Pasnaan 5, maangay iti Gonzaga, Cagayan

Maangay ti Pasnaan 5 iti Riverview Resort, Gonzaga, Cagayan, babaen ti panangsangaili ti GUMIL Cagayan, inton Pebrero 7-9, 2014, kas panangrambak metten ti GUMIL Filipinas iti Nailian a Bulan ti Arte, kas kinuna ni Arthur P. Urata, Sr., presidente ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw.

Mainaig iti daytoy, ipalagip ti Seminar-Workshop Committee ti GF, nga agingga laeng iti Nob. 30, 2013 ti panagawatna iti aplikasion para iti Pasnaan 5.

Silulukat ti Pasnaan kadagiti agdadamo a mannurat, wenno mannurat a di pay nakaipablaak iti Bannawag iti nasursurok ngem tallo a sinurat iti genre (klase ti sinurat) a pagaplayanna.

Kas iti Pasnaan 4, uppat a benneg ti literatura ti mapagiinnadalan iti Pasnaan 5: ti sarita (para nataengan ken para ubbing) ken daniw (para nataengan ken para ubbing).

Makiddaw a tunggal aplikante a fellow, pumili iti kayatna a benneg a pakiinnadalan. No sarita, mangidatag iti dua a sarita; no daniw, mangidatag met iti uppat a daniw.

Dua a fellow ti mapili a para iti benneg ti daniw a para ubbing, dua met iti sarita a para ubbing; tallo iti sarita ken tallo met iti daniw.

Idatag dagiti sinurat babaen ti e-mail iti: pasnaan.secretariat@gmail.com, cc: asseng.tabag@gmail.com. Iraman iti sinurat ti ababa a pakasaritaan ti biag ken kaudian a retrato.

Maipaayan ti tunggal fellow iti libre a transportasion agraman board ken lodging.
Para iti nayon nga impormasion, ag-e-mail kadagiti e-mail address iti ngato. (Pasnaan Secretariat)

(Naipablaak iti Bannawag, Nobiembre 11, 2013 a bilang.)