Urata, baro a presidente ti GUMIL Filipinas

Nabotosan a baro a presidente ti GUMIL Filipinas (Gunglo Dagiti Mannurat nga Ilokano iti Filipinas ken iti ballasiw-taaw) ni Arthur P. Urata, Sr. iti eleksion ti baro a grupo dagiti opisial ti gunglo bayat ti Maika-45 a Kombension Nasional ken Literary Seminar ti GF a naangay iti Gonzaga, Cagayan idi Abril 19-21, 2013.

Kadua ni A.P. Urata, Sr. a napili da Mario Tejada, bise-presidente; Roy V. Aragon, sekretario-heneral; Eden Cachola-Bulong, treasurer; Estela Bisquera-Guerrero, auditor; Benjamin P. Pacris, business manager; Reynaldo E. Andres, public relations officer; ken dagiti kameng ti hunta direktiba: Sherma E. Benosa, Emy Amadz Bucaneg, Eliseo B. Contillo, Freddie Pa. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Agpaay met nga ex-officio director ni Judge Vivencio S. Baclig (Ret.), pasado a presidente ti gunglo.

Nagpaay a kameng ti Comelec da Honor Blanco Cabie, chairman; kameng da Dionisio S. Bulong ken Jose A. Bragado.

Iti panagsaritana kalpasan ti pannakaiproklamana, agraman dagiti kakaduana a nangabak, impanamnama ni A.P. Urata ti ad-adda pay a pannakapabileg ti GF, kas mayataday iti tema ti kombension nga “Agkaykaysa, Pumigpigsa.”

Naipasngay ni A.P. Urata, Sr. iti Ballesteros, Cagayan idi Hulio 26, 1953 kada Silvestre Urata ken Felicidad dela Peña (agpada a pimmusayen). Agadi iti buridek iti sangapulo nga agkakabsat a pakairamanan da Antonio, Jose ken Roland (pimmusayen), agpapada a mannurat iti Bannawag. Nagturpos iti Bachelor of Arts in English, Master in Business Administration ken Master in Public Administration. Ti laeng dissertation-na ti kurang ti kinadoktorna iti Public Administration. Inrugina ngem dina naileppas ti kursona nga abogasia. Nagpaay iti nadumaduma nga ahensia ti gobierno. Agdama a hepe ti Department of Agrarian Reform iti probinsia ti Cagayan. Agserserbi pay a Part-time Professor iti Graduate Program iti University of Cagayan Valley (UCV) a pangisusuruanna iti Public Administration, Management, Economics, Cooperative, Public Fiscal Management ken dadduma pay nga asignatura.

Innem ti bungada ken ni sigud nga Elgie Tejada (uppat a babbai ken dua a lallaki) nga agpapadan a nagturpos ken addaan iti trabaho malaksid iti buridekda a mangal-ala ita iti Hospitality and Tourism Management iti University of St. Louis. Adda metten uppat a appokona. Nag-Board of Director iti namitlo a daras ken nag-Bise-Presidente ti GUMIL Filipinas. Agdama pay a Presidente ti GUMIL Cagayan manipud pay idi 2002.


(Naipablaak iti Bannawag, Mayo 6, 2013 a bilang.)