Nasapa a panagpalista dagiti ubbing nga agkinder, agpaut iti makabulan

Agpaut iti makabulan ti “early registration” wenno nasapa a panagpalista dagiti ubbing a sumrek iti Kindergarten iti School Year 2015-2016 kadagiti pagadalan a publiko.

Narugian itay Enero 24 (Sabado), agpaut ti nasapa a panagpalista agingga iti Pebrero 27 (Biernes).

Kinuna ni Sekretario ti Edukasion Bro. Armin Luistro a maipapaut ita a tawen ti panagparehistro, saan ket a maysa nga aldaw laeng a kas itay napan a tawen, tapno awan ti rason a di maipalista dagiti ubbing nga agtawen iti lima a sumrek iti Kinder uray pay agindegda kadagiti nasulinek a lugar.

Mayayon ti maipapaut a rehistrasion iti tema daytoy a “Makapag-aral ay Karapatan Mo, Magpalista.”

Itoy nasapa a panagpalista, masapul nga agtawen ti ubing iti di nakurkurang ngem lima iti umay a Hunio 1, 2015. Mangitugot laeng dagiti nagannak wenno mangay-aywan kadagiti ubbing iti birth certificate. No awan man pay ti maiparangda, maipaganetget a maitedto iti aldaw ti panagbabasa. (Aileen R. Rambaud)


(Naipablaak iti Bannawag, Pebrero 9, 2015 a bilang.)