“Wirawir ti Paskua,” rambakan ti GLU iti Dis. 2

Rambakan ti GUMIL La Union (GLU) ti maika-4 a “Wirawir ti Paskua” inton Disiembre 2, 2012 iti Function Hall ti Philippine Red Cross (PRC) La Union-San Fernando City Chapter a masarakan iti Widdoes St., Siudad ti San Fernando.

Itoy a panagtitipon ti pamilia GLU, mapadayawanto dagiti kameng ken development partner-na a dakkel ti naitulongda iti panagballigi dagiti proyekto ti gunglo iti napalabas a dua a tawen.

Pasetto ti ragragsak dagiti sumaganad: parlor games, paripa, dinnaniwan ken kinnantaan, ken dadduma pay. Ti GLU Youth Club ti napusgan a mangasikaso kadagitoy a paset ti programa.


(Naipablaak iti Bannawag, Nobiembre 26, 2012 a bilang.)

Regional Ilokano Seminar, maangay iti La Union

Maysa a seminar-workshop iti Ilokano a kas wagas ti komunikasion ti pagtitinnulongan nga iwayat iti umay a bulan iti La Union ti Regional Development Council (RDC) Region I, ti Philippine Information Agency (PIA) Region I ken ti Gunglo dagiti Mannurat na Ilokano (GUMIL) ti La Union a paggapuanto dagiti napusgan nga aglektiur a maaramid iti Justo Orros Conference Room ti National Economic Development Authority (NEDA) Regional Office I iti siudad ti San Fernando, La Union.

Ti panggep ti seminar-workshop: asaenna ti kabaelan dagiti agdadamo a mannurat iti Ilokano nga umayto makiseminar.

Kinuna ni NEDA Regional Director Juan N. Ngalob a mangrugi ti seminar-workshop inton Oktubre 3, a pakaisuruan ti ortograpia ken gramatika. Maisuronto ti panagsurat iti damag ken salaysay inton Oktubre 10. Ket iti maikatlo a serye ti seminar inton Oktubre 17, maisuronto ti arte ti panagipatarus (the art of translation).

Naisangrat daytoy a seminar para kadagiti kameng ti Association of Regional Government Information Officers (ARGIO) iti Rehion I, ti Pangasinan Association of Government Information Officers (PAGIO), ti La Union Association of information Officers (LUAGIO), ti Ilocos Norte Association of Government Information Officers (INAGIO), ti Ilocos Sur Association of Government Information Officers (ISAGIO) ken kadagiti kameng ti RDC Press Corps, a di pay natenneb a kas Ilokano communicator.

Nupay kasta, kinuna ni PIA Regional Director Abraham N. Libadia a silulukat met daytoy a seminar iti asino man iti Region I nga agregget a tumabuno. Ken mabalin met a pilien dagiti umay agseminar ti topiko (manipud iti tallo a serye) a kayatda laeng nga adalen.

Para iti dadduma pay a detalye, kontaken ni Ms. Jennifer C. Role ti PIA Region I, wenno ni Ms. Raquel Atawe ti NEDA Region I. (Djuna R. Alcantara)

(Naipablaak iti Bannawag, Septiembre 24, 2012 a bilang.)

Purisimo Lazaga, 76

Pimmusay gapu iti aksidente iti kalsada ni GUMIL La Union Director ken mannurat iti Bannawag Purisimo “Abe” O. Lazaga, 76, ti Brgy. Nagsabaran, San Juna, La Union.

Kinuna ti GLU a pimmusay ni Lazaga idi Mayo 17, 2012, kalpasan a dinungpar ti motorsiklo a minaneho ti maatap a nabartek nga agtutubo a kalugaranna.

Naitabon ti bangkayna idi Mayo 26 iti Forest Lake en Cielo Memorial Gardens ti San Juan.

Inulilana ni Rosita Mendoza Lazaga a kaingungotna, dagiti annakda a da Marife, Rommel, Ana Resil ken Joy, agraman dagiti mamanugang ken 12 nga appokona.

(Naipablaak iti Bannawag, Hunio 4, 2012 a bilang.)

GF Special Meeting: Marso 4

Angayen ti GUMIL Filipinas ti Special Board Meeting ti gunglo inton Marso 4, 10:00 A.M. iti pagtaengan da Mr. & Mrs. Dionisio S. Bulong iti No. 14, Ayungin St., Cadaing Village, Talipapa, Novaliches, Quezon City tapno mapagsasaritaan ti pannakaisagana ti GF National Conference.

