayan; ken Vicente R. Raras ti Minanga, Camalaniugan, Cagayan.

Napili met a fellow para iti Sarita a Para Ubbing da Anna Liza Gaspar ti Tangaoan, Piddig, Ilocos Norte ken Leah D. Manzano ti Bagani Campo, Candon City.

Babaen ti pannarabay dagiti mabigbig a mannurat, editor ken kritiko a kas kada Juan S.P Hidalgo, Jr. ken Bannawag Editor Cles B. Rambaud, ma-workshop dagiti sinurat dagiti nasao a fellow iti daytoy Pebrero 7-9, 2014 iti Riverview Resort iti Gonzaga, Cagayan.

Dagiti kameng ti Seminar-Worshop Committee ti GUMIL Filipinas ti nagpaay a secretariat ken mangimaton iti pannakaiwayat ti Pasnaan 5. (Pasnaan Secretariat)


(Naipablaak iti Bannawag, Enero 20, 2014 a bilang.)

OKTUBRE 21, 2013

SARITA
 6 Ti Palimed ti Katugangak
     Aileen D. Serrano

NOBELA
24 Kasera 101 (13)
    N.M.E. Valdez
30 Galiera Queen (33)
   Dionisio S. Bulong

DANIW
4 Panagdaliasat
   Giovanni Palomares
8 Agdan
   Elizabeth M. Raquel
48 Dandaniw a Para Ubbing
     Edelaine U. Duyor/ Jobert M. Pacnis

SALAYSAY
10 Agtalinaedto iti Lagip…
     Belinda A. Aquino
12 Shutdown, Mapasamak Kadi Met iti Filipinas?
     Neyo Mario E. Valdez
38 Taliawentayo da Kababoyan ken Kamanokan
     Virginia A. Duldulao, Ph.D.
40 Kasano a Paksiaten Dagiti Peste ken Sakit ti Mula a Sandia?
     Reynaldo E. Andres

KOMIKS
17 Gayang ni Lam-ang (3)
20 Aritosan (49)
22 Miks & Tiks

KOLUM
14 Okeyka, Apong!
16 Dear Doc
32 TIPS
35 Kastoy, Kapid, Ditoy Hawaii
36 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Front Sets, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
26 Siled ti Kararag
27 No Saan, Saan!
29 Kasano, Aya, a Tenglek Dagiti Ubbingko, Kunam?
33 Ti Gasatmo Ita a Lawas
34 Ammuem Pay Dagitoy
37 Iliklik Dagiti Ubbing iti Stress

Special meeting ti GF: Hunio 23

Angayen ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, ti maysa nga special meeting inton Hunio 23, 2013 iti San Antonio, Narvacan, I.S., iti panangsangaili da Eden Cachola Bulong, tesorera ti gunglo, ken Dionisio S. Bulong, maysa kadagiti mamagbaga ti gunglo.

Kangrunaan a mataming iti miting ti maipapan iti Balay ti GUMIL a proyekto ti gunglo, malaksid iti dadduma pay a pakaseknan ti gunglo.

Kidkiddawen ni Arthur P. Urata Sr., presidente ti gunglo, ti idadar-ay amin nga opisial, da Mario Tejada (bise-presidente), Roy V. Aragon (sekretario-heneral), Estela Bisquera-Guerrero (auditor), Benjamin P. Pacris (business manager), Reynaldo E. Andres (PRO); board of directors: Sherma E. Benosa, Emy Amad Z. Bucaneg, Eliseo B. Contillo, Freddie P. Masuli, Aileen R. Rambaud, Martin T. Rochina, Ariel S. Tabag ken Vilmer V. Viloria.

Manamnama met ti kaaddanto dagiti dadduma pay a mamagbaga ti gunglo a da Juan S.P. Hidalgo Jr., Jose A. Bragado, Manuel S. Diaz, Baldovino A. Valdez, ken Cles B. Rambaud.

