Tech-voc unit ti DepEd

Tapno mabantayan ti pannakaiwayat ti K-to-12 Basic Education Reform Program, binukel ti Department of Education ti Technical Vocation Unit iti Bureau of Secondary Education.

Kuna ni Education Secretary Luistro nga akem ti Tech-Voc Unit a papigsaen dagiti Tech-Voc High Schools iti aspeto ti kurikulum, pannakasanay dagiti mangisursuro ken mangimaton, ken dagiti impraestruktura ken pasilidad.

Kinuna pay ni Luistro a kas mayannurot iti programa ti K to 12, maasa a nalaing ti kinasirib ken talento iti akademia, tech-voc, isport, ken musika ti tunggal estudiante tapno mapanday ti laingda kas maibatay iti international standard.

(Naipablaak iti Bannawag, Hulio 23, 2012 a bilang.)

Artificial insemination kadagiti dingo, maisursuro

Addan kurso maipanggep iti panangtulong kadagiti baboy, baka ken nuang tapno agsikogda.

Daytoy ti kuna ni Technical Education and Skills Development Authority (TESDA) Director General Joel Villanueva.

Segun ken ni Villanueva, inaramiddan a kurso ti artificial insemination kadagiti taraken a dingo a kas iti baka, baboy, ken nuang.

Kuna ti sekretario a panggepda ti makapataud kadagiti eksperto iti panagpaadu kadagiti taraken nga animal iti babaen ti tulong ti artificial insemination tapno mapadakkel ti produksion iti karne.

Segun pay ken ni Villanueva, nanglukaten ti TESDA kadagiti kurso iti rubber production ken processing, system formworks installation, construction lift passenger/material elevator operation, medical coding ken billing, ken 2D art development.

Innayon ti sekretario nga agtultuloy ti pannakiuman ti ahensia kadagiti masekna a sektor no ania dagiti kasapulanda nga “skills.” Daytoy met ti usarenda iti panangbukelda kadagiti pagannurotan iti panag-training nga iwayatda.

Kuna pay ni Villanueva a kas kadagiti dadduma pay a kurso, agdalan iti assessment ken sertipikasion dagiti agturpos kadagiti nadakamat a kurso.

(Naipablaak iti Bannawag, Hulio 9, 2012 a bilang.)

Photo credit: http://article.wn.com

5.3-milion a Pinoy, maaddaan iti trabaho, kuna ti TESDA

Umabot iti 5.3-milion a Filipino ti manamnama a maaddaan iti trabaho kalpasan ti administrasion ni Aquino inton 2016, segun iti Technical Education and Skills Development Authority (TESDA).

Kuna ni TESDA Director General Joel Villanueva nga iti panaggibus ti termino ni Presidente Aquino iti 2016, kayatda a malaglagipto dagiti tao ti TESDA iti pannakapataud ti 5.3-milion a TESDA-certified workers wenno TESDA specialists nga addaan iti trabaho ken gumangganar iti adda met kawadwadanna nga isublida met iti gobierno babaen ti pananggastosda itoy ken iti panangurnongda.

Inako ni Villanueva a narigat ngem ikagumaananda a maabot ti kasta a bilang ti mangmangged ken mapapigsa ti kabaelanda babaen ti tulong iti dekalidad nga edukasion teknikal ken panangpadur-as iti kabaelanda tapno makabirok iti trabaho dagiti benepisiario iti panagsanay, panangipaay kadakuada iti dekalidad a biag ken kasasaad iti panagbiag kadagiti komunidad.

Tapno magun-od daytoy, binilin ni Villanueva ti amin nga opisina ti TESDA tapno mangiwayat kadagiti addang, kas iti panangpaadu iti enrolment, napasnek a panagsanay ken panangited iti sertipikasion iti kinaespesialista.

(Naipablaak iti Bannawag, Marso 19, 2012 a bilang.)

Bumasbassit ti bilang dagiti ti mannalon, kuna ti TESDA

Impalgak ti Technical Education and Skills Development Authority (TESDA) a madanagan gapu iti panagbaba ti bilang dagiti mannalon iti pagilian.

Segun iti TESDA, saan nga adayo a maibus dagiti mannalon iti pagilian, ta kaaduanna nga agedad iti nasurok a limapulo dagiti agtrabtrabaho ita kadagiti talon.

