Dap-ayan 2015 ti GF, sagsaganaan ti GMM

Agsagsaganan ti GUMIL Metro Manila (Gunglo Dagiti Mannurat nga Ilokano iti Kamanilaan) iti panangsangaili ti gunglo iti Dap-ayan 2015, ti Maika-47 a Nailian a Kombension ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw).

Mainaig itoy, maangay ti miting ti GUMIL Metro Manila, inton Pebrero 22, 2015, 9 A.M. ti panangsangaili ni mannurat ti Bannawag Rhea D. Berroy iti pagtaengan daytoy iti Maceda St. corner Loyola, Sampaloc, Manila para iti nasao a panggep.

Mainaig itoy, makiddaw kadagiti interesado a dumar-ay iti nasao a kombension a makiuman dagiti kameng ti GUMIL Filipinas wenno GUMIL chapters iti presidente ti pagkamenganda a chapter idinto a dagiti saan a kameng, makiumanda met ken ni Ariel S. Tabag, presidente ti GMM, iti asseng.tabag@gmail.com wenno 0921 602 1938.

Mainaig pay iti daytoy, ipakaammo ti GUMIL Filipinas Awards Committee nga agingga laeng iti Marso 15, 2015 ti panagawatda iti nominasion para iti Pedro Bucaneg Award, Leona Florentino Award, ken Don Cornelio Valdez Award. Ipaw-it ti nominasion iti rvaragon@gmail.com.


(Naipablaak iti Bannawag, Pebrero 23, 2015 a bilang.)

47th National Convention ti GF, mapagsasaritaan

Kangrunaan a mapagsasaritaan iti maika-8 a regular board meeting ti GUMIL Filipinas inton Pebrero 1, 2015 ti pannakaangay ti 47th National Covention ‘toy gunglo dagiti mannurat nga Ilokano iti Filipinas ken iti ballasiw-taaw.

Maangay ti board meeting iti Provincial Capitol ti Cagayan iti Tuguegarao City, babaen ti panangsangaili ni  GF Director Vilmer V. Viloria, agpapaay pay a kameng ti Sangguniang Panlalawigan ti Cagayan a mangibagi iti maikadua a distrito ti probinsia.

Nayiskediul a maangay ti kombension ti GF inton Abril 17-19, 2015 iti Quezon City iti panangsangaili ti GUMIL Metro Manila.

Idauluan ni GF President Arthur P. Urata, Sr. dagiti agatendar nga opisial ti gunglo, a da Mario Tejada, bise-presidente; Roy V. Aragon, sekretario-heneral;  Eden C. Bulong, tesorera; Estela Bisquera-Guerrero, auditor; Benjamin P. Pacris, business manager; Reynaldo E. Andres, press relations officer; ken dagiti direktor: Sherma E. Benosa, Emy Amad Z. Bucaneg, Eliseo B. Contillo Sr., Freddie P. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Manamnama pay ti kaaddanto dagiti mamagbaga ti gunglo, da Juan S.P. Hidalgo Jr., Jose A. Bragado, Manuel S. Diaz, Baldovino A. Valdez, ken Cles B. Rambaud.

Manamnama met ti itatabuno dagiti presidente dagiti aktibo a sanga ti gunglo.

Para iti dadduma pay nga impormasion, kontaken dagitoy a numero ti selpon: 0927-792-7913 (APU), 0915-984-2149 (VVV), wenno ag-email iti rvaragon@gmail.com, wenno ag-message iti fb.com/rvaragon.

(Naipablaak iti Bannawag, Pebrero 2, 2015 a bilang.)

Miting ti GF: Nob. 23

Maangay ti maika-7 a regular board meeting ti GUMIL Filipinas inton Nobiembre 23, 2014, Domingo, iti San Nicolas, Pangasinan iti pagtaengan da GUMIL Pangasinan President Fernando B. Sanchez iti Burgos St., babaen ti panangsangaili da Apo Sanchez ken ni kaingungotna a Benny Sanchez.

Maysa kadagiti kangrunaan a mataming iti miting ti pannakapili ti GUMIL chapter a mangsangaili iti sumaruno a kombension nasional ti GF inton Abril 2015. Mapagsasaritaan pay ti maipapan iti proposal a pannakabuangay ti maysa a baro a provincial chapter ti GUMIL.Maiganetget ti yaatendar amin nga opisial, mamagbaga, ken dagiti presidente dagiti aktibo a chapter.

Para iti dadduma pay nga impormasion, kontaken dagitoy a numero ti selpon: 0927-792-7913 (APU), 0908-383-3482 (FBS), wenno ag-email iti rvaragon@gmail.com, wenno ag-message iti fb.com/rvaragon.

(Naipablaak iti Nobiembre 17, 2014 a bilang.)

Asino ti mangsangaili iti GF Convention 2015?

Silulukaten ti panag-bid dagiti probinsial a sanga ti GUMIL Filipinas nga interesado a mangsangaili iti sumaruno a kombension nasional ti GF a maangay inton Kalgaw 2015.

Daytoy ti napagnunumuan iti kaudian a regular board meeting ti gunglo a naangay iti Siudad ti Laoag. Maipalagip a nagsaruno a sinangaili ti GUMIL Cagayan ti kombension, idi 2013 (Gonzaga) ken 2014 (Claveria).

Iti sabali a bangir, maangay ti maika-6 a regular board meeting ti GF inton Agosto 31, 2014 iti Tuding, Itogon, Benguet iti panangsangaili da GF Auditor Estela Bisquera-Guerrero ken kaingungotna a Rey Guerrero.

Kangrunaan a mataming iti miting ti bidding nga idatag/indatag dagiti interesado a provincial chapters a mang-host iti sumaruno a kombension nasional. Mainaig itoy, maibalakad kadagiti presidente (wenno pannakabagida) ti chapter a nag-bid ti nasken nga idadar-ayda tapno mapagsasaritaaan a nalaing dagiti proposalda a mangsangaili iti kombension.

Ipaganetget ni Presidente Arthur P. Urata Sr., ti idadar-ay amin nga opisial: Mario Tejada (bise-presidente), Eden C. Bulong (treasurer), Benjamin P. Pacris (business manager), Reynaldo E. Andres (PRO); ken dagiti direktor: Sherma E. Benosa, Emy Amad Z. Bucaneg, Eliseo B. Contillo, Freddie P. Masuli, Aileen R. Rambaud, Martin T. Rochina, Ariel S. Tabag ken Vilmer V. Viloria.

Manamnama pay ti kaaddanto dagiti mamagbaga ti gunglo: Juan S.P. Hidalgo Jr., Jose A. Bragado, Manuel S. Diaz, Baldovino A. Valdez, ken Cles B. Rambaud.

Maigunamgunam met ti itatabuno dagiti chapter president: Villamor Visaya (Isabela), Elizabeth M. Raquel (Ilocos Norte), Edilberto H. Angco (Ilocos Sur), Djuna R. Alcantara (La Union), Fernando B. Sanchez (Pangasinan), ken Joey Guzman (Abra).

Indawat met ni GF Auditor Estela B. Guerrero ti idadar-ay koma dagiti amin a mannurat nga interesado nga agkameng iti mabuagay a GUMIL Benguet a kas kada Prof. Junley L. Lazaga ti UP Baguio, Dumay Solinggay, Io Jularbal, Perlas A. Dacuag, Rosalie V. Calpito, ken dadduma pay.

Para iti dadduma pay nga impormasion, kontaken dagitoy a numero ti selpon: 0927-7927913 (APU), 0918-9632254 (EBG), wenno ag-e-mail iti rvaragon@gmail.com, wenno ag-send iti message iti Facebook iti rvaragon@facebook.com.


(Naipablaak iti Bannawag, Agosto 25, 2014 a bilang.)

F.B. Sanchez, baro a presidente GUMIL Pangasinan

Napili a baro a presidente ti GUMIL Pangasinan, ti gunglo dagiti mannurat nga Ilokano iti Pangasinan, ni Dr. Fernando B. Sanchez iti eleksion ti gunglo a naangay idi Hunio 28 iti Sto. Nino Parish, K of C Chamber, Binalonan, Pangasinan.

Kadua ni Dr. Sanchez, retirado a DepEd District Supervisor, a napili nga agtakem nga opisial ti gunglo agingga iti 2016 da Virgilio S. Domaloy, Vice-President; Eunice B. Madriaga, Secretary; Eufemia R. Diaz, Treasurer; Aureliano Dela Cruz, Business Manager ken Manuel S. Diaz, PRO.

Napili met a kameng ti Hunta Direktiba da Marlyn G. Del Rosario, Prescillano N. Bermudez, Ernesto L. Bisquera, Sr., Benedicta T. Sanchez, ken Simpliciano U. Sansano.

Mammagbaga da Juan S.P. Hidalgo, Jr. ken Mariano T. Machacon a pasado a presidente.
Legal Adviser: Atty. Plotinus B. Sanchez. (EM)


(Naipablaak iti Bannawag, Hulio 21, 2014 a bilang.)

Eleksion ti GUMIL Pangasinan: Hunio 28

Maangay ti miting ken eleksion ti GUMIL Pangasinan, ti gunglo dagiti mannurat nga Ilokano iti Pangasinan, itoy a Hunio 28, Sabado, 9 A.M. iti Knights of Columbus Chamber, Sto. Nino Parish Compound, Poblacion, Binalonan, Pangasina, kas impakaammo ni Mar Machacon, president.

Maawis pay iti nasao nga aktibidad dagiti amin nga agngayangay nga agkameng iti gunglo. (PNB)


(Naipablaak iti Bannawag, Hunio 30, 2014 a bilang.)

