Kinuna ni Presidential Spokesman Salvador Panelo a pabor ni Presidente Duterte iti pannakaaramat ti marihuana a kas agas ditoy Filipinas ket suportaran daytoy ti ania man a gakat a mamagbalin a legal iti daytoy.
Napagsasaritaan iti pagilian ti nasao nga isyu gapu iti sungbat ni Catriona Gray iti 2018 Miss Universe a nakabalangatanna a reyna a pabor daytoy iti panagusar iti marihuana a kas medisina.
Idi Septiembre 2017, inaprobaran ti maysa a grupo iti Kongreso ti House Bill No. 6517 wenno ti Philippine Compassionate Medical Cannabis Act, nga agpangpanggep a mamagbalin a legal iti panagusar iti marihuana a kas medisina.
Addan ti gakat iti maikadua a pannakaibasana iti Kamara.
Kuna ni Isabela Representative Rodolfo Albano III, kangrunaan nga autor ti gakat, a maragsakan iti napabaro nga interes ti publiko maipapan iti pannakapagbalin a legal ti marihuana a kas agas.
Iti maysa a pakaammo, kuna ni Albano a mangnamnama a maipasa ti gakat sakbay nga aggibus ti 17th Congress.
Nupay kasta, linawlawagan ni Senate President Vicente "Tito" Sotto III a kas sagudayen ti Republic Act No. 9165 wenno Dangerous Drugs Act of 2002, legal ti panagusar iti marihuana a kas medisina ta mabalin met ti agaplay dagiti pasiente para iti “compassionate special permit" manipud iti Food and Drug Administration (FDA). Palubosan ti permit dagiti saan a rehistrado nga agas iti pagilian, kas iti marihuana, a mausar a para iti medikasion.
Gapu iti daytoy, kuna ni Sotto a saanen a masapul ti pannakaipasa ti gakat a mamagbalin a legal iti marihuana a kas agas.
(Naipablaak iti bilang a Enero 7, 2019. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment