Nangabak iti 2 a pasalip ti GUMIL Ilocos Norte, naammuan

Ipakaammo ti Komite Dagiti Pasalip ti GUMIL Ilocos Norte a nalpasen ti pangngeddeng dagiti hurado iti naangay a dua a benneg ti Pasalip iti Literatura Dagiti Ubbing nga inesponsoran da Engr. Ric Agnes, Gladys Menor, ken ti GUMIL Oahu nga idauluan ni Rizal Fernandez.

Nupay nalpasen ti pannakaurnos ti panagsasaganad dagiti nangabak, agtalinaed pay laeng a palimed no ania ti pudpudno a puestoda. Dagiti nangabak (saan a nasken a kastoy ti panagsasaganadda):

Benneg ti Daniw a Para Ubbing: “Ni Laing ken Dadduma Pay a Daniw” ni Derick Marcel F. Yabes ti Sentro 2, Sanchez Mira, Cagayan; “Binting ken Dadduma Pay a Daniw” ni Johmar Rosario Alvarez ti Mabuttal East, Ballesteros, Cagayan; ”Greyd Wanakton ken Dadduma Pay a Daniw” ni Jesusa Leticia T. Lagda ti Suba, Paoay, Ilocos Norte; “Para ken ni Nicole, Grade I iti Sacuyya Elementary School” ni Benjamin P. Pacris ti Brgy. 1, Bantay, Ilocos Sur; “Daniw a Sagut Kadagiti Bunga” ni Jobert M. Pacnis iti Ammubuan, Ballesteros, Cagayan; ken “Kokak ken Kutkutak ken Dadduma Pay a Daniw” ni Virgilio S. Naungayan ti Darapidap, Candon, Ilocos Sur.

Benneg ti Sarita a Para Ubbing a Naidaniw: “Idi Napan ni Jethro Idiay Tuguegarao” ni Jobert M. Pacnis ti Ammubuan, Ballesteros, Cagayan; “”Meow, Meow, Meow” ni Benjamin M. Pacris ti Brgy 1, Bantay, Ilocos Sur, ken “Ni Moning ken ti Kalding” ni Reyah N. Velasco ti Fortuna, Marcos, Ilocos Norte. Tallo laeng ti napili dagiti hurado manipud kadagiti pito a naisalip a sarindaniw.

Mayawagto iti mismo a Kombension ti GUMIL Ilocos Norte iti DepEd-Ilocos Norte, Division Office, Laoag City inton Enero 19 ti pudno a puesto dagiti nangabak nga entry.

Maigunamgunam ti panagatendar dagiti nadakamat a mannurat iti nasao a Kombension tapno awatenda ti gunggonada.

Nagserbi a kas kamkameng ti hunta dagiti hurado da Renato A. Taylan, Mario T. Tejada ken Joel B. Manuel iti Salip ti Daniw a Para Ubbing idinto a da Elizabeth M. Raquel, Severino V. Pablo ken Cles B. Rambaud met iti Salip ti Naidaniw a Sarita a Para Ubbing. (JBM)


(Naipablaak iti Bannawag, Enero 21, 2013 a bilang.)

Miting ti GMM: Enero 6

Impakaammo ni Hues Vivencio S. Baclig, presidente ti GUMIL Metro Manila, a maangay ti miting dagiti opisial ken kameng itoy Enero 6, 2013 (alas onse iti bigat) iti 795 Sergio H. Loyola corner Maceda, Sampaloc, Manila babaen ti panangsangaili da Vincent Berroy ken kaingungotna.

Mapagsasaritaan iti nasao a miting dagiti nadumaduma a proyekto ti gunglo ken ti itatabuno daytoy iti maika-46 a Nailian a Kombension ti GUMIL Filipinas itoy nga Abril iti Gonzaga, Cagayan.

Manamnama pay a mayalnag iti miting ti Sukogan, libro ti dandaniw iti Ilokano ni Vincent Berroy, ken nakairamanan ti sumagmamano a daniw ti kabsatna a ni Simeon Berroy, agdama nga opisial ti GUMIL Metro Manila. (Maria Rosa A. Cabie)


(Naipablaak iti Bannawag, Enero 7, 2013 a bilang.)

Kombension ti GIN, nayalud-od iti Enero 19

Nayalud-od ti tinawen a kombension ti GUMIL Ilocos Norte, ti gunglo dagiti mannurat nga Ilokano iti Ilocos Norte, iti Enero 19, 2013 manipud iti dati a nayeskediul a pannakaangayna iti Dis. 22, 2012.

