Kinuna ni Senador Sonny Angara a no kayat ti administrasion ni Presidente Duterte a rumang-ay ti pagilian ken marikna daytoy ti ad-adu nga umili, masapul nga agpuonan koma met daytoy iti sektor ti agrikultura malaksid iti tay-ak ti impraesktruktura.
Maibatay ken ni Angara, kasapulan ti pagilian ti maysa a ‘rebolusion iti agrikultura’ a mabalin nga ilungalong ti administrasion ni Duterte a kagiddan ti “Build, Build, Build” a kangrunaan a programa ti administrasion.
Bayat ti 2018 National Conference and Agri-Fishery Research and Development Festival a naangay iti Sorsogon City itay nabiit, kinuna ni Angara a kagiddan ti panangnamnamatayo a magteng ti nabalitokan a panawen ti impraestruktura, masapul a kalikagumantayo ti kapadana a ‘nabalitokan a panawen’ iti agrikultura. Innayonna a no adda “build, build, build,” adda koma met “grow, grow, grow” wenno “plant, plant, plant” ken uray pay “fish, fish, fish.”
Dinakamat daytoy a kasapulan ti maysa a ‘rebolusion iti agrikultura’ tapno adda katulongan a mangbiag iti masaksakit a sektor ti agrikultura iti pagilian.
Kinuna pay ni Angara a mabalin nga ipagpannakkeltayo iti lubong ti napartak a panagrang-aytayo ngem awan serserbina daytoy a panagrang-ay no saan a marikna dagiti mannalon ken mangngalap. Intarapnos daytoy a dinakamat ti rekord a mangipakita a 60 a porsiento dagiti nakurapay a Filipino ti adda iti sektor ti agrikultura.
(Naipablaak iti Bannawag iti Hulio 16, 2018 a bilang.)
No comments:
Post a Comment