Maika-46 a Nailian a Kombension ti GF: Abril 18-20

Angayen ti GUMIL Filipinas (GF), ti kadakkelan a gunglo dagiti mannurat nga Ilokano iti sangalubongan, ti Maika-46 a Nailian a Kombension ti GF iti daytoy Abril 18-20, 2-14 iti Cabicungan Inn, Centro 05, Claveria, Cagayan (nayakar manipud iti Sanchez Mira, kas immunan a naipakaammo).

Maaw-awagan pay iti Dap-ayan daytoy a panagtataripnong dagiti mannurat, panangrambak metten iti Abril a kas “Bulan ti Literatura Dagiti Ilokano,” kas sagudayen ti Presidential Proclamation No. 26 idi 2001.

Sangailien daytoy ti GUMIL Cagayan (GC) nga idauluan ni GC Pres. Freddie Pa. Masuli, kinuna ni Arthur P. Urata, Sr., presidente ti GF, a manamnama a dumar-ay saan laeng a dagiti delegado manipud kadagiti sanga ti GF iti Filipinas no di pay ket iti ballasiw-taaw, nangruna ti GUMIL Oahu ken GUMIL Maui.

Agpaay a keynote speaker ni Dr. Jim P. Domingo, mabigbigbig a mannurat ken iskolar iti kultura iti Cagayan, a mangwarwar iti tema ti kombension a “Ni Mannurat nga Ilokano ken ti Kultural a Panagdur-as.”

Kas kadagiti kallabes a nailian a kombension, aglektiur dagiti kangrunaan a mannurat nga Ilokano maipanggep iti panagsurat iti sarita, daniw, nobela, salaysay, ken panagipatarus para kadagiti beterano a mannurat. Para kadagiti mangisursuro ken agdadamo a mannurat, maipangruna met a matratar ti literatura para kadagiti ubbing, ken ti ortograpia ti lengguahe nga Ilokano.

Iti pay nasao a kombension a mapadayawan dagiti mannurat a nangabak kadagiti nadumaduma a salip iti panagsuratan a kas iti 1st Mayor Carlito F. Pentecostes, Jr. Literary Awards (CFPJ Awards), salip iti sarita a para iti agdadamo ken beterano; 1st Premio Diretso Manipud iti Puso (Premio Diretso), salip iti daniw ni ayat; 16th AMMA Foundation Literary Awards (AMMAFLA), salip iti sarita a para kadagiti agdadamo; 12th Reynald F. Antonio Awards for Iloko Literature (RFAAFIL), salip iti daniw ken sarita a para ubbing; ken 3rd Alex Vicente Yadao Foundation Literary Awards (ALVIYA), salip iti sarita.

Mayalnag met ti libro nga Operation: Medalla Cartel ni nobelista iti Bannawag Norberto D. Bumanglag, Jr.

Adda met maangay a “Subasta ti RFAAFIL Para iti GUMIL” a pakaisubastaan ti 46 nga agdudumat a ramit a kas wagas iti panagur-or iti pondo a para kadagiti proyekto ti GF.

Mapadayawan pay a kas 2014 Pedro Bucaneg awardee ni Crisostomo M. Ilustre. Ti Pedro Bucaneg award ti kangatuan a pammadayaw a yaw-awat ti GUMIL Filipinas kadagiti mannurat nga Ilokano nga agsursurat iti Ilokano a nakaipaay iti naisangsangayan a gapuanan iti pannakaidur-as ti literatura dagiti Ilokano.

Mabalangatan met ti 2014 Mrs. GUMIL Filipinas a manamnama a pakipartisiparan dagiti amin a sanga ti GUMIL Filipinas.

Malaksid kadagitoy, maipabuya ken maipangngeg dagiti oral a kannawidan ken sala ken samiweng dagiti Ilokano.

Para iti rehistrasion, P600 ti bayadan dagiti regular a delegado, P500 kadagiti adda ID-na a senior citizen, ken P400 kadagiti adda ID-na nga estudiante (malaksid iti eskuela graduado). Maaramat ti registration fee iti kanen ken pagturogan, sertipiko, kdp. a kasapulan iti 3 nga aldaw ken dua a rabii a kombension.

Para kadagiti saludsod mainaig iti taripnong, ag-text iti 0948-986-4481 (FPM), 0927-792-7913 (APU), ken 0915-984-2149 (VVV). (Dap-ayan 2014 Secretariat)

(Naipablaak iti Bannawag, Abril 14, 2014 a bilang.)

Bulan ti Literatura Dagiti Ilokano, rambakan ti GF

Rambakan ti GUMIL Filipinas (GF), ti kadakkelan a gunglo dagiti mannurat nga Ilokano iti sangalubongan, ti Abril a kas “Bulan ti Literatura Dagiti Ilokano,” kas sagudayen ti Presidential Proclamation No. 26 idi 2001, babaen ti panangiwayatna iti “Dap-ayan 2014,” ti Maika-46 a Nailian a Kombension ti GF iti daytoy Abril 18-20, 2-14 iti Cabicungan Inn, Centro 05, Claveria, Cagayan (nayakar manipud iti Sanchez Mira, kas immunan a naipakaammo).