Kinuna ni Elizabeth M. Raquel a maangay met laeng ti kombension iti Division Office ti DepEd Ilocos Norte.
Iti nasao nga okasion a mapadayawanto dagiti mangabak iti pasalip ti gunglo iti panagsurat iti sarindaniw ken sarita a para ubbing. (Joel B. Manuel)


(Naipablaak iti Bannawag, Disiembre 24, 2012 a bilang.)

Martin, 35

Pimmusay ni Lawrence Decena Martin, kameng ti GUMIL Isabela ken dati a mannurat iti Bannawag, iti tawenna a 35, idi Nobiembre 28 iti maipagarup nga atake iti puso.

Tubo ti Barangay Masaya Sur, San Agustin, Isabela, naipasngay ni Martin idi Enero 23, 1977 kada Salustiano Martin ken Anastacia Decena.

Sakbay a pimmusay, isu ti news editor ti Valley Times iti Ilagan City sipud pay idi Septiembre 2011.
Graduado ni Martin iti Bachelor of Science in Civil Engineering iti La Salette University ken Associate in Computer Science iti Vizcaya Institute of Computer Science. Nupay kasta, kinaykayatna ti nagsursurat ken nag-ilustrador.

Malaksid iti Bannawag, nagsursurat pay ni Martin iti Lailo Romances ken Dearest Romances idi dekada ‘90. (Villamor Visaya, Jr.)


(Naipablaak iti Bannawag, Disiembre 17, 2012 a bilang.)

“Wirawir ti Paskua,” rambakan ti GLU iti Dis. 2

Rambakan ti GUMIL La Union (GLU) ti maika-4 a “Wirawir ti Paskua” inton Disiembre 2, 2012 iti Function Hall ti Philippine Red Cross (PRC) La Union-San Fernando City Chapter a masarakan iti Widdoes St., Siudad ti San Fernando.

Itoy a panagtitipon ti pamilia GLU, mapadayawanto dagiti kameng ken development partner-na a dakkel ti naitulongda iti panagballigi dagiti proyekto ti gunglo iti napalabas a dua a tawen.

Pasetto ti ragragsak dagiti sumaganad: parlor games, paripa, dinnaniwan ken kinnantaan, ken dadduma pay. Ti GLU Youth Club ti napusgan a mangasikaso kadagitoy a paset ti programa.


(Naipablaak iti Bannawag, Nobiembre 26, 2012 a bilang.)

Dua a libro ti GIS, maisagsagana

Dua a libro iti literatura ti isagsagana ita ti GUMIL Ilocos Sur (GIS) a manamnama a yalnagna inton 2014 a panangrambak ti gunglo iti nabalitokan nga anibersariona.

Kinuna ni Jerry B. A. Malamion, sekretario ti GIS, a maawagan dagitoy iti Lakasa, antolohia dagiti naisangayan a sarita dagiti mannurat a patanor ti Ilocos Sur, ken Kinanalmeng, antolohia dagiti napili a putar dagiti mararaem a mannaniw ti probinsia.

Napusgan da Arsenio B. Cortez, Benjamin P. Pacris, ken Dr. Ed H. Angco a kas editor dagiti dua a libro.
Mairaman iti listaan dagiti mannurat iti sarita a mayantolohia dagiti premiado a gapuanan da Jose A. Bragado, Reynaldo Duque, Fredelito Lazo, Danilo Antalan, Pelagio Alcantara, Antonio Encarnacion, Agustin D.C. Rubin, Crisostomo Ilustre, Bernardo Tabbada, Abraham Pasion, Solomon Benitez, Federico Ilac, Jr., Guillermo Concepcion, Jaime Raras, Jovito Amorin, Lorenzo Tabin, Benjamin Pacris, Arsenio Cortez, Virgilio Naungayan, Dr. Onofrecia Ibarra, Rodolfo Tabaco, Martin Rochina, Salvador Espejo, Danilo Bautista, Amor Cabaccang, kdp.

Iti libro ti dandaniw, umuna iti listaan da Dr. Godofredo Reyes, Leona Florentino, Leon Pichay, Dr. Marcelino Foronda, kdp. (Mercedes Tabbada-Llanes)


(Naipablaak iti Bannawag, Nobiembre 19, 2012 a bilang.)

GF Kombension 2013, mapagpapatangan

Kangrunaan a mapagsasaritaan ti pannakaisagana ti sumaruno a kombension nasional ti GUMIL Filipinas, ti Gunglo Dagiti Mannurat nga Ilokano iti Filipinas ken iti Ballasiw-Taaw iti panagtataripnong dagiti opisialna inton Nob. 18, 2012 iti Brgy. Saoang, San Juan, Ilocos Sur, kas impakaammo ni RTC Judge Vivencio S. Baclig (Ret.), presidente ti gunglo.

