NALALAING A MAMMANDAY. Sipapannakkel ni Rodrigo Bayuca Gray ti Brgy. Caburao, Santiago, Ilocos Sur a nagpaala iti ladawan iti puesto a pakailaklakuan dagiti pinandayna a buneng. Malaksid iti buneng, agpampanday pay ni Rodrigo iti kutsilio, panabas ken kumpay nga am-ammo iti kinangato ti kalidadda, kas paneknekan ti kinapauten daytoy a negosio a nagtitinnawidan ti pamilia Gray iti Santiago ken Candon, Ilocos Sur. Mammanday met dagiti kakabsat ni Rodrigo a da Eduardo, Bobby ken Noli. Agaabay ken agsisinnango dagiti puestoda iti igid ti kalsada nasional iti Barangay Caburao. Malaksid iti buneng ken kapadana, agar-aramidda pay iti kulongkulong (kurongkurong iti dadduma) wenno sidecar a maikapet iti motorsiklo a pagikargaan dagiti mannalon kadagiti gamigamda iti panagtalon. (VIRGILIO D. DOMALOY)
(Naipablaak iti Bannawag iti Hulio 16, 2018 a bilang.)
No comments:
Post a Comment