Iti La Union: Maika-8 nga Ayat Festival, maangay ita nga Agosto

Angayen ti probinsia ti La Union ti Maika-8 nga Ayat Festival itoy nga Agosto, kas paset ti pannakarambak ti Buwan ng Wika.

Kinuna  ni Adamor Dagang, provincial information and tourism officer ken executive officer ti Ayat Festival wenno Piesta ni Ayat, nga adun ti pimmintasan ti nasao a festival. Dati a paset ti tradisional a pannakarambak ti anibersario ti probinsia ti La Union ti Ayat Festival iti Pebrero-Marso ngem naisina daytoy nangrugi itay napan a tawen tapno maipamaysa a marambakan ti lengguahe ken kultura ni Ilokano.

“Immadu ti ramen ti Ayat Festival,” kinuna ni Dagang, “ta naaddaan kadagiti pasalip a kas iti pinarparmata da Gob. Francisco Emmanuel “Pacoy” Ortega III ken Bise Gob. Aureo Augusto Nisce.”

Maluktan ti parambak iti Agosto 13 babaen ti tallo a salip: street dancing a para kadagiti estudiante ti hayskul, La Union Henio (elementaria ken sekundaria a benneg), ken Iskrabiloko a para kadagiti agad-adal iti hayskul ken nataengan.

Maisaruno inton Agosto 23 ti Salip iti Deklamasion a para iti elementaria ken hayskul ket inton Agosto 24 ti Ilokano Chorale a para iti hayskul ken Iloko Essay Contest (on the spot) a para iti Grade 6 ken Grade 10.

Silulukat dagitoy a pasalip kadagiti amin a 19 nga ili ti La Union agraman ti Siudad ti San Fernando. Mapadayawanto dagiti mangabak iti nangayed a seremonia inton Agosto 31 iti Diego Silang Hall ti Kapitolio ti Probinsia.

Impakaammo ni Dagang a maisarunonto metten ti Panagbirok iti Kampeon ti Lengguahe 2018, a naidumduma a paset ti Ayat Festival. “Inton Marso 2019 a mapadayawan dagiti mapili,” kinunana.

Malagip a ti La Union ti kakakaisuna pay laeng a probinsia iti Amianan nga addaan iti Iloko Code a mangikalkalikagum iti pannakaaramat ken pannakaitandudo ti pagsasao nga Iloko (Ilokano) kadagiti amin a sanga ti gobierno iti probinsia ken uray pay iti pribado a sektor a kas kadagiti negosio. (DJUNA R. ALCANTARA)


(Naipablaak iti Agosto 6, 2018 a bilang.)