Sangailien daytoy ti GUMIL Cagayan (GC) nga idauluan ni GC Pres. Freddie Pa. Masuli, kinuna ni Arthur P. Urata, Sr., presidente ti GF, a manamnama a dumar-ay saan laeng a dagiti delegado manipud kadagiti sanga ti GF iti Filipinas no di pay ket iti ballasiw-taaw, nangruna ti GUMIL Oahu ken GUMIL Maui.

Kas kadagiti kallabes a nailian a kombension, aglektiur dagiti kangrunaan a mannurat nga Ilokano maipanggep iti panagsurat iti sarita, daniw, nobela, salaysay, literatura para kadagiti ubbing, ken maipanggep iti Ortograpia Dagiti Ilokano ken iti panagipatarus.

Iti pay nasao a kombension a mapadayawan dagiti mannurat a nangabak kadagiti nadumaduma a salip iti panagsuratan ken dagiti mannurat a nakaipaay iti naisangsangayan a kontribusion iti panagdur-as ti Literatura dagiti Ilokano, mayalnag dagiti libro, mabalangatan ti 2014 Mrs. GUMIL Filipinas, ken maipabuya/maipangngeg dagiti oral a kannawidan ken sala ken samiweng dagiti Ilokano.

Para iti rehistrasion, P600 ti bayadan dagiti regular a delegado, P500 kadagiti adda ID-na a senior citizen, ken P400 kadagiti adda ID-na nga estudiante (malaksid iti eskuela graduado). Maaramat ti registration fee iti kanen ken pagturogan, sertipiko, kdp. a kasapulan iti 3 nga aldaw ken dua a rabii a kombension.

Para kadagiti saludsod mainaig iti taripnong, ag-text iti 09489864481 (FPM) ken 09277927913 (APU).
Mainaig itoy, maipakaammo kadagiti amin nga opisial ti GF a maangay ti special meeting itoy Marso 30, 2014 iti Narvacan, Ilocos Sur babaen ti panagsangaili da agkaingungot a Dionisio ken Eden Bulong. (RVA)


(Naipablaak iti Bannawag, Marso 24, 2014 a bilang.)

46th GF Convention inton Abril 18-20, mapagpapatangan iti GF Board Meeting

Maysa kadagiti kangrunaan a mataming iti maikapat a GUMIL Filipinas board meeting inton Marso 1 ti pannakaangay ti 46th GF National Convention inton Abril 18-20 iti MASCOOP Resort and Training Center, Masisi, Sanchez Mira, Cagayan, kas impakaammo ni GF President Arthur P. Urata, Sr.

Sangailien ti Pamilia Masuli (Dr. ken Mrs. Freddie P. Masuli) ti board meeting iti pagtaenganda iti Centro 2, Sanchez Mira, Cagayan.

Malaksid kadagiti opisial ti GUMIL Filipinas, maipaganetget pay ti itatabuno dagiti presidente/pannakabagi dagiti GUMIL Provicial Chapters. (RVA)


(Naipablaak iti Bannawag, Marso 3, 2014 a bilang.)

Pasnaan 5, maangay iti Peb. 7-9; espesial a miting ti GF, Peb. 9

Maangay ti Pasnaan 5, ti maikalima nga edision ti workshop nga imatonan ti GUMIL Filipinas, ti gunglo dagiti mannurat nga Ilokano, itoy a Pebrero 7-9, 2014 iti Conference Hall ti Cagayan State University, Gonzaga, Cagayan (saan nga iti Riverview Resort, kas immuna a naipakaammo).

Panggepna a patademen ti pluma dagiti agdadamo a mannurat nga Ilokano, maiwayat ti Pasnaan babaen ti panagtitinnulong ti GF ken dagiti nadumaduma nga ahensia kas iti National Commission for Culture and the Arts, Bannawag, GUMIL Cagayan ken ti chapter daytoy a GUMIL Gonzaga, ken ti LGU Gonzaga (Cagayan) nga idauluan ni Mayor Carlito F. Pentecostes, Jr.

Iti tallo nga aldaw, ma-workshop ti gapuanan dagiti sangapulo nga agdadamo a mannurat babaen ti panangiwanwan dagiti mabigbigbig a mannurat, editor, ken kritiko nga Ilokano.

Iti sabali a bangir, maangay ti espesial a miting ti board of directors ti GUMIL Filipinas iti Pebrero 9 iti met laeng CSU, Gonzaga, Cagayan, kas impakaammo ni GF Pres. Arthur P. Urata, Sr. mainaig iti maangay a maika-46 a Nailian a Kombension ti GUMIL Filipinas inton Abril 18-20, 2014 iti Masisit Beach Resort, Sanchez Mira, Cagayan, ken mainaig iti pagtaktakderan ti gunglo iti kontrobersia iti ortograpia ti lengguahe nga Ilokano, ken dadduma pay a pakaseknan ti gunglo.

