Salip iti Sarita ti 15th AMMAFLA

Adtoy ti kompleto a pagannurotan ti Salip iti Sarita ti Maika-15 nga AMMA Foundation Literary Awards (AMMAFLA) nga imatonan da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii) a nairanta nga agpaay kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada”:

1. Aggibus ti salip iti Pebrero 28, 2013.

2. Agpaay laeng ti salip kadagiti agdadamo a mannurat iti Ilokano. Iti daytoy a pasalip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Oktubre 15, 2012 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times Roman Medium 12 pts. iti computer), ken adda espasio wenno margin a maysa a pulgada iti amin nga igid ti papel.

5. Maysa laeng a sarita ti mabalin nga isalip ti tunggal autor.

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman e-mail address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

8. Ipatulod ti pakisalip babaen ti koreo wenno personal nga idatag iti daytoy nga adres: Short Story Writing Contest, 15th AMMAFLA, c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Pebrero 28, 2013. Saan a mairaman iti salip ti entry a maawat kalpasan dayta a petsa.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti sabali a gunggona, no kasapulan.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti Pagannurotan Blng. 2 ken/wenno 6, maibabawi ti premiona ken mapawilanton a makisalip iti ania man a pasalip ti AMMAFLA.

(Naipablaak iti Bannawag, Oktubre 22, 2012 a bilang. 

Nangabak iti 1st ALVIYA ken 14th AMMAFLA, naammuan

Maysa nga announcer iti radio ken maysa a mangal-ala iti kinamaestro ti nangyalat iti Umuna a Gunggona iti Salip iti Sarita ti 1^st ALVIYA Literary Foundation, ken Salip iti Sarita Para Kadagiti Agdadamo a Mannurat ti 14^th AMMA Foundation Literary Awards, kas panagsaganadda.

Dagiti nangabak iti 1^st ALVIYA, kas impakaammo ti ALVIYA Secretariat nga idauluan ni Dr. Freddie P. Masuli, agdama a direktor ti GUMIL Filipinas:

Umuna a Gunggona: Danny B. Antalan, tubo iti San Nicolas, San Esteban, I.S. ngem agnaeden iti Siudad ti Candon. Pinangyalat ni Antalan, reporter/announcer iti DZTP Radio Tirad Pass, iti kangrunaan a gunggona ti saritana a “Dagiti Nangabak.”

Maikadua: Daniel L. Nesperos (“Dagiti Sabong ni Reyna Padaya”). Tubo iti San Lorenzo, San Nicolas, Ilocos Norte, maysa a book designer ni DLN ken, kas kunana, naayat nga agmulamula iti natnateng.

Maikatlo: A. Pascual Jose, tubo iti Brgy. 56, Bacsil North, Laoag City (“Idi Agresidente ni Oppong iti White Plains Subdivision”) ken kameng ti Advertising Dept. ti dati a Liwayway Publishing, Inc.

Agpapada met laeng da Antalan, Nesperos ken Pascual a nangab-abaken iti Palanca Awards.

Ti Salip iti Sarita ti ALVIYA ti maysa laeng kadagiti proyekto ti ALVIYA Literary Foundation. Ni Alex Vicente Yadao ti New York City ken Libertad, Abulug, Cagayan ti nangbangon iti ALVIYA Literary Foundation iti panggep a tumulong iti pannakasaluad ken pannakaparang-ay ti Literatura Ilokana babaen dagiti pasalip iti panagsurat, panangangay kadagiti seminar iti panagsurat, ken panagilibro kadagiti piesa ti literatura.

Dagiti naghurado: Cles B. Rambaud ti Bannawag, chair; dagiti kameng: dati nga Editor ti Bannawag Dionisio S. Bulong ken Palanca Awardee Roy V. Aragon.

Adtoy met dagiti nangabak iti 14^th AMMAFLA:

Umuna a Gunggona: Christian Dave Pascua Cajigal, agtawen iti 18, agad-adal iti Mariano Marcos State University-College of Teacher Education ken anak da Crisologo Cajigal ken dati nga Evangeline Pascua. Pinangyalat ni Christian Dave, tubo iti Barangay Badio, Pinili, Ilocos Norte, iti kangrunaan a gunggona ti saritana a “Ni Nana Solenn.”