Maigunamgunam pay ti itatabuno dagiti presidente dagiti aktibo a Chapter ti GF, da Villamor Visaya (Isabela), Elizabeth M. Raquel (Ilocos Norte), Edilberto H. Angco (Ilocos Sur), Djuna R. Alcantara (La Union), Marianito Machacon (Pangasinan), Ret. RTC Judge Vivencio S. Baclig (Metro Manila), Joey Guzman (Abra), Rizal Fernandez (GUMIL Oahu), Arnold C. Baxa (GUMIL Maui) ken Nexon Agcaoili (GUMIL Hong Kong). (REA)


(Naipablaak iti Bannawag, Hunio 17, 2013 a bilang.)

4th Pasnaan: Mayo 29-31

Maangay ti 4th Pasnaan itoy a Mayo 29-31-26, 2013 (saan a Mayo 24-26 kas immunan a naipakaammo) iti Doña Josefa Edralin Marcos Elementary School, Currimao, Ilocos Norte. Pagtitinnulongan daytoy nga iwayat ti GUMIL Filipinas, NCCA, Bannawag, GUMIL Ilocos Norte ken DepEd Ilocos Norte-Currimao District, ken dadduma pay a mannurat nga Ilokano.

Sangapulo nga agdadamo a mannurat nga Ilokano ti napili a Fellow iti Maikapat a Pasnaan, ti workshop a para kadagiti mannurat nga Ilokano.

Dagiti Fellow: Alain Fontanilla Razalan (para iti Sarita a Para Ubbing), Io M. Jularbal (iti Sarita), Sheila Mae Ricarze (Sarita), Gorgonia B. Serrano (Sarita), Rosario A. Bingayen (Daniw a Para Ubbing), Mercy Vergara Yabes (Daniw), Rhea Rose D. Berroy (Daniw), Florenda Limog Pedro (Daniw), Roselyn Carillo Campano (Daniw), ken Romnick Mahor Asuncion (Daniw)

Addan iti maikapat a tawenna, ti Pasnaan ti agserbi a “pangmulian” iti pluma dagiti agdadamo a mannurat nga Ilokano tapno agballigi dagitoy a sumarsaruno a mangtagiben ken mangitandudo iti Literatura ken Lengguahe ni Ilokano. Agpaay met a panelist dagiti mabigbigbig a mannurat nga Ilokano a pakairamanan dagiti editor ti Bannawag.

Urata, baro a presidente ti GUMIL Filipinas

Nabotosan a baro a presidente ti GUMIL Filipinas (Gunglo Dagiti Mannurat nga Ilokano iti Filipinas ken iti ballasiw-taaw) ni Arthur P. Urata, Sr. iti eleksion ti baro a grupo dagiti opisial ti gunglo bayat ti Maika-45 a Kombension Nasional ken Literary Seminar ti GF a naangay iti Gonzaga, Cagayan idi Abril 19-21, 2013.

Kadua ni A.P. Urata, Sr. a napili da Mario Tejada, bise-presidente; Roy V. Aragon, sekretario-heneral; Eden Cachola-Bulong, treasurer; Estela Bisquera-Guerrero, auditor; Benjamin P. Pacris, business manager; Reynaldo E. Andres, public relations officer; ken dagiti kameng ti hunta direktiba: Sherma E. Benosa, Emy Amadz Bucaneg, Eliseo B. Contillo, Freddie Pa. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Agpaay met nga ex-officio director ni Judge Vivencio S. Baclig (Ret.), pasado a presidente ti gunglo.

Nagpaay a kameng ti Comelec da Honor Blanco Cabie, chairman; kameng da Dionisio S. Bulong ken Jose A. Bragado.

Iti panagsaritana kalpasan ti pannakaiproklamana, agraman dagiti kakaduana a nangabak, impanamnama ni A.P. Urata ti ad-adda pay a pannakapabileg ti GF, kas mayataday iti tema ti kombension nga “Agkaykaysa, Pumigpigsa.”