Maigunamgunam ti yaatendar dagiti amin nga opisial ti GF ken dagiti presidente dagiti GUMIL chapter iti Filipinas idinto ta maidawat ti yaawag dagiti presidente ti GUMIL chapter iti ballasiw-taaw. (Pasnaan/GF Secretariat)


(Naipablaak iti Bannawag, Pebrero 10, 2014 a bilang.)

10 nga agdadamo a mannurat nga Ilokano, fellow iti Pasnaan 5

Sangapulo nga agdadamo a mannurat nga Ilokano ti napili nga agbalin a Fellow iti Maika-5 a Pasnaan, ti workshop dagiti mannurat nga Ilokano nga imatonan ti GUMIL Filipinas, iti pannakitinnulong ti National Commission for Culture and the Arts, Bannawag, GUMIL Cagayan ken ti chapter daytoy a GUMIL Gonzaga, ken ti LGU Gonzaga (Cagayan) nga idauluan ni Mayor Carlitos F. Pentecostes, Jr.

Napili a fellow para iti Sarita da Marie Rita M. Brillantes ti San Antonio, Candon City; Ronnie E. Aguinaldo ti Minabel, Puro Camiguin, Calayan, Cagayan ken Ridel T. Cabulisan ti Masisit, Sanchez Mira, Cagayan.

Napili met fellow para iti Daniw a Para Ubbing ni Marlyn del Rosario ti San Nicolas, Villasis, Pangasinan.

Napili met a fellow para iti Daniw da Rex T. Aquino ti Maddalero, Buguey, Cagayan; Mario S. Ascueta ti Progressive, Gonzaga, Cagayan; Michael S. Naidas ti Santa Maria, Gonzaga, Cagayan; ken Vicente R. Raras ti Minanga, Camalaniugan, Cagayan.

Napili met a fellow para iti Sarita a Para Ubbing da Anna Liza Gaspar ti Tangaoan, Piddig, Ilocos Norte ken Leah D. Manzano ti Bagani Campo, Candon City.

Babaen ti pannarabay dagiti mabigbig a mannurat, editor ken kritiko a kas kada Juan S.P Hidalgo, Jr. ken Bannawag Editor Cles B. Rambaud, ma-workshop dagiti sinurat dagiti nasao a fellow iti daytoy Pebrero 7-9, 2014 iti Riverview Resort iti Gonzaga, Cagayan.

Dagiti kameng ti Seminar-Worshop Committee ti GUMIL Filipinas ti nagpaay a secretariat ken mangimaton iti pannakaiwayat ti Pasnaan 5. (Pasnaan Secretariat)


(Naipablaak iti Bannawag, Enero 20, 2014 a bilang.)

GF Board Meeting: Dis. 7

Maangay ti maikatlo a board meeting ti GUMIL Filipinas, ti gunglo dagiti mannurat iti Filipinas ken ballasiw-taaw, itoy Disiembre 7, 2013 (nayalud-od manipud iti Nobiembre 8), 10 A.M. babaen ti panangsangaili da GF Board Director Martin T. Rochina ken ti kaingungotna a ni Teresita Rochina iti pagtaenganda iti Brgy. Rizal, Makati City, kas kuna ni GF President Arthur P. Urata, Sr.

Mapagsasaritaan iti nasao a miting dagiti proyekto ti GF a kas iti Pasnaan 5 a maangay inton Pebrero 7-9, 2014 idiay Gonzaga, Cagayan; ti Balikas a publikasion ti gunglo; ti Tagnawa 2014 a proyekto iti panagilibro ken ti pannakaangay ti 46th GF Convention inton Abril 2014 iti Sanchez Mira, Cagayan.

Maigunamgunam ti idadar-ay dagiti amin nga opisial ken dagiti presidente dagiti GUMIL chapter.

Iti sabali a bangir, marambakan ti maika-47 nga anibersario ti GUMIL Metro Manila iti pagtaengan da GMM President Vivencio S. Baclig iti Novaliches, Quezon City itoy a Disiembre 8, 2013. Simple laeng ti selebrasion ta inkeddeng dagiti kameng ti agdonar kadagiti biktima ti bagyo a Yolanda babaen ti Philippine National Red Cross.


(Naipablaak iti Bannawag, Disiembre 9, 2013 a bilang.)

Miting ti GF ken GMM, Nob. 9

Sangailien ni GUMIL Filipinas Director Martin Rochina ken kaingungotna a Teresita ti maikatlo a board meeting ti GUMIL Filipinas, ti gunglo dagiti mannurat nga Ilokano iti Filipinas ken ballasiw-taaw, ken ti general membership meeting ti GUMIL Metro Manila, ti gunglo dagiti mannurat nga Ilokano iti Metro Manila ken kabangibangna a probinsia, inton Nob. 9, 2013 iti pagtaenganda iti Makati City.