Kuna ni TESDA Director General Joel Villanueva a gagangay a 50 anios agpangato ti edad dagiti mannalon. Kayatna a sawen, dandanin agsalog ti pigsada.

Kaaduanna kadagiti mannalon ti nangipagel kadagiti annakda nga agbalin a mannalon, iti ayatda nga agbalin a propesional dagitoy, isu a posible a bassitton ti mannalon iti masakbayan.

No mapasamak daytoy, agpeggad ti produksion ti taraon iti pagilian.
Kuna ni Villanueva a daytoy ti maysa a rason no apay a kalikagumanna a lumawa koma ti panagkita ti publiko iti organic farming.

Kunana nga adu a kurso nga ididiaya ti TESDA ti mangmuli iti kabaelan dagiti Filipino a mannalon ken dadduma pay nga aramid iti agrikultura, nangruna ket maipangpangruna ita ti “food culture” iti agrikultura.

Ginutigot ni Villanueva dagiti Filipino nga agsursuro ken mangiwayat ti organic farming, a malaksid a natalged ken makatulong iti salun-at ken saan a makadadael iti Nakaparsuaan, nangato pay ti panagkasapulan iti “green-collar job” iti sangalubongan a merkado isu a masiguradoda iti napintas a trabaho.

(Naipablaak iti Bannawag, Nobiembre 14, 2011 a bilang.)

Lugan a patarayen ti koriente, nayalnag

Impakaaammo ni Technical Education and Skills Development Authority (TESDA) Director-General Joel Villanueva nga ikalikagumda ti pannakaaramid ti lugan a patarayen ti koriente wenno e-vehicle gapu iti naimbag nga ibungana kadagiti umili, iti aglawlaw ken ekonomia.

Inyalnag ti TESDA itay nabiit, kagiddan ti pannakarambak ti maika-17 nga anibersario ti ahensia, ti umuna nga e-van a P30 laeng ti magastos iti 30 kilometro a tarayenna.

Naipablaak iti Bannawag, Setiembre 12, 2011 a bilang

TESDA Salip iti Sarita, napawaywayan

Impakaammo ni Washington M. Agustin, regional director ti Technical Education and Skills Development Authority (TESDA) Region I, a napawaywayan ti inwayatna a salip iti sarita 2011 kas kiniddaw dagiti mayat met a makisalip ngem nagpangngaduada gapu iti ababa unay a panawen ti pasalip (Hulio agingga iti Agosto). Katinnulong ti TESDA ti GUMIL La Union iti pannakaiwayat daytoy maika-4 a pakontesna.

Kas immuna a nairakurak, itay Agosto 5 ti naituding a deadline ti panagipatulod kadagiti entries. Ngem nayalud-od daytoy iti Oktubre 28, 2011.

Kinuna pay ni Direktor Agustin nga agtalinaed ketdi ti tema ti salip a REAL DEAL, a ti kayatna a sawen ket silulukat ti TESDA agingga kadagiti makunkuna a grassroots nga adda essem ken pingetda a mangpadas a mangbangon iti masakbayanda babaen ti tulong ti TESDA.

Agatiddog ti pakisalip a sarita iti di nakurkurang ngem sangapulo a panid ngem di nasursurok ngem a panid. Nasken a naikompiuter.

Tallo a kopia ti ipaulod nga entry ket iturong daytoy iti Iloko Short Story Writing Contest Secretariat, Office of the Regional Director, TESDA Region I iti di naladladaw ngem Oktubre 28, 2011.

Dagiti premio: Umuna - P12,500 ken sertipiko; Maikadua - P8,750 ken sertipiko; Maikatlo - P6,250 ken sertipiko; ken tallo a Pangliwliwa a Gunggona a sag-P1,250 ken sertipiko. (Addaan iti 20% a VAT dagiti premio.)

Mapadayawanto dagiti mangabak inton Disiembre iti TESDA ROI iti San Fernando City, La Union.

Kontaken ti TESDA ROI iti telepono bilang (072) 242-7584 ken (072)888-3966; iti email tesda1_ro@yahoo.com. Wenno kontaken ti GUMIL La Union babaen ti e-mail-na, gumilaunion@yahoo.com.

