Nailian a Bulan ti Literatura ken Bulan ti Literatura nga Ilokano, rambakan dagiti mannurat nga Ilokano

Rambakan dagiti mannurat nga Ilokano ti bulan ti Abril a kas Nailian a Bulan ti Literatura (National Literature Month wenno Buwan ng Panitikang Filipino), ken kas Bulan ti Literatura Dagiti Ilokano babaen ti Dap-ayan 2015, ti Maika-47 a Nailian a Kombension ti GUMIL Filipinas, ti kadakkelan a gunglo dagiti mannurat nga Ilokano iti Filipinas ken ballasiw-taaw.

Maiwayat ti nasao a kombension iti daytoy nga Abril 17-19, 2015 iti Sala B, Balay Expo Centro, Araneta Center, Cubao, Quezon City iti panangsangaili ti GUMIL Metro Manila, ken iti pannakitinnulong ti National Commission for Culture and the Arts, Manila Bulletin Publishing Corp., ken Gerry Roxas Foundation.

Mainaig daytoy a parambak iti pinirmaan ni Presidente Benigno S. Aquino III idi Pebrero 10, 2015 a Proklamasion Bilang 968 a nangideklara iti bulan ti Abril a kas Nailian a Bulan ti Literatura, ken iti pinirmaan ni Presidente Gloria Macapagal Arroyo idi Abril 16, 2001 a Proklamasion Bilang 26 a nangideklara iti bulan ti Abril a kas Bulan ti Literatura nga Ilokano.

Ni National Artist Virgilio S. Almario, agpapaay pay a pangulo ti Komisyon sa Wikang Filipino, ti kangrunaan nga agsarita.

Babaen ti tema a “Ti Akem ni Gumiliano iti Kagimongan Dagiti Ilokano,” agsarita met ni Pedro Bucaneg awardee ken Gawad Pambansang Alagad ni Balagtas Juan S.P. Hidalgo, Jr.

Manamnama a dar-ayan ti sumurok-kumurang a 180 a mannurat, mannursuro ken estudiante nga Ilokano, tamingen dagiti napusgan nga agsarita a pannakabagi dagiti nadumaduma a chapter ti GUMIL dagiti akem ken gapuanan ti GUMIL ken dagiti mannurat nga Ilokano kadagiti probinsia iti Ilokandia ken kadagiti lugar iti ballasiw-taaw a nagdappatan ni Ilokano.

Tampok pay iti kombension ti pannakayawat ti gunggona dagiti mannurat a nangabak kadagiti pasalip iti panagsuratan, pannakapadayaw dagiti mannurat a nakaibinglay iti naisangsangayan a kontribusion iti Literatura dagiti Ilokano, ken pannakaiwayat ti eleksion ti gunglo. (Roy V. Aragon)

(Naipablaak iti Bannawag, Abril 20, 2015 a bilang.)

National Artist Almario, kangrunaan nga agsarita iti Dap-ayan 2015 dagiti mannurat nga Ilokano

Ni National Artist Virgilio S. Almario, agpapaay pay a pangulo ti Komisyon sa Wikang Filipino, ti kangrunaan nga agsarita iti Dap-ayan 2015, ti Maika-47 a Nailian a Kombension ti GUMIL Filipinas, ti kadakkelan a gunglo dagiti mannurat nga Ilokano iti Filipinas ken ballasiw-taaw, a maangay iti daytoy Abril 17-19, 2015 iti Sala A, Balay Expo Centro, Araneta Center, Cubao, Quezon City.

Babaen ti tema a “Ti Akem ni Gumiliano iti Kagimongan Dagiti Ilokano,” agsarita met ni Pedro Bucaneg awardee ken Gawad Pambansang Alagad ni Balagtas Juan S.P. Hidalgo, Jr.

Manamnama a dar-ayan ti sumurok-kumurang a 150 a delegado, tamingen dagiti napusgan nga agsarita a pannakabagi dagiti nadumaduma a chapter ti GUMIL dagiti akem ken gapuanan ti GUMIL ken dagiti mannurat nga Ilokano kadagiti probinsia iti Ilokandia ken kadagiti lugar iti ballasiw-taaw a nagdappatan ni Ilokano.

Tampok pay iti kombension ti pannakayawat ti gunggona dagiti mannurat a nangabak kadagiti pasalip iti panagsuratan, pannakapadayaw dagiti mannurat a nakaibinglay iti naisangsangayan a kontribusion iti Literatura dagiti Ilokano, ken pannakaiwayat ti eleksion ti gunglo.

Daytoy Dap-ayan 2015 wenno tinawen a kombension ti kangrunaan nga aktibidad ti GUMIL Filipinas a pangrambak iti Abril kas Bulan ti Literatura nga Ilokano kas sagudayen ti Proklamasion Bilang 26 nga indeklara ni dati a Presidente Gloria Macapagal Arroyo idi Abril 16, 2001.

Iti sabali a bangir, pinirmaan met ni Presidente Benigno S. Aquino III itay Pebrero 10, 2015 ti Proklamasion Bilang 968 a nangideklara iti bulan ti Abril a kas Nailian a Bulan ti Literatura (National Literature Month wenno Buwan ng Panitikang Filipino). (Mighty C. Rasing)


(Naipablaak iti Bannawag, Marso 9, 2015 a bilang.)

Dap-ayan 2015 ti GF, sagsaganaan ti GMM

Agsagsaganan ti GUMIL Metro Manila (Gunglo Dagiti Mannurat nga Ilokano iti Kamanilaan) iti panangsangaili ti gunglo iti Dap-ayan 2015, ti Maika-47 a Nailian a Kombension ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw).

Mainaig itoy, maangay ti miting ti GUMIL Metro Manila, inton Pebrero 22, 2015, 9 A.M. ti panangsangaili ni mannurat ti Bannawag Rhea D. Berroy iti pagtaengan daytoy iti Maceda St. corner Loyola, Sampaloc, Manila para iti nasao a panggep.

Mainaig itoy, makiddaw kadagiti interesado a dumar-ay iti nasao a kombension a makiuman dagiti kameng ti GUMIL Filipinas wenno GUMIL chapters iti presidente ti pagkamenganda a chapter idinto a dagiti saan a kameng, makiumanda met ken ni Ariel S. Tabag, presidente ti GMM, iti asseng.tabag@gmail.com wenno 0921 602 1938.

Mainaig pay iti daytoy, ipakaammo ti GUMIL Filipinas Awards Committee nga agingga laeng iti Marso 15, 2015 ti panagawatda iti nominasion para iti Pedro Bucaneg Award, Leona Florentino Award, ken Don Cornelio Valdez Award. Ipaw-it ti nominasion iti rvaragon@gmail.com.


(Naipablaak iti Bannawag, Pebrero 23, 2015 a bilang.)