Iti nasao a miting, idatag ti GUMIL Cagayan (GC) ti singasingna a mangsangaili iti daytoy a pasken ti GF iti umay a kalgaw.

Impalagip ni Pres. Baclig a malaksid kadagiti opisial ti GF, maawis met dagiti presidente dagiti amin a GF chapters, agraman dagiti advisers ti Board. (Djuna R. Alcantara)


(Naipablaak iti Bannawag, Nobiembre 12, 2012 a bilang.)

Miting ti GUMIL Metro Manila: Nob. 10

Maangay ti miting ti GUMIL Metro Manila, ti Gunglo Dagiti Mannurat nga Ilokano iti Kamanilaan, itoy Nobiembre 10 babaen ti panagsangaili da agkaingungot a Martin ken Teresita Rochina iti Lot 5, Block 75, Blue Boz St., Rizal, Makati City, kas impakaammo ni RTC Judge Vivencio S. Baclig (Ret.), presidente ti gunglo.

Mapagpapatangan iti nasao a miting ti pannakarmabak ti maika-47 nga anibersario ti GMM inton Disiembre. (Sherilyn Viloria)


(Naipablaak iti Nobiembre 12, 2012 a bilang ti Bannawag.)

Salip iti Sarita ti 15th AMMAFLA

Adtoy ti kompleto a pagannurotan ti Salip iti Sarita ti Maika-15 nga AMMA Foundation Literary Awards (AMMAFLA) nga imatonan da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii) a nairanta nga agpaay kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada”:

1. Aggibus ti salip iti Pebrero 28, 2013.

2. Agpaay laeng ti salip kadagiti agdadamo a mannurat iti Ilokano. Iti daytoy a pasalip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Oktubre 15, 2012 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times Roman Medium 12 pts. iti computer), ken adda espasio wenno margin a maysa a pulgada iti amin nga igid ti papel.

5. Maysa laeng a sarita ti mabalin nga isalip ti tunggal autor.

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

8. Ipatulod ti pakisalip babaen ti koreo wenno personal nga idatag iti daytoy nga adres: Short Story Writing Contest, 15th AMMAFLA, c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Pebrero 28, 2013. Saan a mairaman iti salip ti entry a maawat kalpasan dayta a petsa.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti sabali a gunggona, no kasapulan.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti Pagannurotan Blng. 2 ken/wenno 6, maibabawi ti premiona ken mapawilanton a makisalip iti ania man a pasalip ti AMMAFLA.

(Naipablaak iti Bannawag, Oktubre 22, 2012 a bilang. 

Regional Ilokano Seminar, maangay iti La Union

Maysa a seminar-workshop iti Ilokano a kas wagas ti komunikasion ti pagtitinnulongan nga iwayat iti umay a bulan iti La Union ti Regional Development Council (RDC) Region I, ti Philippine Information Agency (PIA) Region I ken ti Gunglo dagiti Mannurat na Ilokano (GUMIL) ti La Union a paggapuanto dagiti napusgan nga aglektiur a maaramid iti Justo Orros Conference Room ti National Economic Development Authority (NEDA) Regional Office I iti siudad ti San Fernando, La Union.

Ti panggep ti seminar-workshop: asaenna ti kabaelan dagiti agdadamo a mannurat iti Ilokano nga umayto makiseminar.

Kinuna ni NEDA Regional Director Juan N. Ngalob a mangrugi ti seminar-workshop inton Oktubre 3, a pakaisuruan ti ortograpia ken gramatika. Maisuronto ti panagsurat iti damag ken salaysay inton Oktubre 10. Ket iti maikatlo a serye ti seminar inton Oktubre 17, maisuronto ti arte ti panagipatarus (the art of translation).

Naisangrat daytoy a seminar para kadagiti kameng ti Association of Regional Government Information Officers (ARGIO) iti Rehion I, ti Pangasinan Association of Government Information Officers (PAGIO), ti La Union Association of information Officers (LUAGIO), ti Ilocos Norte Association of Government Information Officers (INAGIO), ti Ilocos Sur Association of Government Information Officers (ISAGIO) ken kadagiti kameng ti RDC Press Corps, a di pay natenneb a kas Ilokano communicator.

Nupay kasta, kinuna ni PIA Regional Director Abraham N. Libadia a silulukat met daytoy a seminar iti asino man iti Region I nga agregget a tumabuno. Ken mabalin met a pilien dagiti umay agseminar ti topiko (manipud iti tallo a serye) a kayatda laeng nga adalen.

Para iti dadduma pay a detalye, kontaken ni Ms. Jennifer C. Role ti PIA Region I, wenno ni Ms. Raquel Atawe ti NEDA Region I. (Djuna R. Alcantara)

(Naipablaak iti Bannawag, Septiembre 24, 2012 a bilang.)