Mapagsasaritaan iti miting ti GF dagiti proyekto ti gunglo a kas iti Pasnaan 5 a maangay inton Pebrero 2014, ti Tagnawa 2014 a proyekto iti panagipablaak, ken ti Maika-46 a Nailian a Kombension inton Abril 2014 a maangay iti Sanchez Mira, Cagayan, segun ken ni GF President Arthur P. Urata, Sr.

Mapagsasaritaan met iti miting ti GMM ti pannakaangay ti Maika-47 nga Anibersario ken Christmas Program ti gunglo inton Dis. 8, 2013 iti Bloomfields Subdivision, Novaliches, Quezon City, kas impakaammo ni GMM President Ret. Judge Vivencio S. Baclig. (GF Secretariat)


(Naipablaak iti Bannawag, Nobiembre 4, 2013 a bilang.)

Urata, baro a presidente ti GUMIL Filipinas

Nabotosan a baro a presidente ti GUMIL Filipinas (Gunglo Dagiti Mannurat nga Ilokano iti Filipinas ken iti ballasiw-taaw) ni Arthur P. Urata, Sr. iti eleksion ti baro a grupo dagiti opisial ti gunglo bayat ti Maika-45 a Kombension Nasional ken Literary Seminar ti GF a naangay iti Gonzaga, Cagayan idi Abril 19-21, 2013.

Kadua ni A.P. Urata, Sr. a napili da Mario Tejada, bise-presidente; Roy V. Aragon, sekretario-heneral; Eden Cachola-Bulong, treasurer; Estela Bisquera-Guerrero, auditor; Benjamin P. Pacris, business manager; Reynaldo E. Andres, public relations officer; ken dagiti kameng ti hunta direktiba: Sherma E. Benosa, Emy Amadz Bucaneg, Eliseo B. Contillo, Freddie Pa. Masuli, Aileen R. Rambaud, Martin T. Rochina, Ariel S. Tabag, ken Vilmer V. Viloria.

Agpaay met nga ex-officio director ni Judge Vivencio S. Baclig (Ret.), pasado a presidente ti gunglo.

Nagpaay a kameng ti Comelec da Honor Blanco Cabie, chairman; kameng da Dionisio S. Bulong ken Jose A. Bragado.

Iti panagsaritana kalpasan ti pannakaiproklamana, agraman dagiti kakaduana a nangabak, impanamnama ni A.P. Urata ti ad-adda pay a pannakapabileg ti GF, kas mayataday iti tema ti kombension nga “Agkaykaysa, Pumigpigsa.”

Naipasngay ni A.P. Urata, Sr. iti Ballesteros, Cagayan idi Hulio 26, 1953 kada Silvestre Urata ken Felicidad dela Peña (agpada a pimmusayen). Agadi iti buridek iti sangapulo nga agkakabsat a pakairamanan da Antonio, Jose ken Roland (pimmusayen), agpapada a mannurat iti Bannawag. Nagturpos iti Bachelor of Arts in English, Master in Business Administration ken Master in Public Administration. Ti laeng dissertation-na ti kurang ti kinadoktorna iti Public Administration. Inrugina ngem dina naileppas ti kursona nga abogasia. Nagpaay iti nadumaduma nga ahensia ti gobierno. Agdama a hepe ti Department of Agrarian Reform iti probinsia ti Cagayan. Agserserbi pay a Part-time Professor iti Graduate Program iti University of Cagayan Valley (UCV) a pangisusuruanna iti Public Administration, Management, Economics, Cooperative, Public Fiscal Management ken dadduma pay nga asignatura.

Innem ti bungada ken ni sigud nga Elgie Tejada (uppat a babbai ken dua a lallaki) nga agpapadan a nagturpos ken addaan iti trabaho malaksid iti buridekda a mangal-ala ita iti Hospitality and Tourism Management iti University of St. Louis. Adda metten uppat a appokona. Nag-Board of Director iti namitlo a daras ken nag-Bise-Presidente ti GUMIL Filipinas. Agdama pay a Presidente ti GUMIL Cagayan manipud pay idi 2002.


(Naipablaak iti Bannawag, Mayo 6, 2013 a bilang.)

GUMIL Filipinas Convention iti Abril 19-21, agenda iti miting ti GF Board iti Marso 17

Kangrunaan a mapagsasaritaan iti maudi a regular board meeting ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw nga idauluan ni Judge Vivencio S. Baclig (Ret.), ti pannakaangay ti GF convention ken literary-seminar workshop.

Maangay ti board meeting itoy a Marso 17 iti Gonzaga, Cagayan iti panangsangaili ni Mayor Carlito Pentecostes, Jr.ti Gonzaga, LGU Gonzaga ken ti GUMIL Gonzaga.

Maangay ti GF convention inton Abril 19-21 itoy a tawen iti panangsangaili ti GUMIL Cagayan nga idauluan ni Arthur P. Urata.

