Iti umay a tawen, mangipasdek ti Department of Education (DepEd) iti nasursurok ngem 2,000 a klinika kadagiti para iti publiko nga eskuela iti sibubukel a pagilian tapno maipaayan dagiti agad-adal iti umno a pannakatagiben ti salun-at.
Impakaammo ni Undersecretary for Administration Alain Del Pascua a mapan a 2,101 a klinika ti mabangon kadagiti central elementary school iti pagilian. Kuna daytoy nga agbalin dagitoy a hub wenno sentro a pakaserbian pay dagiti dadduma a pagadalan.
Kuna ni Pascua a dagitoy a hub ti agbalin a pisikal a sentro ti Oplan Kalusugan (OK) sa DepEd a nayalnag itay nabiit. Ti “OK sa DepEd” ti kangrunaan itan a programa iti salun-at ti departamento.
Maigidiat dagitoy a hub kadagiti nakabase kadagiti eskuela a Barangay Health Center wenno Barangay Health Station nga ininaw met ti Department of Health (DOH).
(Naipablaak iti Hulio 30, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan laeng iti buqo.ph ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment