Inyalat ni Roy Vadil Aragon ti Iguig, Cagayan ken Dupax Del Norte, Nueva Vizcaya ti Umuna a Gunggona iti Maika-7 a Pasalip ALVIYA babaen ti saritana a “Dapo.” Mannurat ken mannaniw iti Ilokano, Filipino, ken Ingles ni Aragon. Awatenna ti P15,000.00 a cash prize ken sertipiko ti pammadayaw.
Dadduma pay a nangabak:
Prodie Gar. Padios ti Sta. Teresita, Cagayan ngem agnanaeden ken ti pamiliana iti Alberta, Canada, Maikadua a Gunggona babaen ti saritana a “Pannig-an.” Dati a kameng ti Editorial ti Bannawag ni Padios. Awatenna ti premiona a P10,000.00 ken sertipiko ti pammadayaw; ken
Errol L. Abrew ti Caba, La Union, Maikatlo a Gunggona. Impangabakna ti saritana a “Piglat ti Alimunmon.” Mannurat met iti Ilokano, Filipino, ken Ingles ni Abrew. Awatenna met ti P8,000.00 a premio ken sertipiko ti pammadayaw.
Ti Pasalip ALVIYA iti Sarita ket tinawen a pasalip iti panagsurat iti sarita nga es-esponsoran ni Alex Vicente Yadao ti Libertad, Abulug, Cagayan ngem agnanaeden iti New York City. Maysa a gannuat daytoy tapno mapakarit pay dagiti mannurat nga Ilokano nga agsurat iti dekalidad a sarita a maipempen iti agamang ti Literartura Ilokana.
Daytoy a pasalip ket imatmatonan met ni Dr. Freddie Pa. Masuli, maysa a dekano iti Cagayan State University-Sanchez Mira ken tubo met laengti Libertad, Abulug, Cagayan ngem agnanaeden ken ti pamiliana iti Sanchez Mira, Cagayan.
Nagpaay met a hurado ita a tawen da nag-Editor ti Bannawag Dionisio S. Bulong, Linda T. Lingbaoan ti University of the Philippines Press, ken Juan Al. Asuncion, Editor ti Literatura ti Bannawag.
Mayawatto dagiti premio ken sertipiko kadagiti nangabak iti Dap-ayan 2018: ti Maika-50 nga Anibersario ti GUMIL Filipinas iti daytoy nga Abril 20-22, 2018 iti Santa Ana, Cagayan. (FPMasuli)
(Naipablaak iti Bannawag, Abril 23, 2018 a bilang.)
No comments:
Post a Comment