Linteg a para iti K to 12, mapampanday

Iti baet dagiti protesta kontra iti panangiwayat ti administrasion ni Presidente Aquino iti programa a K to 12, itultuloy ti komite iti Kamara iti basic education and culture a suportaran ti panagbalin a permanente ti 12-tawen a basic education.

Kuna ni Dip. iti Sorsogon Savador Escudero III, chairman iti komite iti basic education and culture, nga agtultuloy ti panagtrabaho ti nabukel a technical working group (TWG) a mamagtitipon iti tallo a gakat a mangipatakder iti 12-tawen a basic education.

Kuna ni Escudero a gagangay laeng nga adda mangtubngar iti pannakaipakat ti programa. Saan ketdi a makaapektar daytoy iti panagtrabaho ti TWG tapno maipaayanen iti linteg ti nasao a programa.

Kuna ni Escudero a masapul a maipasan ti nasao a gakat ta sitatalinaed ti Filipinas iti listaan dagiti pagilian nga addaan iti 10-tawen a programa iti basic education, karaman ti Angola ken Djibouti.

(Naipablaak iti Bannawag, Hunio 18, 2012 a bilang.)

267 nga eskuela, nagipangina iti tuision

Agdagup iti 267 a pribado a kolehio ken unibersidad ti mangipangina iti tuision itoy nga school year iti sumurok-kumurang a 10.11 porsineto wenno P40.47 tunggal yunit.

Impakaammo ti Commission on Higher Education (CHEd) itay nabiit nga inaprobaranen daytoy ti aplikasion dagiti eskuela a mangipangina iti singir iti tuision.

Segun iti listaan ti CHEd, kadagiti 1,666 a pribado a Higher Education Institutions (HEIs) iti Filipinas, 267 wenno 16.03 porsiento ti napalubosan a mangipangina iti tuision.

Agingga iti Mayo 31, 289 HEIs ti nagaplay para iti pannakaipangina ti tuision ngem saan a naaprobaran ti 22 gapu iti nagduduma a rason.

(Naipablaak iti Bannawag, Hunio 18, 2012 a bilang.)

Bannawag -- Hunio 18, 2012

SARITA

4 “Ninoy”

  Ariel S. Tabag

NOBELA

28 Daga a Nakayanakan (9)

    Juan Cabreros Laya

32 Dagiti Bituen iti Imatangda (34)

    Jose A. Bragado

DANIW

14 Mangnganup

    Pearl A. Dacuag

18 Dila

      Junley L. Lazaga

34 Aplaya iti Seongju

     Joel L. Bagasol

48 Baso iti Tugaw

   Dexter M. Fabito

SALAYSAY

6 Saanto Ngatan a Lumned Pay ti Kampanario ti Laoag?

    Jim P. Domingo

8 Gapu Ta Daytoy ti Linteg (40)

    Hues Joven F. Costales (Ret.)

12 Waiver-Waiver Laeng!

     Neyo Mario E. Valdez

16 Saluadantayo Koma Dagiti Pawikan

    Jobert M. Pacnis

40 Nalaing nga Agpatanor iti Sertipikado a Bin-i ti Pagay

     Reynaldo E. Andres

KOMIKS

22 Tres Muchos (56)

24 Bannatiran (71)

26 Miks & Tiks

KOLUM

20 Dear Doc

31 Okeyka, Apong

36 Ading Kosinera

37 TIPS

39 Kastoy, Kapid, Ditoy Hawaii

42 Padasem Daytoy, Kailian

PAGLINGLINGAYAN

44 Showbiz

46 Please Maintaine…, Kdp.

47 Sinniriban

47 Sapukas

47 Sudoku

47 Aggarakgaktayo

DADDUMA PAY

 2 Ti Makunami

10 Adda Koma Museo ti Tunggal Pagadalan

15 Tao, Lugar, Pasamak

19 Ti Surat ken ti Telegrama

30 Siled ti Kararag

33 Txtm8

35 Ti Gasatmo Ita a Lawas

38 Ammuem Pay Dagitoy

Bawang Country

BAWANG COUNTRY. Parokiano a biahero dagitoy manipud iti Cagayan a dimmagas a gimmatang iti yawidda a bawang ken lasona iti maysa a pagtagilakuan iti igid ti national highway iti Pinili, Ilocos Norte. Mabigbig ti ti ili a Pinili iti produktona a bawang ken lasona, malaksid laeng iti tabako. (Roy V. Aragon)

(Naipablaak iti Bannawag, Hunio 11, 2012 a bilang.)

