Ilocos Sur Federated PTA, suportaranna ti “Tarabay”

Suportaran ti Ilocos Sur Federated PTA wenno ti gunglo dagiti amin a Parents Teachers Association iti sibubukel a probinsia ti Ilocos Sur ti pannakaaramat ti “Tarabay iti Ortograpia ti Pagsasao nga Ilokano” nga impaulog ti Komisyon sa Wikang Filipino (KWF) idi 2012 a kas tarabay met dagiti mangisursuro iti panagisuroda a pangaramatanda iti lengguahe nga Ilokano.

Sagudayen daytoy ti programa ti Departamento ti Edukasion a pannakausar ti nakayanakan a pagsasao iti pannakaisuro dagiti agad-adal manipud iti Kinder agingga iti Grado Tres.

Kinuna ni Atty. Catherine Valencia, presidente ti pederasion ken propesor iti University of Northern Philippines, a no mainaigto pay met laeng iti umno nga spelling dagiti balikas nga Ilokano, awan kas iti spelling a nabayagen a maus-usar a kas makita kadagiti libro ken magasin iti Ilokano a pakairamanan payen ti Nasantuan a Biblia.

“Tapno maliklikan ti pannakatikaw dagiti mangisursuro no ania ti surotenda nga ortograpia ti lengguahe nga Ilokano, idagadagmi ti panangusarda iti “Tarabay” a saan ket a ti no ditan a rumrummuar nga ortograpia,” kinuna ‘toy dati nga opisial ti Integrated Bar of the Philippines-Ilocos Sur chapter ken agdama a presidente ti Sta. Crus (I.S.) Federated PTA. (RBC)

(Naipablaak iti Bannawag, Hunio 30, 2014 a bilang.)

Tarabay iti Ortograpia ti Pagsasao nga Ilokano

Marugian iti Agosto 20, 2012 a Bilang!

Tarabay iti Ortograpia ti Pagsasao nga Ilokano

Wen, mangrugi iti Agosto 20, 2012 a bilang ti Bannawag, maiserye ti opisial nga Ortograpia Ilokana a kas impaulog ti Komisyon sa Wikang Filipino (KWF) iti babaen ti liderato da Jose Laderas Santos, Pangulo a Komisioner, ken Atty. Concepcion H. Luis, Komisioner (a mangibagi iti lengguahe nga Ilokano).

Maibilang a maysa kadagiti kapapatgan a paset ti pakasaritaan ti lengguahe ken literatura nga Ilokano, nabukel ti opisial nga ortograpia ti pagsasao nga Ilokano babaen ti pannarabay ti KWF ken iti tulong dagiti sumaganad: Bannawag; Ilokandia Literary, Historical & Cultural Society; Mariano Marcos State University; Panrehiyong Sentro ng Wikang Filipino iti Siudad ti Batac; DepEd Currimao District, Ilocos Norte; DepEd Division of Ilocos Norte; Cagayan State University-Sanchez Mira, Cagayan; GUMIL Filipinas (kangrunaanna dagiti chapters-na a GUMIL Ilocos Norte ken GUMIL Cagayan); SPADE Foundation ken ti Gobierno Probinsial ti La Union.

Malaksid kadagitoy a grupo, institusion ken gobierno lokal, dakkel met ti naitulong dagitoy nga indibidual iti pannakaurnos ti ortograpia, a naibatay kangrunaanna iti ortograpia nga ar-aramaten ti Bannawag: Dr. Jim P. Domingo, Joel B. Manuel, Juan Al. Asuncion, Ariel S. Tabag, Sherma E. Benosa, Jose A. Bragado, Ricarte A. Agnes, Elizabeth M. Raquel ken Roy V. Aragon.

Tinudingan met ti KWF a kangrunaan a nangurnos iti ortograpia da Dr. Francisca S. Nicolas, PSWF Director, Ilocos Region; Cles B. Rambaud, Managing Editor ti Bannawag; sigud a Managing Editor ti Bannawag Juan S.P. Hidalgo, Jr. ken sigud nga Editor-in-Chief ti Bannawag Dionisio S. Bulong.

