Miting ti GMM: Nob. 9

Maangay ti miting ti GUMIL Metro Manila, gunglo dagiti mannurat nga Ilokano iti Kamanilaan ken kabangibangna a probinsia, inton Nobiembre 9, 2014 iti panagsangaili da agkaingunot a Leo Fagaragan ken Dr. Zita N. Fagaragan iti pagtaenganda iti Kaunlaran Village, Caloocan City.

Mapagsasaritaan iti nasao a miting ti pannakarambak ti maika-48 nga anibersario ti gunglo inton Dis. 7, 2014 iti Child Jesus College, Caloocan City; ti proyekto daytoy a libro; ti pannakarambak ti maika-80 nga anibersario ti Bannawag; ken dadduma pay.

Para iti dadduma pay nga impormasion, ag-text iti 0927-561-7827 (ABS), wenno 0947-840-9844 (AST). (MCR)


(Naipablaak iti Bannawag, Nobiembre 10, 2014 a bilang.)

“Tungtongan ti GMM,” maipanggep iti literatura a para ubbing ken agtutubo

Angayen ti GUMIL Metro Manila, ti gunglo dagiti mannurat nga Ilokano iti Kamanilaan ken kabangibangna a probinsia, ti maikadua a bansada ti “Tungtongan,” maysa a serye ti lektiur ti gunglo. Itoy a gundaway, maipanggep iti Literatura a Para Ubbing, ken Literatura a Para Agtutubo (Young Adult). Agpaay a lecturer da Mighty C. Rasing, Sherma E. Benosa ken Anna Liza M. Gaspar babaen ti panangiwanwan ni Ariel S. Tabag.

Maangay ti “Tungtongan 2” inton Oktubre 11, 2014 iti ala una agingga iti alas kuatro iti malem iti 795 Maceda St., Sampaloc, Manila babaen ti panangsangaili ni Rhea D. Berroy.


(Naipablaak iti Bannawag, Oktubre 6, 2014 a bilang.)

“Tungtongan 1” ti GMM: Agosto 24

Angayen ti GUMIL Metro Manila, ti gunglo dagiti mannurat nga Ilokano iti Kamanilaan ken kabangibangna, ti “Tungtongan 1,” umuna a serye ti lektiur iti lengguahe ken literatura inton Agosto 24, 2014, 9 A.M. iti Child Jesus College, Caloocan City, kas impakaammo ni GMM President Ariel S. Tabag.

Aglektiur ni Bannawag Editor Cles B. Rambaud maipanggep iti Ortograpia ken Gramatika ti lengguahe nga Ilokano; panagsurat met iti nobela ken sarita ti tamingen da dati a Bannawag Editor Dionisio S. Bulong ken dati a Bannawag Literary Editor Jose A. Bragado, kas panagsaganadda.

Mayalnagto pay ti online a bersion ti Saluyot, ti opisial a pagiwarnak ti GMM. Marugian met ti serye ti “Pa-Bingo ti GUMIL Metro” a pagur-or iti pondo ti gunglo.

Kadagiti interesado nga agatendar, kauman ni GMM Sec. Aileen B. Serrano (0927-5617827).

Iti sabali a bangir, maisagsagana metten ti libro dagiti dandaniw ni ayat nga ipablaak ti GMM iti pannakitinnulong ti GUMIL Filipinas. (Mighty C. Rasing)


(Naipablaak iti Bannawag, Agosto 11, 2014 a bilang.)

GF Board Meeting: Dis. 7

Maangay ti maikatlo a board meeting ti GUMIL Filipinas, ti gunglo dagiti mannurat iti Filipinas ken ballasiw-taaw, itoy Disiembre 7, 2013 (nayalud-od manipud iti Nobiembre 8), 10 A.M. babaen ti panangsangaili da GF Board Director Martin T. Rochina ken ti kaingungotna a ni Teresita Rochina iti pagtaenganda iti Brgy. Rizal, Makati City, kas kuna ni GF President Arthur P. Urata, Sr.

Mapagsasaritaan iti nasao a miting dagiti proyekto ti GF a kas iti Pasnaan 5 a maangay inton Pebrero 7-9, 2014 idiay Gonzaga, Cagayan; ti Balikas a publikasion ti gunglo; ti Tagnawa 2014 a proyekto iti panagilibro ken ti pannakaangay ti 46th GF Convention inton Abril 2014 iti Sanchez Mira, Cagayan.

Maigunamgunam ti idadar-ay dagiti amin nga opisial ken dagiti presidente dagiti GUMIL chapter.

