Libro ni Alcantara, mayalnag inton Oktubre 4

Kas paset ti pannakarambak ti maika-50 nga anibersario ti GUMIL Ilocos Sur (GIS), mayalnag iti Vigan Convention Center inton Oktubre 4, 2014 ti Daniw: Pangrugian a Mangadal ken Mangipateg, maysa a baro a libro a sinurat daydi premiado a mannurat ti Bannawag Pelagio A. Alcantara.

Maibilang a collector’s item, ipasimudaag ti paulo ti libro ti panangipaayna iti panangiwanwan iti panagputar ken panagbasa iti daniw.

Mabigbig pay a kas premiado a mannaniw iti Ilokano/Iloko ken Ingles, ni Apo Pel, kas nalatlatak nga awagna, ti pundador ti GUMIL Ilocos Sur a nabangon idi Oktubre 4, 1964 iti Vigan ken nagpaayanna a presidente iti uneg ti 12 a tawen.

Tampok ti parambak ti GIS inton Oktubre 4 a pannakapadayaw dagiti liderna (iti las-ud ti lima a dekada) a dakkel ti kaimudinganda iti pakasaritaan ti GUMIL a namunganay iti Ilocos Sur. Mabalangatanto ti “Miss GUMIL Ilocos Sur (Anibersario 50) 2014.” (GUMIL Ilocos Sur)

(Naipablaak iti Bannawag, Septiembre 29, 2014 a bilang.)

Dua nga Ilokano a libro, napadayawan

Dagiti editor ti Nabalitokan a Tawid, agpakanawan:
Ariel S. Tabag, Juan Al. Asuncion ken Joel B. Manuel. 

Nangabak ti dua nga Ilokano a libro, ti Karapote: Antolohia ti 13 a Nasuerte a Sarita iti Ilokano ken ti Nabalitokan a Tawid: Antolohia Dagiti Napili a Sarita Dagiti Ilokano iti 2011 National Book Awards iti tay-ak ti Short Fiction, Ilokano ken Anthology, Ilokano, kas panagsaganadda, iti naangay a seremonia ti pammadayaw idi Nobiembre 17 iti National Museum, Manila.

Buklen ti sangapulo ket tallo a napili a sarita ni Bannawag Poetry Editor Ariel S. Tabag ti Karapote idinto ta nakatiponan dagiti sangapulo ket siam a napili a sarita dagiti Ilokano ti Nabalitokan a Tawid a nagpaayan nga editor da Bannawag Literary Editor Juan Al. Asuncion, Tabag, ken mannurat iti Bannawag Joel B. Manuel.

Imatonan ti National Book Development Board (NBDB) ken ti Manila Critics Circle (MCC), sigud a dagiti laeng naipablaak a libro iti Filipino ken English ti mapadpadayawan iti nasao nga award. Narugian a napadayawan dagiti kapipintasan a libro a nasurat kadagiti 12 kangrunaan a rehional a lengguahe iti Filipinas iti 2010 National Book Awards; nangrugi iti Cebuano (awan ti napili), sa iti 2011, naisublat met dagiti libro nga Ilokano; sabalinto manen dagiti libro iti sabali a rehional a lengguahe iti 2012 NBA. Iti sabali a pannao, no di mabaliwan ti pagalagadan, urayen manen dagiti mannurat nga Ilokano ti nasurok a 10 a tawen sa manen mabalin nga adda mapadayawan ti NBDB ken MCC a kapipintasan a libro iti Ilokano.


(Naipablaak iti Bannawag, Disiembre 10, 2012 a bilang.)