(Naipablaak iti Bannawag, Agosto 22, 2011 a bilang.)

Water lily, adda usarna-- TESDA

Imbes nga ibilang a pakaisagmakan gapu iti masansan a panangbangenna kadagiti pagayusan ti danum, adu ti pakaaramaatan dagiti water lily.

Segun ken ni Technical Education and Skills Development Authority Director General Joel Villanueva, mangiwayatda kadagiti panagsanay tapno maaramid a pakairanudan a produkto ti water lily, a mabalin a maaramid a bag, sinelas, sapatos wenno placemat.

Bannawag, Hulio 11, 2011

Salip iti Sarita iti Iluko ti 4th TESDA Region I Writing Contest

Ipakaammo ni Regional Director Washington M. Agustin ti Technical Education and Skills Development Authority (TESDA) ti Rehion I a naluktanen ti Salip iti Sarita ti 4th TESDA Writing Contest babaen met laeng ti itutulong ti GUMIL La Union, ti Gunglo Dagiti Mannurat nga Ilokano iti probinsia ti La Union.

Kinuna ni Direktor Agustin a mabalin a makisalip dagiti amin a mannurat iti Iluko (Iloko) ditoy Filipinas ken iti ballasiw-taaw, malaksid kadagiti nangabaken iti umuna, maikadua ken maikatlo a gunggona kadagiti tallo a napalabas a pasalip iti panagsurat ti TESDA Region I.

Innayonna a dagiti mangabak a sinurat itoy nga edision ti pasalip, mairamanto iti antolohia dagiti premiado a sarita maipapan iti TESDA a mabalin a maipablaakto iti 2012.

Dagiti pagannurotan:

1. Nasken a maisentro ti pakisalip iti tema a “REAL DEAL” a baro a plataporma ti TESDA-- ti panangpabileg daytoy nga ahensia kadagiti makunkuna a “grassroots” wenno gagangay nga umili babaen ti itdenna kadakuada a dekalidad a panagsanay ken edukasion teknikal a pagrangtayanda nga agbirokto iti natalged a panggedan.

2. Agatiddog ti sarita iti 12-20 a panid. Maikompiuter daytoy iti 8 x 11 a bond paper. Agusar iti 12 points Times New Roman wenno Arial. Ikkan iti maysa a pulgada (1 inch) nga espasio (margin) iti amin nga igid ti manuskrito.

3. Maysa laeng ti pakisalip ket nasken nga orihinal. Parbo a nagan laeng ti ilanad iti entry.

4. Uppat a kopia (hard copy) ken maysa a soft copy (CD) ti pakisalip ti kasapulan.

5. Iragpin ditoy ti sobre seliado a naglaon iti pudno a nagan ti autor, ababa a kabibiagna, retrato, adres ken contact nos. (CP number ken e-mail). Ipatulod dagitoy iti: The Iloko Literary Competition Secretariat, Office of the Regional Director, TESDA Region I, Quezon Ave., San Fernando City, iti di naladladaw ngem Agosto 6, 2011, alas 5:00 iti malem.

6. Madiskualipika ti asino man a matakuatan nga aglabsing iti ania man kadagitoy a pagannurotan.

7. Dagiti premio: Umuna: P12,500; Maikadua, P8,750; Maikatlo, P6,250; ken Tallo a Pangliwliwa a Gunggona a sag-P1,250. (Maikkatanto dagiti premio iti 20% a VAT, kas sagudayen ti pagalagadan ti gobierno.) Maipaayanto pay dagiti mangabak iti sertipiko ti pammadayaw.

8. Saan a mabalusingsing ti pangngeddeng dagiti hurado.

9. Mapakaammuanto dagiti mangabak apaman nga addan resulta ti salip ken mapadayawandanto inton Agosto 27, 2011 iti Conference Room ti TESDA Rehion I iti Siudad ti San Fernando, La Union.

10. Para iti dadduma pay nga impormasion, kontaken ti opisina ti TESDA Region I iti telepono (072) 242-7584 ken 888-3966.Wenno ag-e-mail iti tesda1_ro@yahoo.com. Nasaysayaat pay no bisitaen ti website daytoy iti www.tesda1.net. (Djuna R. Alcantara)

Bannawag, Hunio 27, 2011, panid 18.