Agtultuloy latta ti irurukbos ti turismo iti Rehion I babaen ti kinapinget ti Departamento ti Turismo ken dagiti gobierno lokal a kadanggayna a mangpadakkel itoy nga industria.
Maysa daytoy kadagiti naimbag a damag nga inagapad ni Juan Carlo S. Medina, pangulo ti Regional Development Council (RDC) I ken Mayor ti Siudad ti Vigan, Ilocos Sur, iti 2017 State of the Region Address (SORA) a tampok ti maysa a komperensia a naangay iti nabiit iti S. R. Paradise Resort and Hotel iti Bauang, La Union.
Imbatadna pay ti irurukbos met ti ekonomia ti rehion iti aginnem a porsiento a puntosna idi napan a tawen. Dakkel daytoy a banag a nakaray-awan ti tallaong aglalo dagiti pannakabagi dagiti maseknan nga ahensia ti gobierno nga indauluan da NEDA Regional Director ken RDC Vice Chairperson Nestor G. Rillon, DILG Regional Director James F. Fadrilan, DOT Regional Director Martin S. Valera ken dadduma pay.
“Agdagup iti 2,382,903 dagiti turista nga immay iti rehiontayo idi 2017 ket ad-adu daytoy iti 13 porsiento ngem idi 2016,” kinuna ni Medina.
Segun iti SORA ni Medina, maibilang kadagiti napintas a disso a paborito a pasiaren dagiti turista ti Bangui Windmills, Kapurpurawan Rock Formation, ken Kaangrian Falls iti Burgos, amin dagitoy iti Ilocos Norte; Calle Crisologo iti Vigan, Aw-asen Falls iti Sigay ken Nuestra Señora Church iti Sta. Maria, agpapada nga adda iti Ilocos Sur; Surfing area iti San Juan ken Tangadan Falls iti San Gabriel, agpada a masarakan iti La Union; ket iti Pangasinan: ti simbaan ti Manaoag ken ti Hundred Islands iti Siudad ti Alaminos.
Pinalagipan pay ni Medina dagiti lider ti turismo iti rehion nga ikagumaananda nga allukoyen dagiti turista nga agpaamianan nangruna ita ta temporario a naserraan ti Boracay. “Total, di paatiw ti kalidad dagiti beaches-tayo a kas iti Saud iti Pagudpud, Ilocos Norte; Patar iti Bolinao ken Surip iti Bani, Pangasinan,” impannakkelna. (DJUNA R. ALCANTARA)
(Naipablaak iti Bannawag iti Hulio 9, 2018 a bilang.)
No comments:
Post a Comment