Pinangabak ni Aguillon, nagretiro a prinsipal ti San Miguel National High School, Norala, South Cotabato, ti saritana a “No Nairanta nga Agpaay Kaniak.” Naipasngay iti Umingan, Pangasinan ken dimmakkel iti Almaguer South, Bambang, Nueva Vizcaya sakbay a nagbalin a residente ti Brgy. Topland, Koronadal City, South Cotabato. Agnanaed ita iti Upper Carmen, Cagayan de Oro City iti sidong ti maikapat kadagiti lima nga annakna.
Dagiti kakadua ni Mrs. Aguillon a nangabak:
Maikadua a Gunggona, Roselyn C. Campano, tubo iti Caroan, Gonzaga, Cagayan ken agdama nga adviser ti Grade 6 iti Caroan Elementary School, babaen ti saritana a “Sanguek Manen ti Sumaruno a Pannakidangadang;”
Maikatlo, Florencio M. Bayuga ti Poblacion East, Santa Maria, Pangasinan, nagpapaay a pannakabagi ti Watchtower Society iti agarup 20 a tawen, babaen ti saritana a “Uray Nababa ti Adalmo, Fren.”
Naangay ti pasalip iti babaen ti foundation a naipanagan iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.
Es-esponsoran ni Jenny Alcausin (agnanaed iti California) ti nasao a pasalip iti pannarabay dagiti gagayyem daydi MAA a da Amado I. Yoro, Jun Abinsay, ken Priscilla Dela Cruz (agnanaed iti Hawaii) ken dagiti kameng ti Bannawag.
Dagiti gunggona: Umuna, P15,000.00; Maikadua, P12,00.00; ken Maikatlo, P10,000.00. Maipaayan pay dagiti mangabak iti sertipiko ti pammadayaw malaksid iti medalion a maipaay iti nangyalat iti Umuna a Gunggona.
Mapadayawan dagiti mangabak bayat ti Dap-ayan 2018 ti GUMIL Filipinas a maangay itoy nga Abril 20-22 iti Moonlite Paradise Resort, Brgy. Diora-Zinungan, Santa Ana, Cagayan.
Dagiti naghurado: Ariel S. Tabag, pangulo; Juan Al. Asuncion, kameng; ken Neyo Mario E. Valdez, kameng.
(Naipablaak iti Bannawag iti Abril 9, 2018 a bilang.)
No comments:
Post a Comment