2013 Professional Media Awardee

Inyalat ni Reynaldo E. Andres, Information Officer III ti Mariano Marcos State University (MMSU) iti Siudad ti Batac ken mannurat iti Bannawag, ti Umuna a Gunggona iti 2013 Professional Media Award (PMA), print category, nga  intuyang ti Philippine Council for Agriculture, Aquatic and Natural Resources Research and Development (PCAARRD) ken Department of Science and Technology (DOST).

Daytoy ti maikadua a pammadayaw a nagun-od ni Andres iti isu met laeng a pasalip nga intuytuyang ti PCAARRD ken DOST iti tunggal dua a tawen. Immuna a nagun-od ni Andres ti maikadua a gunggona iti PMA idi 2001.

Naluktan ti pasalip kadagiti amin a mannurat iti salaysay ken damag iti agrikultura (agricultural journalist) iti pagilian nga empleado ti gobierno ken kameng ti media. Masapul a mainaig iti agrikultura, panagkalap (fisheries), forestry, ken rekursos naturales (natural resources) dagiti isalip a sinurat a naipablaak iti pagiwarnak ken magasin iti tawen 2012.

Pinangabak ni Andres dagiti sinuratna a salaysay maipanggep iti moderno a takuat ken pagdurdur-asan ti  agrikultura a naipablaak iti Bannawag ken iti Ilocos Times manipud Enero agingga iti Disiembre 2012.

Kuna dagiti pannakabagi ti PCAARRD a maipaay ken ni Andres ti pammadayaw a kas panangbigbig ti ahensia iti agtultuloy a suportana iti pannakaisaknap ken pannakaitandudo ti agrikultura ken dagiti dadduma pay a teknolohia iti Region 1 tapno mapadur-as ti apit ken ekonomia ti pagilian. Kunada a nakatulong dagiti sinurat ni Andres kadagiti mannalon tapno maammuanda dagiti napabaro a teknolohia nga insayangkat ti Ilocos Agriculture, Aquatic and Natural Resources Research and Development (ILAARRDEC) nga isu ti pagpapaayanna a kas Information Officer.

Awatento ni Andres ti cash prize ken plakena iti maysa a seremonia inton Nobiembre 8 iti Sofitel Philippine Plaza Manila, CCP Complex, Roxas Boulevard, Pasay City kas paset ti panangrambak ti PCAARD iti tinawen nga anibersariona.

(Naipablaak iti Bannawag, Nobiembre 4, 2013 a bilang.)