GF, rambakanna ti nabalitokan nga anibersariona inton Abril 20-22

Ladawan iti Dap-ayan 2017 ken Maika-49 a Nailian a Kombension ti GUMIL Filipinas idi Abril 2017.

Rambakan ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, ti nabalitokan nga anibersariona inton Abril 20-22, 2018 iti Moonlite Paradise Resort, Dugo-San Vicente Road, Barangay Zinungan, Santa Ana, Cagayan.

Iti tema a “GUMIL @ 50: Nabalitokan a Dawa, Narangpaya a Literatura,” rambakan dagiti mannurat nga Ilokano daytoy naisangsangayan nga okasion babaen dagiti kannawidan nga ay-ayam ken pabuya, panangpadayaw kadagiti premiado a mannurat, panagyalnag kadagiti libro, panangbalangat iti Reyna ti GUMIL, ken pannakaangay dagiti lektiur/panagpapatang maipanggep iti panagsurat, literatura, ken lengguahe nga Ilokano.

Naawis met a kangrunaan nga agsarita ni Presidential Communications Operation Office (PCOO) Assistant Secretary Kristian Ablan, annabo ti Pamilia Ablan a nangiwaywayat idi iti GRAAFIL (Governor Roque Ablan Awards for Iloko Literature).

Mapadayawan met da Bannawag Editor Cles B. Rambaud a kas 2018 Pedro Bucaneg Awardee, ken Eden Cachola-Bulong a kas 2018 Leona Florentino Awardee.

Maipaay met ti Tan-okGumiliano/Gumiliana Award kadagiti sumaganad a mannurat: Ricarte A. Agnes; Mario A. Albalos, Djuna R. Alcantara, Pelagio A. Alcantara, Gregorio T. Amano, Guillermo R. Andaya, Rogelio A. Aquino, Danilo A. Bautista, Arnold C. Baxa, Solomon V. Benitez, Prescillano N. Bermudez, Jose A. Bragado, Meliton Gal. Brillantes;

Dionisio S. Bulong, Norberto D. Bumanglag, Jr., Honor Blanco Cabie, Eden Cachola-Bulong, Jeremias A. Calixto, Guillermo I. Concepcion, Eliseo B. Contillo, Samuel F. Corpuz, Joven F. Costales, Jacinto B. De Peralta, Francisco Dela Cruz, Manuel S. Diaz, Virgilio D. Domaloy, Reynaldo A. Duque;

Segundo La. Foronda, Juan S.P. Hidalgo, Jr., Gregorio C. Laconsay, Nole V. Lansangan, Hermilinda T. Lingbaoan-Bulong, Jaime P. Lucas, Gladys S. Menor, Ben P. Pacris, Arturo M. Padua, Cles B. Rambaud, Elizabeth M. Raquel, Arsenio T. Ramel, Godofredo S. Reyes, Martin T. Rochina, Pacita C. Saludes, Fernando B. Sanchez, Lorenzo G. Tabin, Antonio P. Urata, Arthur P. Urata, Roland P. Urata, Baldovino Ab. Valdez, Hermenegildo A. Viloria, ken Amado I. Yoro.

Para kadagiti interesado a dumar-ay ken para iti nayon nga impormasion maipanggep iti pasken, makiuman ken ni GF SecGen Neyo Mario E. Valdez iti 0977-141-7901. (GF Secretariat)


(Naipablaak iti Bannawag iti Abril 16, 2018 a bilang.)