MANGRUGI ITI MAIKATLO A LAWAS ITI DISIEMBRE, pusek dagiti simbaan kadagiti makimisa iti Misa Aguinaldo. Kas iti St. William’s Cathedral iti Siudad ti Laoag, adu dagiti mapan makimisa iti nasapa a bigat wenno iti alas kuatro iti parbangon a mangrugi iti Disiembre 16 agingga iti Disiembre 24. Mamatida ngamin a no makompletom ti siam nga aldaw a Misa Aguinaldo a kas paset ti nobena ken ni Santa Maria nga ina ni Jesus, matungpal ti dawatmo. Nangrugi iti Mexico idi 1587 babaen dagiti Espaniol, ti Misa Aguinaldo (sagut ti kayat a sawen ti balikas nga Aguinaldo) pangpaspasungad dagiti debosionado iti naidaklan a sagut nga isu ti pannakaipasngay ti maladaga a ni Jesus, ti mannubbot ti lubong. (Leilanie G. Adriano)
(Naipablaak iti Bannawag, Disiembre 23, 2013 a bilang.)
No comments:
Post a Comment