Board Miting ti GF, Set. 2

Agtataripnong dagiti opisial ti GUMIL Filipinas (GF) inton Setiembre 2, 2012 iti pagtaengan da agkaingungot a Prof. Honor Cabie ken GF Director Rose Cabie iti 1632 Burbank St., Brookside Hills Subdivision, Cainta, Rizal. Mangrugi ti miting iti alas 10:00 iti bigat.

Daytoy ti maika-5 a regular a quarterly board meeting ti GF ita a tawen, kas kinuna ni retirado nga RTC Judge Vivencio S. Baclig, president ti GF.

Kangrunaan a pagsasaritaan iti miting ti resulta ti 2012 GF Komperensia Nasional a naangay idi kalgaw iti Don Mariano Marcos Memorial State University (DMMMSU) iti Bacnotan, La Union babaen ti tulong ti National Commission for Culture and the Arts (NCCA.) Matamingto met ti maipapan iti pakaangayan ti kombension nasional ti GF iti umay a tawen, ken dadduma pay, kas kinuna ni Pres. Baclig.

Manamnama ti yaatendar dagiti opisial ti GF, chapter presidents, committee chairpersons ken advisers ti GF Board itoy nasao a taripnong. (Djuna R. Alcantara)

(Naipablaak iti Bannawag, Septiembre 3, 2012 a bilang.)

Maika-2 a Pasalip ti ALVIYA iti Sarita

Ipakaammo ti Secretariat ti ALVIYA Literary Foundation nga agawaten kadagiti sarita para iti Maika-2 a Pasalip ALVIYA a naluktan bayat ti Nasional a Komperensia ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw) a naangay iti Bacnotan, La Union.

Dagiti pagannurotan:

1. Naluktan ti salip idi Abril 22, 2012 ket aggibus  iti Enero 31, 2013.

2. Silulukat ti salip kadagiti amin a mannurat nga Ilokano ken uray pay kadagiti saan nga Ilokano ngem makasurat iti pagsasao nga Ilokano (Iluko wenno Iloko).

3. Agrikus ti pasalip iti tema ti “diaspora” wenno iti panagkalkallautang wenno pannakigasanggasat ni Ilokano iti sabali a lugar/pagilian.

4. Agatiddog ti pakisalip iti 15-25 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a kalawa iti amin nga igid ti bond paper.

5. Maysa laeng a sarita ti mapalubosan nga isalip ti kada mannurat a makisalip.

6. Nasken a bukod a putar ti autor ti maisalip, saan pay a naipablaak iti ania man a magasin, saan pay a nangabak iti ania man a kita ti pasalip, ken saan a naipatarus manipud iti ania man a lengguahe.

7. Ti laeng parbo a nagan ti autor ti agparang iti manuskrito a maisalip. Pakuyogan ketdi ti entry iti narikpan a sobre a nakailanadan dagitoy: paulo ti sarita, parbo ken pudno a nagan, ababa a kabibiag ti autor, ken cell phone number. Saanen nga ipatulod iti e-mail ti impormasion a mainaig iti autor (ti linaon ti narikpan a sobre).

8. Nasken a maipatulod ti sarita iti dua a porma: a.) hard copy (printed copy) iti uppat a nalawag a kopia a maipatulod iti daytoy nga adres: PASALIP ALVIYA, c/o Freddie P. Masuli, Cagayan State University, Sanchez Mira, 3518 Cagayan; ken b.) soft copy a maipatulod babaen ti e-mail iti daytoy nga e-mail account: alviya.foundation@gmail.com.

9. Nasken a maawat ti Secretariat dagiti dua a porma ti pakisalip (hard copy ken soft copy) iti di naladladaw ngem alas 11:59 ti rabii ti Enero31, 2013 (oras iti Filipinas).

10. Agtalinaed ti ania man a pangngeddeng dagiti hurado ken maisubli ti gunggona ti mangabak no maduktalan kalpasanna a sinalungasingna ti Pagannurotan Bilang 6. Awanto metten ti karbengan ti autor a makisalip kadagiti sabsabali pay a pasalip ti ALVIYA.

11. Agbalin a makipagtagikua ti ALVIYA Foundation kadagiti mangabak a sarita. Ngarud, kas iti autor, maaddaan ti agpasalip iti karbengan a mangipablaak kadagitoy mangabak a sarita iti ania man a wagas a kayatna karamanen ti elektroniko ken tradisional a wagas ti panagipablaak. Dagiti gunggona : First Prize, P15,000.00; Second Prize, P10,000.00 ken Third Prize, P8,000.00 ken tallo a pangliwliwa a gunggona a sag-P2,000.00.  Addanto met sertipiko dagiti amin a mangabak.