Iti sabali a bangir, marambakan ti maika-47 nga anibersario ti GUMIL Metro Manila iti pagtaengan da GMM President Vivencio S. Baclig iti Novaliches, Quezon City itoy a Disiembre 8, 2013. Simple laeng ti selebrasion ta inkeddeng dagiti kameng ti agdonar kadagiti biktima ti bagyo a Yolanda babaen ti Philippine National Red Cross.


(Naipablaak iti Bannawag, Disiembre 9, 2013 a bilang.)

Miting ti GF ken GMM, Nob. 9

Sangailien ni GUMIL Filipinas Director Martin Rochina ken kaingungotna a Teresita ti maikatlo a board meeting ti GUMIL Filipinas, ti gunglo dagiti mannurat nga Ilokano iti Filipinas ken ballasiw-taaw, ken ti general membership meeting ti GUMIL Metro Manila, ti gunglo dagiti mannurat nga Ilokano iti Metro Manila ken kabangibangna a probinsia, inton Nob. 9, 2013 iti pagtaenganda iti Makati City.

Mapagsasaritaan iti miting ti GF dagiti proyekto ti gunglo a kas iti Pasnaan 5 a maangay inton Pebrero 2014, ti Tagnawa 2014 a proyekto iti panagipablaak, ken ti Maika-46 a Nailian a Kombension inton Abril 2014 a maangay iti Sanchez Mira, Cagayan, segun ken ni GF President Arthur P. Urata, Sr.

Mapagsasaritaan met iti miting ti GMM ti pannakaangay ti Maika-47 nga Anibersario ken Christmas Program ti gunglo inton Dis. 8, 2013 iti Bloomfields Subdivision, Novaliches, Quezon City, kas impakaammo ni GMM President Ret. Judge Vivencio S. Baclig. (GF Secretariat)


(Naipablaak iti Bannawag, Nobiembre 4, 2013 a bilang.)

Miting ti GMM, Septiembre 21

Maangay ti miting ti GUMIL Metro Manila, gunglo dagiti mannurat nga Ilokano iti Kamanilaan ken kabangibangna a probinsia, iti alas dos iti malem ti Setiembre 21, 2013 iti St. Dominic Savio College, Quirino Highway, Pangarap, Caloocan City babaen ti panangsangaili ti presidente ti nasao nga eskuelaan, ni Dr. Nestor V. Dela Cruz, iti pannakitinnulong ni Angelo “Eloy” Padua, presidente ti FAMAS ken kolumnista iti Bannawag, kas impakaammo ni (Ret.) Judge Vivencio S. Baclig, presidente ti gunglo.

Kangrunaan a mapagpapatangan iti nasao a miting ti pannakaangay ti maika-47 nga anibersario ken programa iti Paskua ti GUMIL Metro Manila a maangay inton Disiembre.

Para iti dadduma pay a detalye, ag-text iti 0918-682-6330 (AST).


(Naipablaak iti Bannawag, Septiembre 16, 2013 a bilang.)

“Tungtongan iti GMM,” Marso 24

Maangay ti maikatlo nga edision ti “Tungtongan iti GUMIL Metro Manila,” ti gunglo dagiti mannurat nga Ilokano iti Kamanilaan, itoy a Marso 24, 2013 iti 14 Juan Luna St., Area 2, UP Campus, Diliman, Quezon City iti ala una agingga iti alas singko iti malem iti panagsangaili da agkaingungot a Juan S.P. Hidalgo, Jr ken Namnama Hidalgo.

Serye ti binulan a workshop ti “Tungtongan iti GMM” para kadagiti kameng ti GUMIL Metro Manila, nga agpatingga iti Nobiembre 2013. Silulukat met daytoy kadagiti saan a kameng ti GUMIL no la ketdi ta maisapsapa ti panagpakaammo ti asino man a dumar-ay.

Maipaayan iti Sertipiko ti Idadar-ay ti mannurat a nakadar-ay iti naituding a bilang ti edision ti “Tungtongan iti GMM 2013.”

Para iti dadduma pay nga impormasion, ag-text iti 0918-682-6330.

Iti sabali a bangir, maangay ti general membership meeting ti GUMIL Metro Manila inton Marso 31 iti 1632 Burbank Ave., Brookside Hills Subdivision, Cainta, Rizal iti panagsangaili ti agkaingungot a Honor ken Ma. Rose Cabie, kas impakaammo ni (Ret.) Judge Vivencio S. Baclig, presidente ti gunglo.