Mainaig itoy, makiddaw kadagiti amin a provincial chapter ti panangkontakda iti GUMIL Cagayan para iti akomodasion ken dadduma pay a detalye iti 09489864481, 09159842149 ken 09277927913 wenno ag-e-mail iti salacnib@yahoo.com. (Freddie Pa. Masuli)


(Naipablaak iti Bannawag, Marso 18, 2013 a bilang.)

Kombension ti GUMIL Filipinas, maangay inton Abril 19-21

Angayen ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, ken idauluan ni RTC Judge Vivencio S. Baclig (Ret.), ti nailian a kombension ken literary seminar ti gunglo inton Abril 19-21 iti STR River Resort, Brgy. Pateng, Gonzaga, Cagayan.

Ti GUMIL Cagayan nga idauluan da Arthur P. Urata, Presidente ti GC, ken Vilmer V. Viloria, Bise-Presidente ti GF, ti mangsangaili iti kombension.

Tumulong met iti nasao a pasken ti GUMIL Gonzaga nga idauluan ni Herman Cardenas, ti LGU Gonzaga nga idauluan ni Mayor Carlito Pentecostes, Jr., ken ti gobierno probinsial ti Cagayan iti babaen ti liderato da Gobernador Alvaro “Bong” T. Antonio ken Bise-Gobernador Leonides N. Fausto.
Malaksid iti innadal, mapili iti kombension ti Miss GF 2013.

Registration fee: P500.00 kadagiti regular a delegado; P400.00 kadagiti senior citizen ken P300.00 kadagiti estudiante.

Madanon ti STR River Resort babaen dagiti bus a para Gonzaga wenno Sta. Ana manipud iti Manila (Florida via Isabela). Manipud iti Laoag City adda diretso a biahe ti bus (GMW). Iti Tuguegarao City, adda maala a diretso a van a biahe Gonzaga-Sta. Ana. Kadagiti  biahe nga agpa-Aparri, dumsaag iti Dugo, Camalaniugan ken dita a mangala iti dyip wenno multicab a biahe Gonzaga-Sta. Ana. Kadagiti aggapu iti Ilokos a di makalugan iti diretso a biahe, dumsaag iti Magapit, Lal-lo ket dita a mangala iti multicab agingga iti Dugo, Camalaniugan wenno mangala kadagiti van a biahe Tuguegarao-Gonzaga-Sta. Ana. (Freddie Pa. Masuli)

* * *

Iti sabali a bangir, angayen ti GUMIL Filipinas ti maika-7 a quartery board meeting ti gunglo inton Peb. 3 iti No. 4 Acacia St., Namnama Village, San Fernando City, La Union.

Kangrunaan a mapagsasaritaan iti daytoy a taripnong ti pannakaisagana ti sumaruno a kombension nasional ti GF a maangay iti Gonzaga, Cagayan babaen ti panangsangaili ti GUMIL Cagayan.

Malaksid kadagiti opisial ti GF, igunamgunam ni GF Pres. Vivencio S. Baclig ti idadar-ay dagiti GF chapter president. (Djuna R. Alcantara)

* * *

Angayen met ti kabbuangay a GUMIL Hong Kong, gunglo dagiti mannurat nga Ilokano iti Hong Kong, ti miting ti gunglo inton Pebrero 10, 3 p.m., iti Lambet Park, Central, kas impakaammo ni Nexon Agcaoili, presidente ti gunglo.

Para iti detalye ti miting, makiuman ken ni Sek. Analyn Domingo, mobile phone 6418-6089. (Grace Hidalgo, PRO GHK)


(Naipablaak iti Bannawag, Pebrero 4, 2013 a bilang.)

GF, agawaten iti nominasion para iti Pedro Bucaneg, Florentino ken Valdez award

Agawaten ti GUMIL Filipinas, babaen ti Awards Committee daytoy, kadagiti nominasion para iti 2013 Pedro Bucaneg Award, 2013 Leona Florentino Award, ken 2013 Cornelio Valdez Award.

Ti Pedro Bucaneg Award ti kangatuan a pammadayaw a maipaay ti GF, ti gunglo dagiti mannurat nga Ilokano iti Filipinas ken iti ballasiw-taaw, iti asino man a mannurat nga Ilokano a nakaipaay, babaen, kangrunaana, iti bagi ti sinuratna, iti di magatadan a tulong iti pannakaparangpaya ken pannakasaluad ti Literatura Ilokano.

Ti met Florentino Award ti bersion ti Bucaneg Award a para kadagiti mannurat nga Ilokana.

Maipaay met ti Cornelio Valdez Award iti asino man a kameng ti GF kadagiti kamengna “a nakaipaay iti naisangsangayan a gapuanan para iti isasantak ti gunglo.”

Dagiti laeng chapter ti GF wenno dagiti naipaayanen kadagiti naagapad a pammadayaw ti mabalin nga aginominar.

Deadline iti panagipatulod iti nominasion: Pebrero 28, 2013.

