Baguio Night Market

BAGUIO NIGHT MARKET. Ti rinabii a night market iti Harrison Road, Siudad ti Baguio ti ar-araken ken ranrantaen dagiti agbakasion ken agpasiar iti siudad, lokal man a turista wenno saan, ken dagiti sumang-at nga aggapu iti Metro Manila ken dadduma a probinsia. Okuparen ti night market ti kagudua ti Harrison Road (dumna iti Melvin Jones grandstand iti Burnham Park).  Mangrugi iti maikasiam iti rabii ti night market agingga iti parbangon nga adda pay aggatang.  Napipintas dagiti agduduma a tagilako iti nalaka a gatad a pakaibilangan ti ukay-ukay, agduduma a klase ti lupot, sapatos, bag, digital accessories, dagiti aramaten iti uneg ti balay ken kosina ken dadduma pay.  Segun iti Travel Search Engine Scanner, maikapat ti Baguio Night Market iti top ten a night market iti sangalubongan gapu iti kinalatak ken kinapigsa ti pangawisna kadagiti aggatang.  Iti listaan ti Scanner, ti Marrakech Night Market idiay Morocco ti numero uno; maikadua ti Ratchada Night Bazaar ti Bangkok, Thailand; maikatlo ti Yamashiro Farmers’ Market idiay Los Angeles, California; maikalima ti Suzuki Night Market idiay Melbourne, Australia; maikanem ti Barranco Night Market, Lima, Peru; maikapito ti Donghuamen Night Market idiay Beijing, China; maikawalo ti Luang Prabang Night Market idiay Laos; maikasiam ti Ningxia Night Market idiay Taiwan ken maikasangapulo ti Temple Street Night Market idiay Hong Kong. (VIRGILIO D. DOMALOY)


(Naipablaak iti Bannawag iti bilang a Disiembre 17, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)