Maika-50 nga Anibersario ti GUMIL Ilocos Sur, maplano

Rugian ti GUMIL Ilocos Sur (GIS) a planuen ti pannakarambak ti Nabalitokan nga Anibersariona inton 2014 iti maysa nga special meeting dagiti opisialna a maangay inton Mayo 5, 2013 iti pagtaengan da agkaingungot a Rudy Llanes ken Mercedes Tabbada-Llanes iti Brgy. Anonang Mayor, Caoayan, Ilocos Sur.

Ni Mrs. Llanes ti agdama a tesorera ti GUMIL Ilocos Sur ken maysa kadagiti nakipagbangon a kameng ti gunglo idi 1964.

Maipamaysa a mataming iti miting ti pannakabuangay dagiti nadumaduma a komite a makipagsayangkatto itoy naindaklan a pasken ti GIS a binangon daydi Dios-ti-aluadna a Pelagio A. Alcantara idi Oktubre 4, 1964.


(Naipablaak iti Bannawag, Mayo 13, 2013 a bilang.)

Dua a libro ti GIS, maisagsagana

Dua a libro iti literatura ti isagsagana ita ti GUMIL Ilocos Sur (GIS) a manamnama a yalnagna inton 2014 a panangrambak ti gunglo iti nabalitokan nga anibersariona.

Kinuna ni Jerry B. A. Malamion, sekretario ti GIS, a maawagan dagitoy iti Lakasa, antolohia dagiti naisangayan a sarita dagiti mannurat a patanor ti Ilocos Sur, ken Kinanalmeng, antolohia dagiti napili a putar dagiti mararaem a mannaniw ti probinsia.

Napusgan da Arsenio B. Cortez, Benjamin P. Pacris, ken Dr. Ed H. Angco a kas editor dagiti dua a libro.
Mairaman iti listaan dagiti mannurat iti sarita a mayantolohia dagiti premiado a gapuanan da Jose A. Bragado, Reynaldo Duque, Fredelito Lazo, Danilo Antalan, Pelagio Alcantara, Antonio Encarnacion, Agustin D.C. Rubin, Crisostomo Ilustre, Bernardo Tabbada, Abraham Pasion, Solomon Benitez, Federico Ilac, Jr., Guillermo Concepcion, Jaime Raras, Jovito Amorin, Lorenzo Tabin, Benjamin Pacris, Arsenio Cortez, Virgilio Naungayan, Dr. Onofrecia Ibarra, Rodolfo Tabaco, Martin Rochina, Salvador Espejo, Danilo Bautista, Amor Cabaccang, kdp.

Iti libro ti dandaniw, umuna iti listaan da Dr. Godofredo Reyes, Leona Florentino, Leon Pichay, Dr. Marcelino Foronda, kdp. (Mercedes Tabbada-Llanes)


(Naipablaak iti Bannawag, Nobiembre 19, 2012 a bilang.)

Angco, nailayon a pangulo ti GIS

Nailayon ni Dr. Ed H. Angco a presidente ti GUMIL Ilocos Sur (GIS) iti eleksion ti gunglo a nakapilian met ni Danilo Antalan a bise-presidente iti umuna a gundaway.

Naangay ti eleksion idi Dis. 17 iti maysa a beach resort iti Brgy. Puerto, Santo Domingo, Ilocos Sur kas paset ti “Rambak Paskua ti Pamilia GIS.” Ni Arsenio Cortez, presidente ken akinkukua ti Iloko Heritage Channel, ti nagakem a chairman ti komite ti eleksion.

Dagiti dadduma a nailayon: Mercedes T. Llanes, tesorera; Aurelia T. Tadena, kabadangna a tesorera; Rodolfo Tabaco, auditor; Romeo Basuel, business manager ken Mancielito Tacadena, P.R.O. Ni Jerry B. A. Malamion ti baro a sekretario.

Nagtalinaed met a direktor da Charlie Pinto, Rudy Taan, Edward Antonio, ken Marcelino Soria. Kappili (a direktor) da Solomon Benitez, Virgilio Naungayan, Edwin Ruiz, Yolanda Ablang, Lydia Liclican ken Rizalde del Rosario.

Nagtalinaed met a mamalbalakad da Arsenio Cortez, Benjamin Pacris, Crisostomo Ilustre ken Fiscal Dedicacion Banua-Duldulao.

Agtakem dagiti baro a lider ti GIS iti tallo a tawen (2012- 2014).

(Naipablaak iti Bannawag, Enero 9, 2012 a bilang.)

Aldaw ti GUMIL Ilocos Sur 2011, marambakan

Narugianen ti pannakaisagana ti pannakarambak ti Aldaw ti GUMIL Ilocos Sur 2011, kas pammadayaw iti pundador ken umuna a presidente daytoy a gunglo dagiti mannurat nga Ilokano ti Ilocos Sur, daydi Dios-ti-aluadna a Pelagio A. Alcantara.

Maangay ti pasken iti Siudad ti Vigan, Ilocos Sur inton Oktubre 4, aldaw a pannakalukat ti agmakalawas a selebrasion ti maika-47 nga anibersario ti GIS a nabangon idi 1964.

Mainaig itoy, nadutokanen dagiti kangrunaan a komite a mangasikaso iti selebrasion a pakaibilangan dagiti sumaganad:

Komite iti panagplano nga ipanguluan da Jerry B. A Malamion ken Arsenio Cortez ken pagkamengan da Ben Pacris, Solomon Benitez, Danny Antalan, ken Virgilio Naungayan;

Komite iti pakalaglagipan a programa nga idauluan da Mercedes T. Llanes ken Aurelia T. Tadena; miembro met da Jojie Guzman, Romy Basuel, Edward Antonio, Mar Soria, Charlie Pinto, ken Rudy Tabaco.

Adda met komite iti pammadayaw nga ipanguluan da Mancielito Tacadena ken Rodie Taan ken pagkamengan da Nepo Benitez, Jr., Robert Alicias, Edwin Ruiz, Emmanuel Ablang, ken Eduardo Altizen. (GIS)

(Naipablaak ti paset daytoy iti Bannawag, Agosto 1, 2011 a bilang.)