Bulan ti Literatura Dagiti Ilokano, rambakan ti GF

Rambakan ti GUMIL Filipinas (GF), ti kadakkelan a gunglo dagiti mannurat nga Ilokano iti sangalubongan, ti Abril a kas “Bulan ti Literatura Dagiti Ilokano,” kas sagudayen ti Presidential Proclamation No. 26 idi 2001, babaen ti panangiwayatna iti “Dap-ayan 2014,” ti Maika-46 a Nailian a Kombension ti GF iti daytoy Abril 18-20, 2-14 iti Cabicungan Inn, Centro 05, Claveria, Cagayan (nayakar manipud iti Sanchez Mira, kas immunan a naipakaammo).

Sangailien daytoy ti GUMIL Cagayan (GC) nga idauluan ni GC Pres. Freddie Pa. Masuli, kinuna ni Arthur P. Urata, Sr., presidente ti GF, a manamnama a dumar-ay saan laeng a dagiti delegado manipud kadagiti sanga ti GF iti Filipinas no di pay ket iti ballasiw-taaw, nangruna ti GUMIL Oahu ken GUMIL Maui.

Kas kadagiti kallabes a nailian a kombension, aglektiur dagiti kangrunaan a mannurat nga Ilokano maipanggep iti panagsurat iti sarita, daniw, nobela, salaysay, literatura para kadagiti ubbing, ken maipanggep iti Ortograpia Dagiti Ilokano ken iti panagipatarus.

Iti pay nasao a kombension a mapadayawan dagiti mannurat a nangabak kadagiti nadumaduma a salip iti panagsuratan ken dagiti mannurat a nakaipaay iti naisangsangayan a kontribusion iti panagdur-as ti Literatura dagiti Ilokano, mayalnag dagiti libro, mabalangatan ti 2014 Mrs. GUMIL Filipinas, ken maipabuya/maipangngeg dagiti oral a kannawidan ken sala ken samiweng dagiti Ilokano.

Para iti rehistrasion, P600 ti bayadan dagiti regular a delegado, P500 kadagiti adda ID-na a senior citizen, ken P400 kadagiti adda ID-na nga estudiante (malaksid iti eskuela graduado). Maaramat ti registration fee iti kanen ken pagturogan, sertipiko, kdp. a kasapulan iti 3 nga aldaw ken dua a rabii a kombension.

Para kadagiti saludsod mainaig iti taripnong, ag-text iti 09489864481 (FPM) ken 09277927913 (APU).
Mainaig itoy, maipakaammo kadagiti amin nga opisial ti GF a maangay ti special meeting itoy Marso 30, 2014 iti Narvacan, Ilocos Sur babaen ti panagsangaili da agkaingungot a Dionisio ken Eden Bulong. (RVA)


(Naipablaak iti Bannawag, Marso 24, 2014 a bilang.)

“Daniw Ilokandia,” maangay iti Currimao inton Marso 8

Maangay ti “Daniw Ilokandia 2014” inton Marso 8 iti Doña Josefa Edralin Marcos Elementary School, Currimao, Ilocos Norte iti panangesponsor ti National Commission for Culture and the Arts (NCCA), DepEd Ilocos Norte, GUMIL Ilocos Norte ken ti Bannawag, kas paset ti “Taboan 2014” wenno ti panaguummong dagiti mannurat iti pagilian.

Iti daytoy a tawen, maipamaysa iti “Daniw Ilokandia 2014” iti pannaka-workshop dagiti daniw a para ubbing. Mayawis met ti nasao a workshop kadagiti mangisursuro iti elementaria iti Maikadua a Distrito ti Ilocos Norte ken kadagiti kameng ti GUMIL Ilocos Norte. Libre ti registration fee.

Makiddaw iti tunggal partisipante (a mangisursuro) ti panangitugotna iti sinuratna a daniw. Maysa laeng a daniw ti idatag ti tunggal partisipante; agatiddog met ti daniw iti 4-5 nga stanza a ti tunggal stanza, buklen ti uppat a linia wenno saan, mabalin met mangidatag iti uppat a daniw a ti tunggal daniw, buklen ti uppat a linia.
Maiprinta met ti daniw (wenno dagiti daniw) iti maysa a bond paper ken mai-reproduce iti 8 a kopia. Saan nga ilanad ti partisipante ti pudno a naganna a kas autor ti/dagiti daniw; ketdi, agusar iti parbo a nagan. Maidatagto dagitoy a daniw iti kaaldawan ti workshop.

Para iti nayon nga impormasion, makiuman ken ni Elizabeth M. Raquel, Workshop Director.


(Naipablaak iti Bannawag, Marso 3, 2014 a bilang.)