Agdonar, saan nga aggatang iti paputok, kiniddaw ti DoH

Kiniddaw ti Department of Health (DoH) kadagiti umili nga idonarda laengen ti igatangda iti paputok. Malaksid a mailiklikda iti aksidente, makatulongda pay kadagiti biktima dagiti nadumaduma a didigra a kas kadagiti bagyo a Vinta ken Yolanda.

Kuna ni DoH Secretary Enrique T. Ona a saanda ketdi a mabalin a pagelan ti panagrambak dagiti tao ngem nasaysayaat nga amang no agdonarda laengen.

Ginutigot ketdi ti Sekretario dagiti lokal a gobierno a mangiwayatda laengen iti sangakomunidad a panagrambak babaen ti “fireworks” tapno maliklikan ti indibidual a panagpaputok nga isu met ti pakapaspasamakan ti desgrasia.

Segun ken ni Ona, makagasgastos ti gobierno iti di nababbaba ngem P3,000 para iti tunggal pasiente iti pannakaagas ti sugat ken impeksion daytoy a naala iti paputok.

Idi 2012, nakailista ti gobierno iti 904 a pannakadangran idinto a 987 idi 2011. Kadagiti naireport a biktima ti nayaw-awan a bala, bimmaba met ti bilangda iti 25 idi 2012 manipud iti 29 idi 2011.


(Naipablaak iti Bannawag, Disiembre 30, 2013 a bilang.)