“Padapadakam’ a Siraragsak”
Ni Gobernador Imee R. Marcos ti Ilocos Norte bayat ti panangkabkablaaw kenkuana ni nanangna, ni sigud a First Lady ken agdama a diputado ti Maikadua a Distrito ti Ilocos Norte Imelda R. Marcos iti panagkasangay daytoy idi Nob. 12. (Ladawan: Ricardo Raguini/ Teksto: Mancielito S. Tacadena)
ASINO ti di makaam-ammo ken ni Imee R. Marcos? Itayagna man ti imana.
Itayagna man ti imana.
Siempre, awan la ketdi ti mangitayag.
Wen, ta mangrugi itoy a lawas, makaduatayon ditoy Bannawag ni Manang Imee, a nairana a gobernador ita ti Ilocos Norte, ken nabayag metten a kolumnista iti maysa a diario iti Kamanilaan.
Nairanta a marugian daytoy kolum ‘toy ipagpampannakkeltayo nga anak ti Amianan (kitaenyonto no madamdama iti panid 10) kalpasan ti panagkasangayna idi Nob. 12— siempre, tapno ad-adda pay nga agbalin a nakalalagip ti panangirugina nga agsurat para iti Bannawag.
Ket gapu ta nadakamattayo met laeng ti panagkasangay ni Manang Imee (a kas kayatna a pangawagtayo kenkuana ditoy Bannawag), malagipmi met ita ti kanta a para iti agkasangay a makankanta no kasta nga adda agkasangay iti Ilocos Norte.
Ket gapu ta daytoy laeng ti kanta nga Ilokano a para iti agkasangay, saan metten a nakakaskasdaaw no uray dagiti taga-sabsabali a probinsia nga ayan dagiti pada nga Ilokano, kayatda metten a kantaen daytoy a “birthday song” a putar ti Ilocos Norte.
Kinapudnona, iti di pay unay nabayag, impadamag kadakami ni Manong Tony Antonio, dati a Provincial Editor ti Manila Bulletin a tubo iti Piddig, Ilocos Norte ngem agnaed itan idiay Michigan, U.S.A., a kinantada daytoy iti panagkasangay ti maysa a gayyemda— a tinabunuan dagiti pupuraw. Tapno maawatan ti kaaduan ti kayat a sawen ti kanta, binunongan ni Manong Tony dagiti dimmar-ay iti naisurat a patarus daytoy iti Ingles, ket kabayatanna, makankanta ti “Padapadakam’” iti Ilokano.
Nadumaduma dagiti bersion ti kanta. Adda Laoag version kada Sarrat version. Isu met laeng ti ayugna; adda laeng nainayon/naikissay a sumagmamano a linia wenno nabaliwan a balikas (depende iti bersion) ngem ti anagna, isu met laeng.
Ibinglaymi man kadakayo ti maysa a bersion— ti bersion ti Pinili (I.N.) nga impadigo ni kumakanta ken mannurat met laeng iti Bannawag, Ludy Ely F. Bravo:
Padapadakam’ a siraragsak
A kumablaaw mangipaduyakyak
Ta nagtengan ti aldaw a pannakayanak
Ni (nagan ti agkasangay) a napnuan gasat.
Balangat a naurnos dagiti sabsabong
Nga umaymi kenka isaad dita ulom (adda mapan mangisaad iti korona iti agkasangay)
Kasta met a yawatmi kenka
‘Toy naindayawan unay a palma (adda mangyawat iti palma wenno sabsabong iti agkasangay).
Sapay iti Dios ta ilayonna koma
‘Ta salun-atmo, biag ken regta
Ken ‘ta pintasmo a nagpaiduma
Nga ap-apalan dagiti kas kenka.
Ti melodiana? Sarungkaranyo man ketdi ti http://www.youtube.com/watch?v=SLTt9QUlqnQ.
Kas kuna dagiti nagatendar iti birthday ni Manang Imee, nakanta met ti “Padapadakam.’”
Wen, a. Saan a kompleto ti panagkasangay iti Ilocos Norte no di makanta ti “Padapadakam’”!
Ket gapu ta saankami met a nakaatendar, isu a kankantaen ita dagiti taga-Editorial ti Bannawag daytoy para ken ni Manang Imee. Ken kas pangabrasa ti Bannawag kenkuana, ken dagiti amin nga agbasbasa iti Bannawag, iti panagbalinnan a paset ti Bannawag family.
Padapadakam’ a siraragsak, Manang Imee!
--Cles B. Rambaud
No comments:
Post a Comment