Naipasngay ni A.P. Urata, Sr. iti Ballesteros, Cagayan idi Hulio 26, 1953 kada Silvestre Urata ken Felicidad dela Peña (agpada a pimmusayen). Agadi iti buridek iti sangapulo nga agkakabsat a pakairamanan da Antonio, Jose ken Roland (pimmusayen), agpapada a mannurat iti Bannawag. Nagturpos iti Bachelor of Arts in English, Master in Business Administration ken Master in Public Administration. Ti laeng dissertation-na ti kurang ti kinadoktorna iti Public Administration. Inrugina ngem dina naileppas ti kursona nga abogasia. Nagpaay iti nadumaduma nga ahensia ti gobierno. Agdama a hepe ti Department of Agrarian Reform iti probinsia ti Cagayan. Agserserbi pay a Part-time Professor iti Graduate Program iti University of Cagayan Valley (UCV) a pangisusuruanna iti Public Administration, Management, Economics, Cooperative, Public Fiscal Management ken dadduma pay nga asignatura.

Innem ti bungada ken ni sigud nga Elgie Tejada (uppat a babbai ken dua a lallaki) nga agpapadan a nagturpos ken addaan iti trabaho malaksid iti buridekda a mangal-ala ita iti Hospitality and Tourism Management iti University of St. Louis. Adda metten uppat a appokona. Nag-Board of Director iti namitlo a daras ken nag-Bise-Presidente ti GUMIL Filipinas. Agdama pay a Presidente ti GUMIL Cagayan manipud pay idi 2002.


(Naipablaak iti Bannawag, Mayo 6, 2013 a bilang.)

Nangabak iti 11th RFAAFIL ken 15th AMMAFLA, naammuan

Adtoy dagiti nangabak iti 11th Reynald F. Antonio Awards for Iluko Literature ken iti 11th AMMA Foundation Literary Awards, kas panagsaganadda, ken kas impadamag ti Secretariat ti RFAAFIL ken AMMAFLA.

Iti 11th RFAAFIL, benneg ti Sarita a Para Ubbing:

Umuna a Gunggona, Leah D. Manzano ti Siudad ti Candon City babaen ti saritana a "Ti Sagutko ken ni Tatang." Mangisursuro iti English ken Filipino iti Nagtablaan National High School, Sta. Lucia, Ilocos Sur.

Maika-2, Noli S. Dumlao ti Paoay, Ilocos Norte babaen ti saritana a "Da Meow ken Grr." Scriptwriter iti drama iti MBC-Radio DZRH ken nagpaay iti babaen ni dati nga Executive Director Cecile Guidote Alvarez ti National Commission for Culture and the Arts (NCCA) a kas media coordinator para iti radio.

Maika-3, Cles B. Rambaud ti Pinili, Ilocos Norte babaen ti saritana a "Ni Bi-o-bi-o, ni Cory, ni Erap, ken ni Marcos." Nagun-odna ti 2009 Writer’s Prize iti Ilokano poetry manipud iti NCCA ken agdama a Managing Editor ti Bannawag.

Maika-4, Crisostomo M. Ilustre ti Bauang, La Union babaen ti saritana nga "Once a Funny Time." Agdama nga Operations Consultant ti Century Broadcasting Network ken adda dua nga imatmatonanna nga FM station.

Maika-5, Ronelyn B. Ramones ti Bacarra, Ilocos Norte babaen ti saritana nga "Amy." Nagadal iti Midwifery iti Northwestern University, Laoag City, ken addan maysa a sarita ken sumagmamano a daniwna a naipablaak iti Bannawag.

Iti 11th RFAAFIL, benneg ti Daniw a Para Ubbing:

Umuna a Gunggona, Agustin DC. Rubin ti San Ildefonso, Ilocos Sur ngem agnaeden iti Zambales, babaen ti daniwna nga “A Ba Ka Da.” Retirado a mannursuro, napadayawan nga RFAAFIL Writer of the Decade iti selebrasion ti Maika-10 a tawen ti RFAAFIL.

Maika-2, Johmar R. Alvarez ti Ballesteros, Cagayan babaen ti daniwna a "Pidut." Mangisursuro iti Aparri West National High School-Aparri, Cagayan ken adviser ti The Beachcomber, ti opisial a pagiwarnak ti nasao a pagadalan.

