Tabag, grantee para iti nobela nga Ilokano ti 2013 National Book Development Trust Fund

Napili ni Ariel S. Tabag, editor iti dandaniw ken showbiz iti Bannawag, a maysa kadagiti grantee iti nobela nga Ilokano ti 2013 National Book Development Trust Fund.

Mainaig itoy, ipaayan ti National Book Development Board  (NBDB)ni Tabag, tubo iti Sta. Teresita, Cagayan iti P200,000 a grant tapno leppasenna ti nobelana a napauluan iti “Panangsapul iti Puraw a Kabalio.” Manamnama a malpas ti nasao a nobela iti makatawen,

Kakadua ni Tabag a naipaayan iti grant ti dua pay a mannurat nga Ilokano, da Sherma E. Benosa (Bambang, Nueva Vizcaya) para iti nobela daytoy a “Ti Bantay Asin” ken Linda Lingbaoan-Bulong (Peñarrubia, Abra), dati a kameng ti Bannawag, para iti nobela daytoy a “Kalinawa.” Maipaayan met laeng da Benosa ken Bulong iti sag-P200,000 a grant para iti panangileppasda kadagiti nobelada.

Naipaayan met iti grant para iti lokal a pakasaritaan ti probinsia a naisurat iti Ingles wenno Filipino da Lilian C. Dela Peña, Anna Christie V. Torres, Danilo M. Gerona ken da Jeena Rani Marquez-Manaois ken Ma. Elena Paulma, ken para iti pagbiagan/baro a teknolohia iti panagnegosio ni Annabelle M. Calleja.

Naiwayat ti seremonia ti pammadayaw iti opisina ti NBDB iti Ortigas, Pasig City itay Enero 30, 2014.
Maysa nga ahensia ti gobierno, panggep ti NBDB ti mangiwayat kadagiti nadumaduma a gannuat a mangitag-ay iti kalidad dagiti libro iti Filipinas.


(Naipablaak iti Bannawag, Pebrero 17, 2014 a bilang.)

Kablaawandakayo!

KABLAAWANDAKAYO! Indauluan ni Danilo B. Antalan ti Ilocos Sur dagiti nangabak iti 2012 Palanca Awards (Salip iti Sarita iti Ilokano) babaen ti saritana a “Dagiti Sala ti Panawen.” Kaduana iti ladawan da Fernando B. Sanchez ti Pangasinan a nangyalat iti Maika-2 a Gunggona (“Babato”) ken Sherma E. Benosa ti Nueva Vizcaya a nangyalat met iti Maika-3 a Gunggona (“Dagiti 'No La Koma' Ni Monica”). Naangay ti seremonia ti pammadayaw iti Peninsula Manila iti Siudad ti Makati idi Set. 1 a nagpaayan ni Tourism Secretary Ramon R. Jimenez Jr. a kas guest of honor.

(Naipablaak iti Bannawag, Septiembre 17, 2012 a bilang.)

Benosa, umuna iti 4th Premio Duque

Inyalat ni Sherma E. Benosa, tubo iti Bambang, Nueva Vizcaya ngem agnaed iti Metro Manila, ti Umuna a Gunggona, iti Salip iti Sarita ti 4th Premio Reynaldo A. Duque.

Premiado a mannurat iti sarita ken agdama a mangal-ala iti masteral iti lengguahe iti Unibersidad ti Filipinas, pinangyalat ni Benosa ti saritana a “Ti Basi ni Tatang.” Umawat ni Benosa iti $200 ken sertipiko.

Inyalat met ni Federico T. Ilac Jr. ti Sinait, Ilocos Sur ngem agnaeden iti New Jersey ti Maika-2 a Gunggona ($150 ken sertipiko) babaen ti saritana a “Kumaw.”

Ni met Jovito F. Amorin iti Sta. Maria, Ilocos Sur ti nangyalat iti Maikatlo a Gunggona ($100 ken sertipiko) babaen ti saritana a “Ti Saludsod ni Nanang.”

Nagpaay a hurado da Bannawag Literary Editor Juan Al. Asuncion (chairman), Bannawag Editor Cles B. Rambaud (kameng), ken Bannawag Poetry Editor Ariel S. Tabag (kameng).

Mayawat dagiti premio a kuarta ken sertipiko bayat ti Maika-44 a Nailian a Komperensia ti GUMIL Filipinas, ti gunglo dagiti mannurat nga Ilokano, a maangay iti DMMMSU, Bacnotan, La Union inton Abril 20-22, 2012.

Esponsoran ni Tessie R. Duque, kaingungot ni mannurat Reynaldo A. Duque, maisaysayangkat ti Premio Duque a pangparegta kadagiti mannurat a kameng ken manamnama nga agkameng iti GUMIL Metro Manila ken GUMIL Candon iti Candon City a puon ni Apo Duque.

Kabayatanna, ipakaammo ti PRAD Secretariat a maisagsaganan ti libro a pakaukkonan dagiti nangabak a sarita iti uppat nga edision ti nasao a pasalip. Manamnama a mayalnag daytoy inton Oktubre 2012. (PRAD Secretariat)

(Naipablaak iti Bannawag, Abril 2, 2012 a bilang.)