Para iti detalye, agteks iti 0916-499-7218.


(Naipablaak iti Bannawag, Marso 25, 2013 a bilang.)

“Tungtongan iti GMM,” nairusat

Inrusat ti GUMIL Metro Manila itay Enero 27 ti “Tungtongan iti GMM,” ti panagsisinnukat iti kapanunotan dagiti mannurat nga Ilokano iti Metro Manila maipanggep iti panagsurat iti sarita, salaysay, daniw ken dadduma pay a kita ti sinurat. Naiwayat daytoy para kadagiti mannurat nga Ilokano iti Kamanilaan para iti ad-adda pay a pannakapatadem ti plumada.

Sinangaili ni retirado a Hues Vicencio S. Baclig, presidente ti GMM, ti nasao a “Tungtongan,” ken nagpaay met a lecturer ni Prof. Honor Blanco Cabie a nangtratar ti maipanggep kadagiti ramen ti nabisked ken makaawis a sinurat, ken dagiti paratignay iti panagsurat.

Maangay ti maikadua a “Tungtongan iti GMM” itoy Pebrero 24, 2013 a pakatamingan met ti Daniw a Para Ubbing.

Para iti detalye ti “Tungtongan,” ag-e-mail iti asseng.tabag@gmail.com. (Maria Rosa A. Cabie)


(Naipablaak iti Bannawag, Pebrero 11, 2013 a bilang.)

Miting ti GUMIL Metro Manila: Nob. 10

Maangay ti miting ti GUMIL Metro Manila, ti Gunglo Dagiti Mannurat nga Ilokano iti Kamanilaan, itoy Nobiembre 10 babaen ti panagsangaili da agkaingungot a Martin ken Teresita Rochina iti Lot 5, Block 75, Blue Boz St., Rizal, Makati City, kas impakaammo ni RTC Judge Vivencio S. Baclig (Ret.), presidente ti gunglo.

Mapagpapatangan iti nasao a miting ti pannakarmabak ti maika-47 nga anibersario ti GMM inton Disiembre. (Sherilyn Viloria)


(Naipablaak iti Nobiembre 12, 2012 a bilang ti Bannawag.)

Baclig, nailayon a presidente ti GMM

Nailayon ni retirado a Hues Vivencio S. Baclig a presidente ti GUMIL Metro Manila, gunglo dagiti mannurat nga Ilokano iti Metro Manila para iti tawen 2012-2014.

Tubo iti Cabugao, Ilocos Sur, kolumnista iti Bannawag ni Baclig ken nagpapaay iti Regional Trial Court iti Quezon City.

Dagiti dadduma a napili nga opisial: Ariel S. Tabag (bise-presidente), Sherilyn Viloria (sekretaria); Eden Bulong (tesorera); Ross Deritt (auditor); Maria Rosa A. Cabie (PRO).

Dagiti napili a direktor: Angelo “Eloy” Padua; Joy Dilan; Benn Cabacungan; Virgilio Tabugadir; Leonardo S. Fagaragan; Martin Rochina; ken Simeon Berroy.

Dinutokan met ni Baclig ni Juan S.P. Hidalgo, Jr. ti Rosales, Pangasinan a kas presidential adviser, ken ni Honor Blanco Cabie ti Pinili, Ilocos Norte a kas presidential consultant.

Kalpasan ti panagsapata dagiti opisial, pinagsapata met ni Baclig dagiti dua a baro a kameng ti gunglo, da Melogiane Salting ken Aileen Serrano, agpada a mannurat iti Bannawag.

Naangay ti eleksion/miting iti Maki Haus, Quezon City idi Mayo 20, iti panangsangaili ni Padua, FAMAS president. (M.R.A. Cabie)

(Naipablaak iti Bannawag, Hunio 4, 2012 a bilang.)

Eleksion ti GMM, Mayo 20

Maangay ti eleksion ti GUMIL Metro Manila, ti gunglo dagiti mannurat nga Ilokano iti Kamanilaan, itoy a Mayo 20, 2012 iti Maki House iti Timog Ave. corner Scout Tuazon, Quezon City babaen ti panagsangaili ni FAMAS President ken mannurat iti Bannawag Angelo “Eloy” Padua, kas impakaammo ni Retirado a Hues Judge Vivencio S. Baclig, presidente ti gunglo.

Para iti dadduma nga impormasion, ag-text iti 0918-682-6330.

(Naipablaak iti Bannawag, Mayo 21, 2012 a bilang.)