Maika-3, Ronnie Es. Aguinaldo ti Calayan, Cagayan babaen ti daniwna a “Bullalayaw." Addan sumagmamano a pammadayaw a naawatna kadagiti salip iti panagsuratan.

Maika-4, Jobert M. Pacnis ti Ballesteros, Cagayan babaen ti daniwna a "Ti Perperroka." Nalpasna ti BSECE iti Cagayan State University-Tuguegarao. Maysa a mannursuro. Sumagmamanon dagiti pammadayaw a nagun-odna iti panagsuratan a pakairamanan ti RFAAFIL.

Maika-5, Benjamin P. Pacris ti Laoag City babaen ti daniwna a "Burburtia Dagiti Animal." Agdama a Chief Information Officer ti Philippine Information Agency (PIA) iti Ilocos Sur a kas moderator ti “Kapihan iti Amianan” Media Forum iti Iluko Heritage Channel (IHC) ken TV host ti “Issue ken Komentaryo” (Impormasyon Publiko) iti IHC ken anchor iti “’Niat’ Makunam, Kailian?” program iti DWRS Commando Radio.

Dagiti naghurado: Lorenzo G. Tabin, Sr., pangulo; kameng da Heman G. Tabin ken Sinamar R. Tabin.

Maidasar dagiti nangabak a sarita ken daniw kadagiti agbasbasa nga ubbing tapno pilienda ti mapadayawan iti 11th  RFAAFIL Reader’s Choice Award.

* * *

Iti 15th AMMAFLA, Salip iti Sarita Para Kadagiti Agdadamo a Mannurat:

Umuna a Gunggona, Marichel E. Suguitan ti Aggub, Solano, Nueva Vizcaya babaen ti saritana a “Kulibangbang.” Inaunaan iti lima nga agkakabsat nga annak da Domingo ken Sionita Suguitan, maysa nga OFW iti Hong Kong ni Marichel. Nakaipablaaken iti sumagmamano a daniw iti Bannawag ken maysa kadagiti mannaniw a nairaman iti Alimpatok, antolohia ti erotiko a dandaniw nga Ilokano. Aktibo met kadagiti gunglo dagiti OFW, maysa kadagiti opisial ti Taga-Nueva Vizcaya Ako (TNVA), organisasion dagiti taga-Nueva Vizcaya iti Hong Kong.

Maika-2, Ronelyn B. Ramones ti Brgy. Buyon, Bacarra, Ilocos Norte babaen ti saritana nga “Ina.” Fellow iti 3rd Pasnaan, ti literary workshop nga iwaywayat ti GUMIL Filipinas para kadagiti napili nga agdadamo a mannurat, nakaipablaaken ni Ronelyn iti sarita iti Bannawag (“Sabali ni Benson, Sabali ni Miguel”) ken sumagmamano a daniw a pakaibilangan ti “Uliek ti Kampanario ti Bacarra” a nangyalat iti Umuna a Gunggona iti On-the-Spot Poetry Writing Contest iti Pasnaan 2012.

Maika-3, Avelino B. Felicitas, Jr. ti San Juan, Abra ngem agindegen iti Waipahu, Hawaii babaen ti saritana nga “Ti Para Isuno.” Nangisuro iti 16 a tawen iti ISPSC, Santa Maria, Ilocos Sur sa immakar iti UNP Vigan a nagturposanna iti Doctor of Education ken nagretiruanna idi 2007. Ni dati a Teresita A. Imperial ti Santa Maria, I.S. ti asawana. Addaanda iti uppat nga annak. Agdama a Substitute Teacher-3 iti Leeward School District, Oahu,Hawaii ken Security Officer iti UPS Facility, Honolulu, International Airport, iti babaen ti Ali’I Security System.

Dagiti naghurado: Aida S. Tiama ti Unibersidad ti Filipinas-Diliman, chair; kameng da Ariel S. Tabag ti Bannawag ken Linda T. Lingbaoan ti University of the Philippines Press.

Dagiti isponsor ti salip: Amado & Gloria Yoro, Francis ken Aurora Ponce, ken Fred ken Cherry Quibol, agpapada nga agindegen iti Hawaii.