12. Maiwaragawag dagiti mangabak a sarita iti umuna a lawas ti Abril 2013 babaen ti Internet ken mayawat dagiti premio kadagiti autor bayat ti GUMIL Filipinas National Convention iti Kalgaw 2013.

Ni mannurat iti Bannawag Alex V. Yadao ti agpapaay a pangulo ti ALVIYA Foundation; ni met Freddie P. Masuli, mannurat met laeng iti Bannawag, ti Project Director ti Pasalip ALVIYA.

(Naipablaak iti Bannawag, Agosto 20, 2012 a bilang.)

Baro a libro, mayalnag iti Agosto 3

Pormal a mayalnag ti Alimpatok, ti antolohia dagiti erotiko a daniw nga Ilokano, iti daytoy nga Agosto 3, 2012 (saan a Hunio 29, kas immunan a naipakaammo) iti UP Baguio Library (2 p.m.), ken iti Mt. Cloud Bookshop (6 p.m.), agpada iti Baguio City.

Tampok iti nasao nga alnag ti panag-Poetry Reading ti sumagmamano nga autor a nairaman iti nasao a libro.

Inedit da Ariel S. Tabag, Roy V. Aragon ken Mighty C, Rasing, daytoy ti umuna a libro iti erotika Ilokana, ken nakaukkonan dagiti erotiko a daniw ti 33 a mannaniw nga Ilokano, iti Filipinas ken iti ballasiw-taaw.

Agpuskol iti 140 a panid ken agrukod iti 6 x 9, mabalin ti agorder iti babaen ti e-mail (saniata.publications@gmail.com), wenno iti selpon (0918-682-6330), ken mabalin met nga iti babaen ti pribado a mensahe iti Facebook, kalpasan a mai-like ti Facebook page ti nasao a libro.

(Naipablaak iti Bannawag, Hulio 23, 2012 a bilang.)

Nangabak iti COVLLA, mapadayawan

Padayawan ti Constancia V. Lansangan Literary Awards (COVLLA) dagiti sumaganad a naisangsangayan a sinurat a naipablaak iti SALINONG Dagiti Mannurat Iti Iloko iti tawen 2011: Mini-daniw, First Prize, “Silaw” ni Danilo C. Caburian, Mannaniw iti Tawen; Runner-Up, “Maysa a Kalikagum” ni Rodel S. Rivera; 1^st Honorable Mention, “Bin-i” ni Elmer L. Lopez; 2^nd Honorable Mention, “Biag, Maysa A Burburtia” ni Rolando S. Gamoso; 3^rd Honorable Mention, “Mayo II” ni Sarilyn C. Agoo; Special Mention, “Kadagiti Mannaniw” ni Isaganie S. Bermosa.

Iti mini-sarita, First Prize, “”Mama, ni Apongko!”” ni Cecilio L. Castillo, Mannarita iti Tawen; Runner-Up, “Maysa a Tedted” ni Alipio C. Quezon; ken iti mini-salaysay, First Prize, “Taliaw iti Nagtubuan” ni Mancielito S. Tacadena, Mannalaysay iti Tawen; Runner-Up, “Kenka, Manong” ni Benny Car. Balais.

Iti met COVLLA Salip iti 2010, Mannaniw iti Tawen ni Jorge Garo Placido (“Sabong/Kulibangbang”), Runner-Up ni Carmen C. Cid (“Daytoy Biag”), 1^st Honorable Mention ni Danilo C. Caburian (“Saringit”), 2^nd Honorable Mention ni Onofrecia I. Ibarra (“Saligemgem”), 3^rd Honorable Mention ni Rodel S. Rivera (Verbis”) ken Special Mention ni Isaganie S. Bermosa (“Balikas”).

Iti mini-sarita, Mannarita iti Tawen ni Henry R. Tangalin (“Ti Oong”), Runner-Up ni Cecilio L. Castillo (“Ti Lubong ti Makinilia”) ken iti mini-salaysay, Mannalaysay iti Tawen ni Ricardo A. Quibilan (“Tinnudo, Pinnabasol, Hinnusga”); Runner-Up ni Marivic B. Rabut (“Ti Pagrebbengan Dagiti Nagannak…Dagiti Annak”).

Agawat latta ti SALINONG c/o Atty. Nole V. Lansangan, publisher-editor, Purok 1, Villa Cruz, San Mateo, 3318 Isabela, iti mini daniw (3-7 a linia), mini-sarita ken mini-salaysay (maysa a panid, single space) a maipablaak ken pakapilian ti Mannaniw, Mannarita ken Mannalaysay iti Tawen.

(Naipablaak iti Bannawag, Hulio 23, 2012 a bilang.)