Napusgan ti GUMIL La Union (GLU) a kas host chapter itoy a komperensia a maangay iti Don Mariano Marcos Memorial State University (DMMMSU) iti Bacnotan, La Union inton Abril 20-22, 2012 babaen ti tulong ti National Commission for Culture and the Arts (NCCA), kas financial partner. “Ni Mannurat a Kas Mannursuro” ti tema ti komperensia.

Kangrunaan a mapagpapatangan iti special meeting ti pakabuklan ti programa para iti komperensia, kas kinuna ni GF Pres. Vivencio S. Baclig.

Impakaammo met ni GF SecGen Djuna R. Alcantara a sakbay ti komperensia, maangayto ti sumaruno a Quarterly Board Meeting ti GF iti Siudad ti San Fernando, La Union inton Marso 25, 2012.

(Naipablaak iti Bannawag, Pebrero 27, 2012 a bilang.)

Salip iti Sarita iti Iluko ti 4th TESDA Region I Writing Contest

Ipakaammo ni Regional Director Washington M. Agustin ti Technical Education and Skills Development Authority (TESDA) ti Rehion I a naluktanen ti Salip iti Sarita ti 4th TESDA Writing Contest babaen met laeng ti itutulong ti GUMIL La Union, ti Gunglo Dagiti Mannurat nga Ilokano iti probinsia ti La Union.

Kinuna ni Direktor Agustin a mabalin a makisalip dagiti amin a mannurat iti Iluko (Iloko) ditoy Filipinas ken iti ballasiw-taaw, malaksid kadagiti nangabaken iti umuna, maikadua ken maikatlo a gunggona kadagiti tallo a napalabas a pasalip iti panagsurat ti TESDA Region I.

Innayonna a dagiti mangabak a sinurat itoy nga edision ti pasalip, mairamanto iti antolohia dagiti premiado a sarita maipapan iti TESDA a mabalin a maipablaakto iti 2012.

Dagiti pagannurotan:

1. Nasken a maisentro ti pakisalip iti tema a “REAL DEAL” a baro a plataporma ti TESDA-- ti panangpabileg daytoy nga ahensia kadagiti makunkuna a “grassroots” wenno gagangay nga umili babaen ti itdenna kadakuada a dekalidad a panagsanay ken edukasion teknikal a pagrangtayanda nga agbirokto iti natalged a panggedan.

2. Agatiddog ti sarita iti 12-20 a panid. Maikompiuter daytoy iti 8 x 11 a bond paper. Agusar iti 12 points Times New Roman wenno Arial. Ikkan iti maysa a pulgada (1 inch) nga espasio (margin) iti amin nga igid ti manuskrito.

3. Maysa laeng ti pakisalip ket nasken nga orihinal. Parbo a nagan laeng ti ilanad iti entry.

4. Uppat a kopia (hard copy) ken maysa a soft copy (CD) ti pakisalip ti kasapulan.

5. Iragpin ditoy ti sobre seliado a naglaon iti pudno a nagan ti autor, ababa a kabibiagna, retrato, adres ken contact nos. (CP number ken e-mail). Ipatulod dagitoy iti: The Iloko Literary Competition Secretariat, Office of the Regional Director, TESDA Region I, Quezon Ave., San Fernando City, iti di naladladaw ngem Agosto 6, 2011, alas 5:00 iti malem.

6. Madiskualipika ti asino man a matakuatan nga aglabsing iti ania man kadagitoy a pagannurotan.

7. Dagiti premio: Umuna: P12,500; Maikadua, P8,750; Maikatlo, P6,250; ken Tallo a Pangliwliwa a Gunggona a sag-P1,250. (Maikkatanto dagiti premio iti 20% a VAT, kas sagudayen ti pagalagadan ti gobierno.) Maipaayanto pay dagiti mangabak iti sertipiko ti pammadayaw.

8. Saan a mabalusingsing ti pangngeddeng dagiti hurado.

9. Mapakaammuanto dagiti mangabak apaman nga addan resulta ti salip ken mapadayawandanto inton Agosto 27, 2011 iti Conference Room ti TESDA Rehion I iti Siudad ti San Fernando, La Union.

10. Para iti dadduma pay nga impormasion, kontaken ti opisina ti TESDA Region I iti telepono (072) 242-7584 ken 888-3966.Wenno ag-e-mail iti tesda1_ro@yahoo.com. Nasaysayaat pay no bisitaen ti website daytoy iti www.tesda1.net. (Djuna R. Alcantara)

Bannawag, Hunio 27, 2011, panid 18.