“INTON MATAYAK, kayatko a daytoy koma ti ipabalonda kaniak," kinuna ni Manang Marivic Tangilen, 50, tubo iti Cagubatan, Tadian, Mountain Province bayat ti panangipakpakitana iti tawidna a "pinagpagan," maysa a burial cloth wenno ules a para iti natay a Kankana-ey a maus-usar idi un-unana nga aldaw. Iti laksid ti kinamodernon ti panawen ken uray agindegen daytoy iti ili nga Adams, Ilocos Norte, imetna pay laeng daytoy a pammati ken kannawidan dagiti nagkauna a dadakkelna. Segun iti istoria dagiti nataengan, daytoy nga ules a saan a pulos a mabaloran iti kuarta ken addaan iti naidumduma a disenio a kas iti taotao ken matamata ken nagmaris iti nangisit, nalabaga ken puraw ket simbolo ti matay a Kankana-ey tapno al-alisto daytoy a dumanon iti nagkaysa a biag. Iti ababa a pannao, kasla pasaporte wenno ID-na daytoy nga ules tapno alisto a malasin dagiti natayen a partidona ket agdedennada met laeng uray iti lubong dagiti natay. (Leilanie G. Adriano)
(Naipablaak iti Bannawag, Pebrero 9, 2015 a bilang.)
No comments:
Post a Comment