Iti katengngaan ti Abril a nangrugi ti kalgaw iti pagilian, kas kuna ti Philippine Atmospheric Geophysical and Astronomical Services Administration (PAGASA).
Kinuna ni Ezra Boquirin, weather specialist ti PAGASA, a naggibusen ti amian (angin nga aggapu iti Siberia) ket sinuktanen ti high pressure area (HPA) nga aggapu met iti amianan a laud ti Pasipiko.
Iti sabali a bangir, imbalakad ti Department of Health (DoH) iti publiko nga agannad kontra kadagiti sakit a kadawyan a maal-ala tunggal kalgaw.
Maibatay iti DoH, maysa kadagiti sakit a masapul a liklikan ti heat stroke, a makapapatay.
Tapno maliklikan ti heat stroke, kuna ti DoH a liklikan ti agbilag iti init manipud iti 10:00 iti bigat agingga iti 3:00 iti malem.
No di maliklikan ti rummuar iti balay, agaramat iti salaknib iti init a kas iti payong ken kallugong.
Ipaugali met ti agbalon ken uminum iti adu a danum tapno maliklikan ti dehydration, a mabalin nga agbanag a heat stroke.
Malaksid iti heat stroke, liklikan met ti sore eyes, a gapu iti bakteria wenno bayrus babaen ti regular a panangbuggo kadagiti ima.
Maysa pay kadagiti problema iti kalgaw ti sunburn, isu a naballaagan ti publiko a saan nga agbilag iti init ken agusar iti sunblock, a di nababbaba ngem SPF-30, 30 a minuto sakbay a rummuar iti balay ken agsapsapo manen kalpasan ti dua nga oras.
Maysa pay a sakit iti kalgaw ti panateng ken uyek gapu iti agbaliwbaliw a paniempona.
Maibalakad met kadagiti nataengan nga agpabakunada kontra iti trangkaso sakbay a dumteng ti Hunio nga isu ti tiempo ti trangkaso.
Amirisen pay dagiti kanen ken inumen ta ti pannangan ken paginum iti kontaminado, makaigapu iti panagtakki ken panagsarua, segun pay iti DoH.
Ti sakit iti kudil, kas iti busali, kadawyan a maala kadagiti lugar nga agkurkurang iti danum, naletlet, ken saan a regular ti panagdigos dagiti agindeg. Mabalin met a maala ti sakit iti kudil iti swimming pool.
Namallaag pay ti DoH kontra iti kagat ti aso, a mabalin a pakaigapuan ti rabies.
(Naipablaak iti Bannawag, Abril 23, 2018 a bilang.)
No comments:
Post a Comment