Maika-10 a tawen ti RFAAFIL, marambakan iti ITC, Agoo, LU

Rambakan ti Reynald F. Antonio Awards for Iluko Literature (RFAAFIL) ti maika-10 a tawenna a kas agpaspasalip iti Literatura Ilokana itoy Hulio 7-8, 2012 iti ITC, Consolacion, Agoo, La Union (sango ti DMMMSU-South La Union Campus). Paset ti selebrasion ti pannakapadayaw dagiti nangabak iti Salip iti Sarita ken Daniw ti 10th RFAAFIL.

Awisen ti RFAAFIL dagiti amin a mannurat a nakisalip iti 10^th RFAAFIL, iti benneg ti sarita ken daniw, a tumabuno iti anibersario, ken uray pay dagiti mannaniw a nakisalip iti RFAAFIL Pulse, ti opisial a Facebook ti RFAAFIL.

Maawis pay a dumar-ay dagiti naglabas a winners iti pasalip ti RFAAFIL wenno dagiti pannakabagi dagiti winners a napanen iti sabali a biag.

Kadagiti nakisalip ita a tawen ken kadagiti naglabas a winners, ipakaammo koma iti RFAAFIL babaen ti e-mail (rfaafil@hotmail.com ken admin@rfaafil.com) no makaatendarkayo wenno saan. Pakaammuan ti Secretariat ti RFAAFIL iti kabiitan a panawen.

Dagiti winners kadagiti napalabas a pasalip ti RFAAFIL: Errol L. Abrew, Aurelio S. Agcaoili, Johmar R. Alvarez, Edilberto H. Angco, Danilo B. Antalan, Roy V. Aragon, Julio V. Belmes, Prescillano N. Bermudez, Danilo C. Caburian, Jeremias A. Calixto, Bagnos G. Cudiamat, Gloria B. Damasco, Clarito G. De Francia, Virginia A. Duldulao, Reynaldo A. Duque, Dexter M. Fabito, Federico T. Ilac, Jr., Crisostomo M. Ilustre, Efren A. Inocencio, Arnold P. Jose, Joel B. Manuel, Virgilio S. Naungayan, Daniel L. Nesperos, Severino V. Pablo, Jobert M. Pacnis, Benjamin P. Pacris, Prodie Gar. Padios, Giovanni L. Palomares, Francisco T. Ponce, Jaime G. Raras, Mighty C. Rasing, Florentino V. Rosal, Agustin DC. Rubin, Fernando B. Sanchez, Clarita A. Sumahit, Ariel S. Tabag, Lorenzo G. Tabin, Marcelino A. Tablizo, Aida C. Tiama ken Derick Marcel F. Yabes.

(Naipablaak iti Bannawag, Hulio 2, 2012 a bilang.)

Baclig, nailayon a presidente ti GMM

Nailayon ni retirado a Hues Vivencio S. Baclig a presidente ti GUMIL Metro Manila, gunglo dagiti mannurat nga Ilokano iti Metro Manila para iti tawen 2012-2014.

Tubo iti Cabugao, Ilocos Sur, kolumnista iti Bannawag ni Baclig ken nagpapaay iti Regional Trial Court iti Quezon City.

Dagiti dadduma a napili nga opisial: Ariel S. Tabag (bise-presidente), Sherilyn Viloria (sekretaria); Eden Bulong (tesorera); Ross Deritt (auditor); Maria Rosa A. Cabie (PRO).

Dagiti napili a direktor: Angelo “Eloy” Padua; Joy Dilan; Benn Cabacungan; Virgilio Tabugadir; Leonardo S. Fagaragan; Martin Rochina; ken Simeon Berroy.

Dinutokan met ni Baclig ni Juan S.P. Hidalgo, Jr. ti Rosales, Pangasinan a kas presidential adviser, ken ni Honor Blanco Cabie ti Pinili, Ilocos Norte a kas presidential consultant.

Kalpasan ti panagsapata dagiti opisial, pinagsapata met ni Baclig dagiti dua a baro a kameng ti gunglo, da Melogiane Salting ken Aileen Serrano, agpada a mannurat iti Bannawag.

Naangay ti eleksion/miting iti Maki Haus, Quezon City idi Mayo 20, iti panangsangaili ni Padua, FAMAS president. (M.R.A. Cabie)

(Naipablaak iti Bannawag, Hunio 4, 2012 a bilang.)

Fellows iti Pasnaan 2012, naammuan

Sangapulo nga agdadamo a mannurat nga Ilokano ti napili a fellows iti Pasnaan 2012, ti maikatlo a literary workshop ti GUMIL Filipinas, ti gunglo dagiti mannurat nga Ilokano nga idauluan ni Retirado a Hues Vivencio S. Baclig, para iti tay-ak ti sarita, daniw, pangorona a daniw, daniw a para ubbing, bukanegan ken sarilaysay (creative non-fiction).