Pannakagubat ti cybercrime, inanamongan ti Kamara

Agaluad dagiti mangar-aramat iti Internet a mangiwarwaras kadagiti ladawan a makadadael iti dayaw ti asino man, wenno ania man nga aramid a pakaabusuan ti padada a tao.

Maigapu daytoy iti pananganamong itay lawasna ti Kamara iti maikatlo ken pinal a pannakaibasana ti gakat a mangdusa iti cybercrime tapno mapengdan ken mapasardeng ti panagraira daytoy a makadidigra nga aramid kadagiti agtutubo a Filipino.

Makatulong iti pagilian ti pannakapasingked ti House Bill 5808 (Cybercrime Prevention Act of 2012) tapno epektibo a mapengdan ken malabanan ti amin a kita ti panagusar, panagabuso ken illegal a panangserrek (iti account ti sabali) iti cyber space, a mangbikbiktima kadagiti umili.

Madusa iti prison mayor wenno mamulta iti P200,000 ti manglabsing iti confidentiality, integridad ken availability ti computer data ken systems.

Ti met cybersex offense ket addaan iti dusa a prison mayor weno multa a P1,000,000 wenno agpada, idinto a ti mapaneknekan iti child pornography, addaan iti dusa a reclusion temporal wenno multa a P1,250,000.

(Naipablaak iti Bannawag, Hunio 11, 2012 a bilang.)

Ilagan iti Isabela, agbalinen a siudad

Inaprobaran ti Senado itay Mayo 28 ti maikatlo ken pinal a pannakaibasa ti Senate Bill 144 mainaig iti panagbalin a siudad ti Ilagan iti Isabela.

Mainaig iti daytoy, maiwayatto ti plebisito iti nasao nga ili tapno masaludsod kadagiti umili no ania ti pangngeddengda. Mangnamnama ketdi ni Mayor Josemarie Diaz nga umanamong dagiti umili ta daytoy ti agbalin a tulbek ti naan-anay a panagdur-as ti Ilagan.

(Naipablaak iti Bannawag, Hunio 11, 2012 a bilang.)

Dua a seminar iti lengguahe ken panagsurat, maangay

Dua a seminar iti lengguahe ken panagsurat ti nayeskediul a maangay iti daytoy a Hunio 15 ken iti Hunio 16-17 iti La Union ken iti Cagayan, kas panagsaganadda.

Isayangkat ti Sir Pelagio Alcantara Development (SPADE) Foundation ken ti Gobierno Probinsial ti La Union iti maikadua a gundaway ti Seminar iti Panagsurat iti Iloko (Iluko/Ilokano) inton Hunio 15, 2012 iti Diego Silang Hall ti Kapitolio ti probinsia, kas impakaammo ti SPADE.

Naawis nga aglektiur da Bannawag Editor Cles B. Rambaud ken mannurat iti Bannawag Mario Neyo Valdez maipapan iti ortograpia ken panagsurat iti salaysay, kas panagsaganadda.

Aggapu dagiti makiseminar iti Kapitolio ken kadagiti 19 nga ili ken ti kakaisuna a siudad (San Fernando) ti La Union, agraman iti DepEd. Idauluanto ida ni Adamor Dagang, Dept. Head ti Provincial Information and Tourism Office (PITO) ti La Union.

Mainaig iti daytoy, kinuna ti SPADE a masegseggaanen ti pannakaipaulog ti “Iloko Code of La Union” iti daytoy a bulan, a mangitandudo iti tawidtayo a pagsasao.

Maysa met a seminar-workshop iti panagsurat iti sarita a nabuniagan iti “Panagkayas Kadagiti Balikas” ti pagtinnulongan nga angayen ti GUMIL Cagayan ken ti Alex Vicente Yadao Literary Foundation inton Hunio 16-17 iti Lakay Fabian Hall of Literature, Centro 2, Sanchez Mira, Cagayan iti panangsangaili ti pamilia da Freddie ken Olive Masuli.

Panggep ti nasao a seminar-workshop a patademen pay ti kabaelan dagiti mannurat a Cagayano iti panagsurat iti sarita iti Iluko tapno pumigsa met ti maitulongda iti pannakapatibker pay ti nakayanakan a lengguahe. Atendaran daytoy dagiti Ilokano a mannurat iti Cagayan ket agserbi a lecturer-panelist da Roy Vadil Aragon, dati a Bannawag Editor Dionisio S. Bulong ken dati a Bannawag Managing Editor Juan S.P. Hidalgo, Jr.

Libre ti rehistrasion ngem maipalagip ketdi kadagiti agatendar ti panangitugotda iti maysa a bukodda a sarita para iti workshop.

(Naipablaak iti Bannawag, Hunio 11, 2012 a bilang.)