Para iti kompleto a pagannurotan, ag-e-mail iti Chair ti Awards Committee iti: clesbrambaud@gmail.com.
Mapadayawan dagiti mapili a mannurat bayat ti Maika-45 a Kombension Nasional ti GF iti Kalgaw 2013.


(Naipablaak iti Bannawag, Disiembre 3, 2012 a bilang.)

GF Kombension 2013, mapagpapatangan

Kangrunaan a mapagsasaritaan ti pannakaisagana ti sumaruno a kombension nasional ti GUMIL Filipinas, ti Gunglo Dagiti Mannurat nga Ilokano iti Filipinas ken iti Ballasiw-Taaw iti panagtataripnong dagiti opisialna inton Nob. 18, 2012 iti Brgy. Saoang, San Juan, Ilocos Sur, kas impakaammo ni RTC Judge Vivencio S. Baclig (Ret.), presidente ti gunglo.

Iti nasao a miting, idatag ti GUMIL Cagayan (GC) ti singasingna a mangsangaili iti daytoy a pasken ti GF iti umay a kalgaw.

Impalagip ni Pres. Baclig a malaksid kadagiti opisial ti GF, maawis met dagiti presidente dagiti amin a GF chapters, agraman dagiti advisers ti Board. (Djuna R. Alcantara)


(Naipablaak iti Bannawag, Nobiembre 12, 2012 a bilang.)

Board Miting ti GF, Set. 2

Agtataripnong dagiti opisial ti GUMIL Filipinas (GF) inton Setiembre 2, 2012 iti pagtaengan da agkaingungot a Prof. Honor Cabie ken GF Director Rose Cabie iti 1632 Burbank St., Brookside Hills Subdivision, Cainta, Rizal. Mangrugi ti miting iti alas 10:00 iti bigat.

Daytoy ti maika-5 a regular a quarterly board meeting ti GF ita a tawen, kas kinuna ni retirado nga RTC Judge Vivencio S. Baclig, president ti GF.

Kangrunaan a pagsasaritaan iti miting ti resulta ti 2012 GF Komperensia Nasional a naangay idi kalgaw iti Don Mariano Marcos Memorial State University (DMMMSU) iti Bacnotan, La Union babaen ti tulong ti National Commission for Culture and the Arts (NCCA.) Matamingto met ti maipapan iti pakaangayan ti kombension nasional ti GF iti umay a tawen, ken dadduma pay, kas kinuna ni Pres. Baclig.

Manamnama ti yaatendar dagiti opisial ti GF, chapter presidents, committee chairpersons ken advisers ti GF Board itoy nasao a taripnong. (Djuna R. Alcantara)

(Naipablaak iti Bannawag, Septiembre 3, 2012 a bilang.)

Fellows iti Pasnaan 2012, naammuan

Sangapulo nga agdadamo a mannurat nga Ilokano ti napili a fellows iti Pasnaan 2012, ti maikatlo a literary workshop ti GUMIL Filipinas, ti gunglo dagiti mannurat nga Ilokano nga idauluan ni Retirado a Hues Vivencio S. Baclig, para iti tay-ak ti sarita, daniw, pangorona a daniw, daniw a para ubbing, bukanegan ken sarilaysay (creative non-fiction).

Dagiti fellows: Prof. Edna Nagtalon, Ryan A. Dulig, Michael John B. Ancheta, Lourden May Parvian, Pearl Dacuag, Ephraim Domingo, Ronelyn Ramones, Ronnie E. Aguinaldo, Narglon C. Utanes ken Dexter M. Fabito. Napili met nga observers da Sheila Mae Villa ken Anthony Miguel Rafanan.

Maisayangkat ti Pasnaan babaen ti Workshop Committee ti GUMIL Filipinas nga idauluan ni Sherma E. Benosa, iti pannakitinnulong ti National Commission for Culture and the Arts, DepEd Currimao District, ken GUMIL Ilocos Norte nga idauluan ni Elizabeth M. Raquel. Agpaay ditoy a panelist da Bannawag Editor Cles B. Rambaud, Juan S.P. Hidalgo Jr., Bannawag Literary Editor Juan Al. Asuncion, Joel B. Manuel, Roy V. Aragon, Estela B. Guerrero, Daniel L. Nesperos, ken Junley L. Lazaga. Ni Bannawag Poetry Editor Ariel S. Tabag ti Workshop Director, idinto a moderators da Mighty C. Rasing ken Freddie Pa. Masuli.

Mainaig itoy, maipaayan ni Rosalie V. Calpito, mannaniw iti Camiling, Tarlac, iti sertipiko ti pammadayaw a kas Naisangsangayan a Fellow iti Pasnaan 2011.

Maangay ti Pasnaan 2012 iti Doña Josefa Edralin Elementary School iti Currimao, Ilocos Norte a pagpapaayan a prinsipal ni Ms. Aurea Austria itoy a Hunio 1-3, 2012. (Pasnaan 2012 Secretariat)

(Naipablaak iti Bannawag, Hunio 4, 2012 a bilang.)