Dagiti fellows: Prof. Edna Nagtalon, Ryan A. Dulig, Michael John B. Ancheta, Lourden May Parvian, Pearl Dacuag, Ephraim Domingo, Ronelyn Ramones, Ronnie E. Aguinaldo, Narglon C. Utanes ken Dexter M. Fabito. Napili met nga observers da Sheila Mae Villa ken Anthony Miguel Rafanan.

Maisayangkat ti Pasnaan babaen ti Workshop Committee ti GUMIL Filipinas nga idauluan ni Sherma E. Benosa, iti pannakitinnulong ti National Commission for Culture and the Arts, DepEd Currimao District, ken GUMIL Ilocos Norte nga idauluan ni Elizabeth M. Raquel. Agpaay ditoy a panelist da Bannawag Editor Cles B. Rambaud, Juan S.P. Hidalgo Jr., Bannawag Literary Editor Juan Al. Asuncion, Joel B. Manuel, Roy V. Aragon, Estela B. Guerrero, Daniel L. Nesperos, ken Junley L. Lazaga. Ni Bannawag Poetry Editor Ariel S. Tabag ti Workshop Director, idinto a moderators da Mighty C. Rasing ken Freddie Pa. Masuli.

Mainaig itoy, maipaayan ni Rosalie V. Calpito, mannaniw iti Camiling, Tarlac, iti sertipiko ti pammadayaw a kas Naisangsangayan a Fellow iti Pasnaan 2011.

Maangay ti Pasnaan 2012 iti Doña Josefa Edralin Elementary School iti Currimao, Ilocos Norte a pagpapaayan a prinsipal ni Ms. Aurea Austria itoy a Hunio 1-3, 2012. (Pasnaan 2012 Secretariat)

(Naipablaak iti Bannawag, Hunio 4, 2012 a bilang.)

5th Premio Duque, naluktan

Ipakaammo ti Secretariat ti Premio Reynaldo A. Duque a silulukaten ti Salip iti Sarita ti 5th Premio Duque. Naipanagan ti award-giving body ken ni mabigbig a mannurat Reynaldo A. Duque, tubo iti Siudad ti Candon, iti panangesponsor ni Teresita R. Duque a kaingungotna.

Dagiti pagannurotan:

1. Silulukat ti salip kadagiti Ilokano a mannurat nga agdama ken dati a kameng ti GUMIL Metro Manila ken GUMIL Candon, (Ilocos Sur) nga agindeg iti Filipinas wenno addan iti ganggannaet, malaksid kadagiti kameng ti Bannawag, wenno kakabagianda.

2.Agatiddog ti sarita iti 10-15 a panid, naimakinilia wenno naikompiuter iti doble espasio iti 8-1/2 x 11 a coupon bond. Maysa laeng a sarita ti mabalin nga isalip ti tunggal mannurat.

3. Nasken a parbo a nagan ti maikabil iti manuskrito a pakisalip. No ipatulod babaen ti e-mail: dua nga MS Word document files ti idatag. Umuna, ti sarita a pakisalip. Maikadua, ti parbo ken pudno a nagan ti autor, pakasaritaan ti biag ti autor, ken ti sertipikasion ti pammigbig ti gunglo (GUMIL Metro Manila ken GUMIL Candon) a kameng wenno pagkamenganto ti mannurat.

4. No ipatulod babaen ti koreo: uppat (4) a kopia ti idatag ken pakuyogan ti entry iti narikpan a sobre a nakailanadan ti paulo ti sarita ken ti parbo a nagan ti autor. Laonen ti sobre ti ladawan, naisurat a kabibiag ti autor, kasta met ti pudno a naganna. No iti e-mail, iturong iti asseng.tabag@gmail.com. No iti koreo, ipatulod iti Premio Reynaldo A. Duque Secretariat, c/o Bannawag, Manila Bulletin Publishing Corporation, Muralla cor. Recoletos Sts., Intramuros, 1002 Manila.

5. Makaammo ti makisalip a mangpili iti tema ti saritana, ngem masapul a mainaig iti kultura ni Ilokano.

6. Nasken nga orihinal, di pay naipablaak, di naadaw iti ania man a naipablaaken a sinurat, di naipatarus manipud iti sabali a lengguahe, di pay nangabak iti ania man a salip iti panagsurat iti sarita, ti sarita nga isalip, ken bukod a gapuanan ti autor ti isalipna a sarita.

