Reynaldo A. Duque, 67

Pimmusay idi Abril 8 ni mannurat iti Bannawag Reynaldo A. Duque, 67, tubo iti Bagani Ubbog, Siudad ti Candon ngem agnaeden iti Parañaque City ken Tagaytay City, gapu iti kidney failure.

Maibilang ni RAD a maysa kadagiti kangrunaan a mannurat iti panawenna, saan laeng nga iti Ilokano no di pay ket iti Filipino ken iti Ingles. Maibilang pay a kaaduan iti naawat a pammadayaw kadagiti amin a mannurat iti Filipinas iti ginasut a literary award a naipaay kenkuana a pakairamanan ti Hall of Fame manipud iti Carlos Palanca Memorial Awards for Literature ken ti Centennial Prize (Umuna a Gunggona) iti benneg ti epiko (“Candon”).

Nagpaay a presidente ti GUMIL Filipinas (1991-1993) ken umuna nga Ilokano a nagpaay nga Editor-in-Chief ti Liwayway, ti kangrunaan a magasin dagiti Tagalog. Naipaay kenkuana ti Gawad Pambansang Alagad ni Balagtas manipud iti UMPIL idi 2001 ken ti Pedro Bucaneg Award manipud iti GUMIL Filipinas idi 2003.

Mannurat agingga iti maudi nga angesna, imbatina a kas maudi a ruknoyna kadagiti padana nga Ilokano ti ababa a nobelana a “Saan a Rosas Amin nga Ayat, Maria Emmanuelle” a maipabpablaak ita iti Bannawag.


(Naipablaak iti Bannawag, Abril 22, 2013 a bilang.)

*Nakamassayag ti bangkay ni Apo Duque iti Holy Trinity Memorial Chapel, Sucat, Paranaque City. 

Maiwayat ti necrological service nga idaton ti GUMIL Filipinas, ti gunglo dagiti mannurat nga Ilokano, ken ti UMPIL, Unyon ng mga Manunulat sa Pilipinas, itoy Abril 13, 2013 iti alas 8:30 iti rabii. 

Maiwayat met ti cremation iti Abril 14, 2013.

2 a Soneto

2 a Soneto
(para ken ni reynaldo a. duque, 1945-2013)

1
garong napumpunnon baar inka
inserrek ‘di kapigpigsaam pay,
iti pasnek pammatim nga adda
maibatim a pamigsa awan sarday.

ita limnek ti initen iti
nagsursuratam ti nobela ken
dadduma pay, pagtangsit ti puli
agyaman ‘ti inka impempempen.

nagun-odmo a pammadayaw, ay!
iggem kapadam a nagsidsidat’
sinanglaw ken pakbet – ay! linglingay
pay kakailiam a managayat.

‘tay badangmo’t kultura, wen, dakkel,
agyamankam gapu’t matam, bael.

2
inkurkuribotmo saanmo man
binukbukodan ket ‘diay naganda
ken sudin ilokano a kadua
imbambandom inka nagnagnaan.
kadagiti inka inkurkur-it
immanges dagiti nakauldag
nga addaan pateg ditoy a biag,
rikna pagliplipiasan ‘tay sam-it.
iti wasnay kalgaw, nepnep sadiay
nakasaganat’ pontinpen kas man
imbudona’t panagrissik rikna,
inar-aramat a pangmurmuray.
‘iti insuratmo maiyaw-awan
awan, adda imbatim a pigsa.

--HONOR BLANCO CABIE

No Isut’ Pakatayak, Awatek…

No Isut’ Pakatayak, Awatek…
(ken ni aydol rad)

Iti pampannagnak met iti tugot ni Bucaneg
A nagtayaktakam, nagrimatan ti bituenmo
Nariknak ti kaadda ti pusom, ti kararuam
Kadagiti kas kaniak a saringit laeng.

Impatakdermo ti bukodmo a pedestal
Iti dayta a lubong; narigat a mapataran
Dagiti gapuanam ngem nagtalinaed
Dagiti dapanmo iti daga.

Mabilbilang iti ramay dagiti kanito
A nagtugmok dalanta kadagiti  innadal
Ngem limed a dinanonnak iti pagtaengak
Kadagiti naruay a sinuratmo.

Adda aripapa iti kaunggak iti pannakaikari
Dagitoy a binatog. Ngem ad-adda a malunagak
No uray sangkapirgis man laeng a daniw
Ket dika maisagutan…

Iti naudi a panagsarakta iti kombension
Ad-adda a bimmangon ti umel a panagraem
Idi inkarigatam nga insawang: no isut’ pakatayak
Awan maaramidak ta naikumitkon ti bagik…

Anian, ta uray saanen nga ipalubos ti salun-atmo
Ti agbiahe a mangibisik iti aglaplapusanan a sirib
Ngem impettengmo ti immay nagiburay
Ta isu gayamen ti maudi a panagdidinnakulap.

Napankan, ngem saanto a pulos nga agkudrep
Ti segden a ginangtam iti barukongmi;
Palubosandaka ngaruden, Dios ti mangkibin kenka
Ket agingga manen iti sumaruno a panagkikita.

