Tabag, nangabak iti NCCA Writers’ Prize iti nobela nga Ilokano

Inyalat ni Ariel S. Tabag, editor iti daniw ken showbiz iti Bannawag, ti 2013 NCCA Writers’ Prize para iti Nobela nga Ilokano babaen ti nobelana a “Kabessat ti Bagis.”

Iti seremonia a naangay bayat ti Taboan 2014 iti Subic, Zambales itay Pebrero 24, inawat ni Tabag a kas gunggona ti plake, sertipiko ken ti umuna nga apagkapat ti 250,000 a premio a kuarta.

Kuna ni Tabag a ti nobelana ket testamento iti napalabas, agdama ken manamnama a masakbayan ti maysa a kaamaan nga Ilokano a nagdappat iti Cagayan a nalimogan iti kannawidan ti puli a nagramut iti nasao a probinsia.

Maiwayat iti tunggal dua a tawen, panggep ti Writers’ Prize ti National Commission for Culture and the Arts (NCCA) nga ipaayan iti panakkelen nga insentibo dagiti mannurat a Filipino. Kas kadagiti immuna nga edision, naluktan daytoy iti lima a lengguahe.

Kadua ni Tabag a nangabak da Joselito D. delos Reyes para iti Sarita iti Filipino, Hope Sabanpan-Yu para iti Salaysay iti Cebuano, Rafael A. Banzuela Jr. para iti Daniw iti Bikolano ken Jeremy Alexandre O. Evardone para iti Drama iti Waray.


(Naipablaak iti Bannawag, Marso 17, 2014 a bilang.)

Tabag, grantee para iti nobela nga Ilokano ti 2013 National Book Development Trust Fund

Napili ni Ariel S. Tabag, editor iti dandaniw ken showbiz iti Bannawag, a maysa kadagiti grantee iti nobela nga Ilokano ti 2013 National Book Development Trust Fund.

Mainaig itoy, ipaayan ti National Book Development Board  (NBDB)ni Tabag, tubo iti Sta. Teresita, Cagayan iti P200,000 a grant tapno leppasenna ti nobelana a napauluan iti “Panangsapul iti Puraw a Kabalio.” Manamnama a malpas ti nasao a nobela iti makatawen,

Kakadua ni Tabag a naipaayan iti grant ti dua pay a mannurat nga Ilokano, da Sherma E. Benosa (Bambang, Nueva Vizcaya) para iti nobela daytoy a “Ti Bantay Asin” ken Linda Lingbaoan-Bulong (Peñarrubia, Abra), dati a kameng ti Bannawag, para iti nobela daytoy a “Kalinawa.” Maipaayan met laeng da Benosa ken Bulong iti sag-P200,000 a grant para iti panangileppasda kadagiti nobelada.

Naipaayan met iti grant para iti lokal a pakasaritaan ti probinsia a naisurat iti Ingles wenno Filipino da Lilian C. Dela Peña, Anna Christie V. Torres, Danilo M. Gerona ken da Jeena Rani Marquez-Manaois ken Ma. Elena Paulma, ken para iti pagbiagan/baro a teknolohia iti panagnegosio ni Annabelle M. Calleja.

Naiwayat ti seremonia ti pammadayaw iti opisina ti NBDB iti Ortigas, Pasig City itay Enero 30, 2014.
Maysa nga ahensia ti gobierno, panggep ti NBDB ti mangiwayat kadagiti nadumaduma a gannuat a mangitag-ay iti kalidad dagiti libro iti Filipinas.


(Naipablaak iti Bannawag, Pebrero 17, 2014 a bilang.)

Dua nga Ilokano a libro, napadayawan

Dagiti editor ti Nabalitokan a Tawid, agpakanawan:
Ariel S. Tabag, Juan Al. Asuncion ken Joel B. Manuel. 

Nangabak ti dua nga Ilokano a libro, ti Karapote: Antolohia ti 13 a Nasuerte a Sarita iti Ilokano ken ti Nabalitokan a Tawid: Antolohia Dagiti Napili a Sarita Dagiti Ilokano iti 2011 National Book Awards iti tay-ak ti Short Fiction, Ilokano ken Anthology, Ilokano, kas panagsaganadda, iti naangay a seremonia ti pammadayaw idi Nobiembre 17 iti National Museum, Manila.

Buklen ti sangapulo ket tallo a napili a sarita ni Bannawag Poetry Editor Ariel S. Tabag ti Karapote idinto ta nakatiponan dagiti sangapulo ket siam a napili a sarita dagiti Ilokano ti Nabalitokan a Tawid a nagpaayan nga editor da Bannawag Literary Editor Juan Al. Asuncion, Tabag, ken mannurat iti Bannawag Joel B. Manuel.

Imatonan ti National Book Development Board (NBDB) ken ti Manila Critics Circle (MCC), sigud a dagiti laeng naipablaak a libro iti Filipino ken English ti mapadpadayawan iti nasao nga award. Narugian a napadayawan dagiti kapipintasan a libro a nasurat kadagiti 12 kangrunaan a rehional a lengguahe iti Filipinas iti 2010 National Book Awards; nangrugi iti Cebuano (awan ti napili), sa iti 2011, naisublat met dagiti libro nga Ilokano; sabalinto manen dagiti libro iti sabali a rehional a lengguahe iti 2012 NBA. Iti sabali a pannao, no di mabaliwan ti pagalagadan, urayen manen dagiti mannurat nga Ilokano ti nasurok a 10 a tawen sa manen mabalin nga adda mapadayawan ti NBDB ken MCC a kapipintasan a libro iti Ilokano.


(Naipablaak iti Bannawag, Disiembre 10, 2012 a bilang.)