7. Agbalin a kukua ti sponsor dagiti mangabak a sarita. Maikkan pay ti sponsor iti karbengan a mangedit, mangatur ken mangipablaak iti libro, magasin wenno periodikal a pilina nga awan ti sungsungbatanna iti autor. Agtalinaed ketdi ti copyright iti autor.

8. Saan a mabalbaliwan ti pangngeddeng dagiti hurado— malaksid no maduktalan kalpasanna a linabsing ti mannurat ti Pagannurotan Bilang 6. Iti dayta a panaglabsing, maibabawi ti gunggonana ket saanton a mapalubosan ti autor a makisalip iti ania man a pasalip nga esponsoran ti Premio Reynaldo A. Duque.

9. Dagiti gunggona: First Prize, $200.00; Second Prize: $150.00; ken, Third Prize, $100.00. Addanto sertipiko ti pammigbig kadagiti mangabak. Maikkatto ti 10 a porsiento (10%)  iti tunggal premio ket maipan daytoy iti pundo ti GUMIL Metro Manila.

10. Nasken a maawat ti pakisalip iti e-mail wenno iti koreo saan a naladladaw ngem tengnga ti rabii ti Hulio 31, 2012.

11. Maitedto dagiti gunggona iti maysa a pasken nga angayen ti sponsor inton Oktubre 29, 2012 iti Parañaque City wenno idiay Royale Tagaytay Estates, Metro Tagaytay, Cavite.

(Naipablaak iti Bannawag, Mayo 21, 2012 a bilang.)

Pasnaan 2012, agawaten iti manuskrito

Agaw-awaten ti GUMIL Filipinas kadagiti manuskrito para iti Maikatlo a Pasnaan wenno workshop iti panagsurat para kadagiti agdadamo a mannurat nga Ilokano a maangay inton Hunio 1-3, 2012 iti Doña Josefa Edralin Marcos Elementary School, Currimao babaen ti pannakitinnulong ti National Commission for Culture and the Arts, ti DepEd Currimao District ken GUMIL Ilocos Norte.

Sangapulo a fellows ti mapili ken maikkan iti gundaway a ma-workshop dagiti sinuratda dagiti premiado a mannurat nga Ilokano: 3 iti sarita, 3 iti daniw, 1 iti daniw a para ubbing, 1 iti sarilaysay (creative non-fiction), 1 iti bukanegan, ken 1 iti pangorona a daniw.

Rumbeng nga orihinal ken di pay naipablaak dagiti maidatag a gapuanan. Ipatulod ti gapuanan iti sherma.benosa@gmail.com iti di naladladaw ngem Mayo 20, 2012.

Para iti dadduma pay a detalye, bisitaen ti manipudkadagitieditor.blogspot.com, wenno iti page ti Bannawag Magazine iti Facebook. (Sherma E. Benosa)

(Naipablaak iti Bannawag, Mayo 7, 2012 a bilang.)

Bannawag -- Abril 30, 2012

SARITA

6 Alibungabong

   Neyo Mario E. Valdez

NOBELA

30 Daga a Nakayanakan (2)

    Juan Cabreros Laya

34 Dagiti Bituen iti Imatangda (27)

    Jose A. Bragado

DANIW

4 2 a Soneto

   Honor Blanco Cabie

28 Sabong ti Paria

   Jennifer N. Requilman

32 Iti Sidong Dagiti Balikas

    Fernando C. Alonzo

SALAYSAY

8 Gapu Ta Daytoy ti Linteg (33)

    Hues Joven F. Costales (Ret.)

12 Nagturposkan, Sadino Itat’ Papanam?

    Mighty C. Rasing

16 Komusta ti Wangag River?

     D.S. Bulong, Vilmer V. Viloria ken Roy V. Aragon

40 Kastoy ti Agpatubo iti Kawayan

     Reynaldo E. Andres

KOMIKS

21 Tres Muchos (49)

24 Bannatiran (64)

26 Miks & Tiks

KOLUM

10 Kas Kuna ni Manang Imee

14 Dear Judge

20 Dear Doc

33 Okeyka, Apong

36 TIPS

39 Kastoy, Kapid, Ditoy Hawaii

42 Padasem Daytoy, Kailian

44 Ading Kosinera

PAGLINGLINGAYAN

45 Nagimasen Eatery, Kdp.

46 Showbiz

48 Sinniriban

48 Sapukas

48 Sudoku

48 Aggarakgaktayo

DADDUMA PAY

 2 Ti Makunami

15 Tao, Lugar, Pasamak

18 Ti Bugbugtong a Kiote a Manok

19 National Heritage Month, Maluktan iti Romblon

29 Ania Met ti Maitulongmo iti Eskuelatayo, Kompadre?

31 Txtm8

35 Siled ti Kararag

37 Ti Gasatmo Ita a Lawas

38 Ammuem Pay Dagitoy