Myanmar, mabalinton a mapan bisitaen dagiti Filipino

Kamaudiananna, pinirmaanen dagiti gobierrno ti Filipinas ken Myanmar ti katulagan itay nabiit a mangipalubos iti iseserrek dagiti Filipino iti Myanmar a saandan a kasapulan ti visa para iti turismo ken pakaseknan iti negosio.

Nannong ti nasao a panagpinnirma bayat ti kaunaan nga ibibisitana iti Filipinas ni Presidente ti Myanmar Thein Sein.

Maibatay iti Memorandum of Agreement (MOA) mainaig iti Visa Exemption, maipaay kadagiti Filipino nga addaan iti passport ti visa-free entry iti 14-aldaw. Dagiti met umili iti Myanmar, mapalubosanda nga agtalinaed iti Filipinas nga awanan iti visa iti agingga iti 30 aldaw iti babaen ti Executive Order (EO) 408.

Malaksid iti MOA iti Visa Exemption, napirmaan pay ti Memorandum of Understanding (MOU iti Agrikultura; MOA iti Renewable Energy; MOU iti Information Cooperation; MOU iti Trade and Investments; ken MOA iti Philippine Chamber of Commerce and Industry (PCCI) ken ti Myanmar Federation of Chambers of Commerce and Industry.

Malaksid iti pannakipinnirma, nangyawat pay ti gobierno ti Myanmar iti tulong pinansial iti Filipinas para kadagiti biktima ti ginggined iti Bohol ken ti Bagyo Yolanda.

Dati a maaw-awagan iti Burma, masarakan ti Myanmar, maysa nga agwaywayas a pagilian, iti nagbebeddengan ti China, Thailand, India, Laos ken Bangladesh.


(Naipablaak iti Disiembre 23, 2013 a bilang.)