--JOBERT M. PACNIS

*aydol rad = Reynaldo A. Duque, 1945-2013

Nakaranraniag Dagiti Tugot

Nakaranraniag Dagiti Tugot
(para ken ni RAD)

Diak man naisiray ti panagtubom
Iti kinelleng dagiti daniw
Ngem mariknak ti pudot panangisakitmo
Iti bukudko a dila
Kadagiti imparangkapmo a libro
Tapno sakduenmi ti sirib
A kinupikopam.

Tannawaganka iti napanayag a paraiso
Buyaek ti panagudongmo
Nga umadayo ditoy tapoktapok a plumak.

Diak sardayan nga idallang ken idaniw
Dagiti kutkutonen a balligim
Uray nagtabonen ti initmo
Sumingsingisingkami met
Nga adipen ti bukudmo a dila.

Ay, anian a naggasatka
Sika a bannuar ti panawen
Ta nakadardarang dagiti tugotmo.

--RONNIE ES. AGUINALDO

*RAD = Reynaldo A. Duque, 1945-2013

5th Premio Duque, naluktan

Ipakaammo ti Secretariat ti Premio Reynaldo A. Duque a silulukaten ti Salip iti Sarita ti 5th Premio Duque. Naipanagan ti award-giving body ken ni mabigbig a mannurat Reynaldo A. Duque, tubo iti Siudad ti Candon, iti panangesponsor ni Teresita R. Duque a kaingungotna.

Dagiti pagannurotan:

1. Silulukat ti salip kadagiti Ilokano a mannurat nga agdama ken dati a kameng ti GUMIL Metro Manila ken GUMIL Candon, (Ilocos Sur) nga agindeg iti Filipinas wenno addan iti ganggannaet, malaksid kadagiti kameng ti Bannawag, wenno kakabagianda.

2.Agatiddog ti sarita iti 10-15 a panid, naimakinilia wenno naikompiuter iti doble espasio iti 8-1/2 x 11 a coupon bond. Maysa laeng a sarita ti mabalin nga isalip ti tunggal mannurat.

3. Nasken a parbo a nagan ti maikabil iti manuskrito a pakisalip. No ipatulod babaen ti e-mail: dua nga MS Word document files ti idatag. Umuna, ti sarita a pakisalip. Maikadua, ti parbo ken pudno a nagan ti autor, pakasaritaan ti biag ti autor, ken ti sertipikasion ti pammigbig ti gunglo (GUMIL Metro Manila ken GUMIL Candon) a kameng wenno pagkamenganto ti mannurat.

4. No ipatulod babaen ti koreo: uppat (4) a kopia ti idatag ken pakuyogan ti entry iti narikpan a sobre a nakailanadan ti paulo ti sarita ken ti parbo a nagan ti autor. Laonen ti sobre ti ladawan, naisurat a kabibiag ti autor, kasta met ti pudno a naganna. No iti e-mail, iturong iti asseng.tabag@gmail.com. No iti koreo, ipatulod iti Premio Reynaldo A. Duque Secretariat, c/o Bannawag, Manila Bulletin Publishing Corporation, Muralla cor. Recoletos Sts., Intramuros, 1002 Manila.

5. Makaammo ti makisalip a mangpili iti tema ti saritana, ngem masapul a mainaig iti kultura ni Ilokano.

6. Nasken nga orihinal, di pay naipablaak, di naadaw iti ania man a naipablaaken a sinurat, di naipatarus manipud iti sabali a lengguahe, di pay nangabak iti ania man a salip iti panagsurat iti sarita, ti sarita nga isalip, ken bukod a gapuanan ti autor ti isalipna a sarita.

7. Agbalin a kukua ti sponsor dagiti mangabak a sarita. Maikkan pay ti sponsor iti karbengan a mangedit, mangatur ken mangipablaak iti libro, magasin wenno periodikal a pilina nga awan ti sungsungbatanna iti autor. Agtalinaed ketdi ti copyright iti autor.

8. Saan a mabalbaliwan ti pangngeddeng dagiti hurado— malaksid no maduktalan kalpasanna a linabsing ti mannurat ti Pagannurotan Bilang 6. Iti dayta a panaglabsing, maibabawi ti gunggonana ket saanton a mapalubosan ti autor a makisalip iti ania man a pasalip nga esponsoran ti Premio Reynaldo A. Duque.

9. Dagiti gunggona: First Prize, $200.00; Second Prize: $150.00; ken, Third Prize, $100.00. Addanto sertipiko ti pammigbig kadagiti mangabak. Maikkatto ti 10 a porsiento (10%)  iti tunggal premio ket maipan daytoy iti pundo ti GUMIL Metro Manila.

10. Nasken a maawat ti pakisalip iti e-mail wenno iti koreo saan a naladladaw ngem tengnga ti rabii ti Hulio 31, 2012.

11. Maitedto dagiti gunggona iti maysa a pasken nga angayen ti sponsor inton Oktubre 29, 2012 iti Parañaque City wenno idiay Royale Tagaytay Estates, Metro Tagaytay, Cavite.

(Naipablaak iti Bannawag, Mayo 21, 2012 a bilang.)