Manamnama met nga iruar iti mabiit ti KWF ti pampleto a nakailaonan ti sibubukel nga ortograpia iti paulo daytoy a “Tarabay iti Ortograpia ti Pagsasao nga Ilokano” tapno maibunong, kangrunaanna, kadagiti amin a pagadalan a pakausaran ti Ilokano a kas pangisuro kadagiti agad-adal, kas mayayon iti programa ti DepEd a Mother Tongue Based-Multilingual Education (MTB-MLE).

Iti pannakaipaulog ti opisial nga ortograpia ti lengguahe nga Ilokano, maibilangen ti Ilokano a kas maikadua a kabukbukodan a lengguahe iti Filipinas nga addaan iti opisial nga ortograpia; umuna ti Filipino.

Maipakaammo met kadagiti readers ti Bannawag nga us-usaren met itan ti Bannawag ti nasao nga ortograpia, a nakailanadan ti sumagmamano a panagbalbaliw iti pannakaisurat dagiti balikas nga Ilokano, tapno mayayon met iti ortograpia a maaramat kadagiti libro iti Ilokano nga usaren wenno usarento dagiti agad-adal, nangruna iti Kinder agingga iti Maikatlo a Tukad iti elementaria. --Editor

Dua a seminar iti lengguahe ken panagsurat, maangay

Dua a seminar iti lengguahe ken panagsurat ti nayeskediul a maangay iti daytoy a Hunio 15 ken iti Hunio 16-17 iti La Union ken iti Cagayan, kas panagsaganadda.

Isayangkat ti Sir Pelagio Alcantara Development (SPADE) Foundation ken ti Gobierno Probinsial ti La Union iti maikadua a gundaway ti Seminar iti Panagsurat iti Iloko (Iluko/Ilokano) inton Hunio 15, 2012 iti Diego Silang Hall ti Kapitolio ti probinsia, kas impakaammo ti SPADE.

Naawis nga aglektiur da Bannawag Editor Cles B. Rambaud ken mannurat iti Bannawag Mario Neyo Valdez maipapan iti ortograpia ken panagsurat iti salaysay, kas panagsaganadda.

Aggapu dagiti makiseminar iti Kapitolio ken kadagiti 19 nga ili ken ti kakaisuna a siudad (San Fernando) ti La Union, agraman iti DepEd. Idauluanto ida ni Adamor Dagang, Dept. Head ti Provincial Information and Tourism Office (PITO) ti La Union.

Mainaig iti daytoy, kinuna ti SPADE a masegseggaanen ti pannakaipaulog ti “Iloko Code of La Union” iti daytoy a bulan, a mangitandudo iti tawidtayo a pagsasao.

Maysa met a seminar-workshop iti panagsurat iti sarita a nabuniagan iti “Panagkayas Kadagiti Balikas” ti pagtinnulongan nga angayen ti GUMIL Cagayan ken ti Alex Vicente Yadao Literary Foundation inton Hunio 16-17 iti Lakay Fabian Hall of Literature, Centro 2, Sanchez Mira, Cagayan iti panangsangaili ti pamilia da Freddie ken Olive Masuli.

Panggep ti nasao a seminar-workshop a patademen pay ti kabaelan dagiti mannurat a Cagayano iti panagsurat iti sarita iti Iluko tapno pumigsa met ti maitulongda iti pannakapatibker pay ti nakayanakan a lengguahe. Atendaran daytoy dagiti Ilokano a mannurat iti Cagayan ket agserbi a lecturer-panelist da Roy Vadil Aragon, dati a Bannawag Editor Dionisio S. Bulong ken dati a Bannawag Managing Editor Juan S.P. Hidalgo, Jr.

Libre ti rehistrasion ngem maipalagip ketdi kadagiti agatendar ti panangitugotda iti maysa a bukodda a sarita para iti workshop.

(Naipablaak iti Bannawag, Hunio 11, 2012 a bilang.)