Mapadayawan dagiti nangabak iti RFAAFIL ken AMMAFLA bayat ti Maika-45 a Kombension Nasional kenLiterary Seminar ti GUMIL Filipinas inton Abril 19-21, 2013 iti Gonzaga, Cagayan.


(Naipablaak iti Bannawag, Abril 15, 2013 a bilang.)

3 ti Nangabak iti 2013 Cabie PINILI; Special Prize, ipaay ti 2013 Alviya

Awan ti nangabak iti Umuna ken Maikadua a Gunggona iti Salip iti Daniw a Para Ubbing ti 2013 Prof. Honor Blanco Cabie Premio Iti Naisurat Iti Literatura Ilokana:

Adtoy dagiti nangabak: Maikatlo a Gunggona, Herman S. Cardenas, empleado iti munisipio ti Gonzaga, Cagayan; Honorable Mention da Jesusa Leticia  Lagda, retirado a maestra a taga-Suba, Paoay, Ilocos Norte, ken Efren Inocencio, mangisursuro iti Quiling, Siudad ti Batac.

Dagiti naghurado: Hues Vivencio S. Baclig (chairman); Martin T. Rochina ti Magsingal, Ilocos Sur; ken Ariel S. Tabag ti Sta. Teresita, Cagayan (agpada a kameng).

Nairusat ti Cabie PINILI idi Oktubre 2008 tapno maikkan dagiti Ilokano nga agsursurat iti pagsasaoda iti gundaway, iti pannakitinnulong ti GUMIL Metro Manila, a tumulong a mangpasantak iti Literatura Ilokana ken kultura dagiti taga-Amianan.

Naipanagan ti pasalip ken ni Cabie, premiado a mannurat, ken dati a Presidente ti GUMIL Filipinas (1995-1999) ken agdama a Chairman ti GUMIL Filipinas Election Committee. (Cabie Pinili Secretariat)

*     *     *

Awan met ti nangyalat kadagiti kangrunaan a gunggona iti 2013 Pasalip Alviya iti Sarita ket inkeddeng laengen dagiti hurado nga ipaayan iti Special Prize ti maysa kadagiti naisalip a sarita, kas impakaammo ni Dr. Freddie Pa. Masuli, mangimatmaton iti pasalip.

Ti maipaayan iti Special Prize: ti “Ti Bituen nga Arapaap ni Lilang Utiang” a sarita ni Jobert M. Pacnis, maysa nga Electronics Communications Engineer ken propesional a mangisursuro a tubo iti Ballesteros, Cagayan.
Dagiti naghurado: Bannawag Editor Cles B. Rambaud, Dionisio S. Bulong, ken Joel B. Manuel.

Tinawen a proyekto nga is-isponsoran ni Alex V. Yadao ti New York, U.S.A. ti Pasalip Alviya iti Sarita iti panggep a mangparegta kadagiti mannurat iti Ilokano tapno tumulongda a mangitag-ay iti kalidad ti sarita iti Ilokano.

Mayawat ti premio dagiti nangabak iti 2013 Cabie PINILI ken iti 2013 Alviya Salip iti Sarita iti umuna a rabii ti 45th GUMIL Filipinas Convention & Literary Seminar a maangay inton Abril 19-21 iti Gonzaga, Cagayan.


(Naipablaak iti Bannawag, Abril 1, 2013 a bilang.) 

Miting ti GF: Hulio 24

Maipakaammo kadagiti amin nga opisial ti GUMIL Filipinas a maangay ti umuna a regular a board meeting ti gunglo iti babaen ti liderato ni kolumnista iti Bannawag Vivencio S. Baclig, retirado a hues iti Regional Trial Court, itoy a Hulio 24 iti U.P. Cooperative Restaurant, U.P. Diliman, Q.C. (12 iti tengnga ti aldaw-5 iti malem) iti panangsangaili ni dati a Managing Editor ti Bannawag Juan S.P. Hidalgo, Jr.

