Filipinas, di ‘masiluan’ kadagiti utangna --China

Adayo a ‘matnag iti silo’ ti Filipinas gapu iti utangna iti China iti babaen ti programa ti gobierno ti Filipinas a “Build, Build, Build.”

Daytoy ti kuna ti gobierno ti China babaen ken ni Tan Qingsheng, Charges d'Affaires iti Chinese Embassy iti Manila, itay nabiit.

Malaksid kadagiti tulong iti impraestruktura, pinadur-as pay ti nasinged a relasion dagiti dua a pagilian ti turismo ta manamnama a nasursurok ngem 1.5-milion a turista nga Intsik ti umay iti pagilian itoy a tawen.

Kinuna ni Tan a matikaw kadagiti damag a mamalmallaag kontra iti ‘pannakasilo ti Filipinas’ gapu iti utang. Segun iti daytoy, ti Filipinas ti nangilungalong kadagitoy a proyekto, ken mamati daytoy iti idudur-as ti ekonomia ti pagilian gapu kadagitoy a proyekto.

Segun met ken ni John Gong, propesor iti economics iti University of International Business and Economics iti Beijing, awan ti panggep ti China a mangbangkarote ken mangala kadagiti sanikua dagiti pagilian nga immutang iti China.

Maipalagip nga itay napan a bulan, bimmisita iti dua nga aldaw ni Chinese President Xi Jinping a nangpirmaanda ken Presidente Rodrigo Duterte iti 29 a katulagan, karaman ti kasuratan iti katulagan iti panagbukibok iti lana ken gas iti pagilian.

Itay Agosto, inanamongan ti Filipinas ken China ti pannakapapartak dagiti panagtinnulongda iti tay-ak ti impraestruktura. Dua a rangtay iti Karayan Pasig ti Manila ti manamnama a maileppas inton 2021. Mabangon met ti dam iti Infanta, Quezon.

Manginominar met ti Department of Transportation iti mabiit iti tallo a kontratista a mangaramid iti riles ti tren a Subic-Clark ket manamnama a mapirmaan ti katulagan sakbay nga aggibus ti tawen wenno iti nasapa a 2019.

Kinuna ni Tan a saan a ti isyu iti Philippine West Sea (awagan ti China iti South China Sea) ti pakadagupan ti relasion ti China ken Filipinas.

Pinili ni Duterte a saanen a yuli iti internasional a korte a supsuportaran ti United Nations ti pannakaibasura koma ti panangipapilit ti China iti karbenganna iti nasao a nabaknang a disso.

Ketdi, inkeddeng ti Presidente a pabaruen ken palagdaen ti relasion a nagrikki gapu iti riri a mainaig iti nadakamat a disso ken iti kaso nga inlungalong ti sinaruno daytoy a ni sigud a Presidente Benigno Aquino III.


(Naipablaak iti Bannawag iti bilang a Disiembre 10, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)