Baro a La Union-Baguio Road, paregtaenna ti turismo iti N. Luzon

Manamnama a maparegta ti turismo iti Amianan a Luzon iti pannakalpas ti Anduyan Bridge ken ti Aringay-Tubao Road ken iti mapangpanggep a pannakapasayaat ti Anduyan-Rizal-San Pascual Road a mangisilpo iti probinsia ti La Union iti Benguet.

Agpateg iti P493.9-milion dagiti dua a proyekto, agatiddog ti Anduyan Bridge iti 360 a metro ken agatiddog met ti Aringay-Tubao Road iti agarup a 15 a kilometro. Babaen dagitoy—ken ti mapasayaat nga Anduyan-Rizal-San Pascual Road, mayababa ti oras ti biahe manipud iti Tubao, La Union agingga iti Asin Hot Spring iti Tuba, Benguet manipud iti nasurok a dua nga oras iti 35 a minuto laeng ken ti biahe nga agpa-Baguio iti nakurang a maysa nga oras.

Nainaugoraran dagiti nasao a proyekto itay Nobiembre 26, 2018 babaen da DPWH Secretary Mark Villar ken dadduma pay nga opisial.

Kinuna ni La Union Second District Representative Sandra Y. Eriguel, kaingungot daydi Dip. Frany Eriguel a nangikalikagum iti pannakaaramid ti nasao a proyekto idi pay 2015, a nasurok a 4,000 a motorista ti mabenepisiaran iti nasao a proyekto iti inaldaw.

Innayonna a ti Anduyan Bridge ti aw-awaganna iti “Frany’s Dream Bridge.”

“Sinarungkaranmi ti rangtay idi Pebrero ket pinadpadaananna ti pannakalukat ti rangtay iti publiko idi Hunio. Ngem nakakalkaldaang ta napapatay sakbayna—idi Mayo 12,” kinunana.

Babaen ti rekomendasion ti DPWH, inaprobaran metten ti Kamara ti singasing ni Rep. Eriguel a House Bill No. 6391 nga agpanggep a mamagbalin iti kalsada manipud iti Barangay Anduyan iti Tubao, La Union agingga iti Barangay San Pascual iti Tuba, Benguet a kalsada nasional. Addan ti nasao a gakat iti Senado. Maisilpo ti nasao a paset ti kalsada iti maysa a kalsada nasional, ti Asin Nangalisan-San Pascual Road in Tuba, Benguet, a napagbalin sakbay a kalsada nasional babaen ti bileg ti Republic Act No. 10406. 

Kinuna ni Rep. Eriguel nga apaman a mapasayaat ti kalsada, ad-addanto payen a maparegta ti turismo iti nasao a lugar, kas sabali pay a dalan nga agturong iti Benguet malaksid iti Marcos Highway ken ti dadaan a Kennon Road.


(Naipablaak iti Bannawag iti bilang a Disiembre 17, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)