Mapagsasaritaan iti miting dagiti programa ken proyekto nga ipatungpal ti GF iti uneg ti dua a tawen a panagtakem dagiti baro nga opisial ti gunglo a nabutosan bayat ti Dap-ayan 2011 wenno ti Maika-43 a Nailian a Kombension ti GUMIL Filipinas a naangay iti Ponce del Mar Beach Resort, Cabugao, I.S. idi Abril 15-17, 2011.

Para iti dadduma nga impormasion, sarungkaran ti Facebook account ti Bannawag Magazine.

(Naipablaak iti Bannawag, Hulio 25, 2011.)

Salip iti Sarita iti Iluko ti 4th TESDA Region I Writing Contest

Ipakaammo ni Regional Director Washington M. Agustin ti Technical Education and Skills Development Authority (TESDA) ti Rehion I a naluktanen ti Salip iti Sarita ti 4th TESDA Writing Contest babaen met laeng ti itutulong ti GUMIL La Union, ti Gunglo Dagiti Mannurat nga Ilokano iti probinsia ti La Union.

Kinuna ni Direktor Agustin a mabalin a makisalip dagiti amin a mannurat iti Iluko (Iloko) ditoy Filipinas ken iti ballasiw-taaw, malaksid kadagiti nangabaken iti umuna, maikadua ken maikatlo a gunggona kadagiti tallo a napalabas a pasalip iti panagsurat ti TESDA Region I.

Innayonna a dagiti mangabak a sinurat itoy nga edision ti pasalip, mairamanto iti antolohia dagiti premiado a sarita maipapan iti TESDA a mabalin a maipablaakto iti 2012.

Dagiti pagannurotan:

1. Nasken a maisentro ti pakisalip iti tema a “REAL DEAL” a baro a plataporma ti TESDA-- ti panangpabileg daytoy nga ahensia kadagiti makunkuna a “grassroots” wenno gagangay nga umili babaen ti itdenna kadakuada a dekalidad a panagsanay ken edukasion teknikal a pagrangtayanda nga agbirokto iti natalged a panggedan.

2. Agatiddog ti sarita iti 12-20 a panid. Maikompiuter daytoy iti 8 x 11 a bond paper. Agusar iti 12 points Times New Roman wenno Arial. Ikkan iti maysa a pulgada (1 inch) nga espasio (margin) iti amin nga igid ti manuskrito.

3. Maysa laeng ti pakisalip ket nasken nga orihinal. Parbo a nagan laeng ti ilanad iti entry.

4. Uppat a kopia (hard copy) ken maysa a soft copy (CD) ti pakisalip ti kasapulan.

5. Iragpin ditoy ti sobre seliado a naglaon iti pudno a nagan ti autor, ababa a kabibiagna, retrato, adres ken contact nos. (CP number ken e-mail). Ipatulod dagitoy iti: The Iloko Literary Competition Secretariat, Office of the Regional Director, TESDA Region I, Quezon Ave., San Fernando City, iti di naladladaw ngem Agosto 6, 2011, alas 5:00 iti malem.

6. Madiskualipika ti asino man a matakuatan nga aglabsing iti ania man kadagitoy a pagannurotan.

7. Dagiti premio: Umuna: P12,500; Maikadua, P8,750; Maikatlo, P6,250; ken Tallo a Pangliwliwa a Gunggona a sag-P1,250. (Maikkatanto dagiti premio iti 20% a VAT, kas sagudayen ti pagalagadan ti gobierno.) Maipaayanto pay dagiti mangabak iti sertipiko ti pammadayaw.

8. Saan a mabalusingsing ti pangngeddeng dagiti hurado.

9. Mapakaammuanto dagiti mangabak apaman nga addan resulta ti salip ken mapadayawandanto inton Agosto 27, 2011 iti Conference Room ti TESDA Rehion I iti Siudad ti San Fernando, La Union.

10. Para iti dadduma pay nga impormasion, kontaken ti opisina ti TESDA Region I iti telepono (072) 242-7584 ken 888-3966.Wenno ag-e-mail iti tesda1_ro@yahoo.com. Nasaysayaat pay no bisitaen ti website daytoy iti www.tesda1.net. (Djuna R. Alcantara)

Bannawag, Hunio 27, 2011, panid 18.