Maikadua (“Puso ti Maysa a Maestra”): Michelle Gamueda-Rafanan, tubo iti Parioc 1^st, Candon City ken mangal-ala iti kinamaestra iti North Luzon Philippines State College iti Siudad ti Candon; duan ti bungada ken Amado G. Rafanan, da Michael Jester ken Michaella.

Maikatlo (“Talon”): Dexter Marin Fabito, agpapaay a kagawad iti barangayda a Balingit iti Pamplona, Cagayan; nagturpos iti BSIT iti Cagayan State University-Sanchez Mira, Cagayan; ken tallon ti bungada ken kaingungotna a Romaly, da Zedrix John, Zandra Nicole ken Zachary Drexler.

Dagiti esponsor: Amado ken Gloria Yoro, Francisco ken Aurora T. Ponce, ken Fred ken Cherry Quibol, agpapada nga agindegen iti Hawaii.

Dagiti naghurado: Neyo Mario E. Valdez, In-House Editor ti Rex Bookstore, Inc., chair; kameng da Juan Al. Asuncion ti Bannawag ken Noli S. Dumlao, drama scriptwriter iti DZRH.

Mapadayawan dagitoy a nangabak a mannurat bayat ti Maika-44 a Komperensia Nasional ti GUMIL Filipinas inton Abril 20-22, 2012 iti Don Mariano Marcos Memorial State University, Bacnotan, La Union.

(Naipablaak iti Bannawag, Abril 23, 2012 a bilang.)

Bonus a Pasalip iti 10th RFAAFIL, Mai-Facebook

Silulukaten ti bonus a pasalip, ti Salip iti Daniw a mairuknoy iti RFAAFIL, kas paset ti pannakarambak ti maika-10 a tawen ti RFAAFIL. Maaramat ti opisial a Facebook account ti RFAAFIL - www.facebook.com/rfaafil - daytoy a pasalip.

Dagiti pagannurotan:

1. Silulukat ti salip kadagiti mannaniw iti Iluko.

2. Agatiddog ti daniw iti di ab-ababa ngem 20 a linia. Mabalin a maysa wenno dua a daniw ti isalip ti kada mannaniw. Masapul nga orihinal ken di pay naipablaak iti uray ania a magasin, pagiwarnak wenno Internet.

3. Nawaya ti mannaniw a mangsurat iti estilo wenno pannakasukog ti daniwna. Ngem nasken a ti daniw ket mairuknoy iti RFAAFIL.

4. Adda karbengan ti esponsor a mongiposte a dagus iti maisalip a daniw iti Facebook account ti RFAAFIL ken mangilibro wenno mangipablaak kadagiti mapadayawan a daniw iti magasin wenno iti Internet (rfaafil.com) nga awan ti sungsungbatanna iti mannaniw. Agtalinaed ketdi ti copyright iti autor.

5. Mabalin nga aramaten ti mannaniw ti pudno a naganna wenno aglinged latta iti parbo a naganna. No agaramat ni mannaniw iti parbo a nagan, saanto a maibutaktak ti kinaasinona malaksid no mapadayawan ti daniwna.

6. Ti secretariat ti RFAAFIL ken dagiti reader ti Facebook ti RFAAFIL ti mangpili kadagiti mapadayawan a daniw.

7. Dagiti gunggona: Umuna, P2,500.00 ken sertipiko; Maika-2, P2,000.00 ken sertipiko; Maika-3, P1,500.00 ken dua a consolation prize a sag-P1,000.00 ken sertipiko. Mabalin a mangabak ni mannaniw iti dua a premio. Maipaay met ti Reader’s Choice Award iti daniw a magustuan dagiti Facebook readers ken makapuntos iti adu a LIKE. Umawat ti mapadayawan iti P2,500.00 ken sertipiko.

8. Mapadayawanto dagiti mangabak inton kalgaw ti 2012.

9. Ipatulod ti pakisalip babaen ti e-mail. Iturong iti rfaafil@hotmail.com ken admin@rfaafil.com. Wenno nasaysayaat no ipaskil iti message board wenno iti wall ti Facebook ti RFAAFIL.

10. Nasken a mai-e-mail wenno maiposte iti Facebook ti RFAAFIL ti pakisalip iti di naladladaw ngem Enero 31, 2012. Nasaysayaat no nasapsapa a maidatag ti pakisalip.

(Naipablaak iti Bannawag, Enero 2, 2012.)