Panagwagwag

PANAGWAGWAG. Panaggagapas manen ket makumikom ni Joseph Espiritu iti Gabao, Santiago, Ilocos Sur iti panangiwagwagna iti ginapasda iti talonda. Panagbasbas wenno panagbaut kadagiti dadduma, sakbay a nagbalin nga uso ti rice thresher, daytoy panagwagwag ti nagkauna a wagas ti panangisina iti irik iti garami nga agingga ita, ar-aramiden pay laeng dagiti lumugar iti Kailokuan ken Tanap ti Cagayan nga awanan iti rice tresher. (Danny B. Antalan)

(Naipablaak iti Bannawag, Nobiembre 14, 2011 a bilang.)

Bumasbassit ti bilang dagiti ti mannalon, kuna ti TESDA

Impalgak ti Technical Education and Skills Development Authority (TESDA) a madanagan gapu iti panagbaba ti bilang dagiti mannalon iti pagilian.

Segun iti TESDA, saan nga adayo a maibus dagiti mannalon iti pagilian, ta kaaduanna nga agedad iti nasurok a limapulo dagiti agtrabtrabaho ita kadagiti talon.

Kuna ni TESDA Director General Joel Villanueva a gagangay a 50 anios agpangato ti edad dagiti mannalon. Kayatna a sawen, dandanin agsalog ti pigsada.

Kaaduanna kadagiti mannalon ti nangipagel kadagiti annakda nga agbalin a mannalon, iti ayatda nga agbalin a propesional dagitoy, isu a posible a bassitton ti mannalon iti masakbayan.

No mapasamak daytoy, agpeggad ti produksion ti taraon iti pagilian.
Kuna ni Villanueva a daytoy ti maysa a rason no apay a kalikagumanna a lumawa koma ti panagkita ti publiko iti organic farming.

Kunana nga adu a kurso nga ididiaya ti TESDA ti mangmuli iti kabaelan dagiti Filipino a mannalon ken dadduma pay nga aramid iti agrikultura, nangruna ket maipangpangruna ita ti “food culture” iti agrikultura.

Ginutigot ni Villanueva dagiti Filipino nga agsursuro ken mangiwayat ti organic farming, a malaksid a natalged ken makatulong iti salun-at ken saan a makadadael iti Nakaparsuaan, nangato pay ti panagkasapulan iti “green-collar job” iti sangalubongan a merkado isu a masiguradoda iti napintas a trabaho.

(Naipablaak iti Bannawag, Nobiembre 14, 2011 a bilang.)

Kaggo, Kaggokayo Dita!

KAGGO, KAGGOKAYO DITA! Maysa a tindera ken dagiti lakona a kaggo ken siek (maysa a kita ti natangken ti ukisna a bukkaig a maala met laeng iti salado a danum wenno iti sabangan, kas iti kaggo) iti maysa nga aldaw ti tienda iti merkado publiko ti Libertad, Abulug, Cagayan. Mailaklako iti P40 ti sangabay-on a kaggo; P20 met iti basbassit. (Roy V. Aragon)

(Naipablaak iti Bannawag, Nobiembre 14, 2011 a bilang.)

1st Regional Massage Seminar iti R-2: Nob. 15

Maangay ti Ist Regional Massage Therapy Connection Seminar iti Cagayan Valley inton Nob. 15 nga addaan iti tema a “Massage Therapy As a Viable Career.”

Maangay ti seminar iti WaterWorld GrandResort and Hotel, Raniag, Ramon, Isabela.

Mainaig itoy, maawis dagiti massage therapist, massage center/spa owner, trainor, dagiti supervisor ken municipal health officer wenno pannakabagida nga umatendar iti seminar.

Pagtinnulongan ti Department of Health (DOH) ken ti Phil. Association of Licensed Massage Therapists (PALMT) iti pannakisinnaranay ti Spa Ysabella Wellness Center, mapagsasaritaanto iti seminar dagitoy: DOH guidelines for Massage and Wellness centers and for the Massage Therapists, Massage Therapy Curriculum , Licensure Examination, ken ti PALMT a kas mother organization.

Iti sabali a bangir, maangay met ti Special Seminar on Spa Supervisory Management inton Nob. 16 ken 17, 2011 iti met laeng WaterWorld GrandResort.
Para iti reserbasion/nayon nga impormasion, tumawag iti 078-682-7747/ 078-832-3212/ CP 0917-503-2191, 0922-846-1671 wenno iti 0922-808-8297.

(Naipablaak iti Bannawag, Nobiembre 14, 2011 a bilang.)

Lasquero, baro a presidente ti GO

Napili ni Sandy Lasquero a baro a presidente ti GUMIL Oahu, ti Gunglo Dagiti Mannurat nga Ilokano iti Oahu, iti eleksion ti gunglo idi Enero 13 a naangay iti Jesse's Restaurant, Siudad ti Honolulu.

Kadua ni Lasquero a napili nga opisial ti gunglo nga agtakem iti dua a tawen (2011-2013) da: Rizal Q. Fernandez (Internal Vice-President), Eddie Bueno (External Vice-President), Josie Laquero (Recording Secretary), Nena Bueno (Corresponding Secretary), Mila Fernandez (Treasurer), Emelyn Damo (Asst. Treasurer), Jun Bermisa (Auditor), Avelino B. Felicitas, Jr. (Public Relations Officer), Paul Taong ken Angel Mendoza Jr. (Marshalls);

Immediate Past President Gladys Menor, Amado Yoro, Estrella Pada-Taong, Maggie Domingo, Beth Alimbuyuguen, Divina Menor, ken Larry Fiesta (Directors); Charmane Belleza, Rafael Alimbuyuguen, Flor Martineza, Jun Bumanglag, Cles Rambaud, Ric Agnes, Lito Alcantara ken Andy Barroga (Advisers); ken Judge Artemio Baxa (Legal Adviser).

Dagus a pinagsapata ni Apo Rafael Alimbuyuguen, Notary Public ken maysa kadagiti mamagbaga ti gunglo, dagiti baro nga opisial. Maangay met ti pormal a pannakayinstolar dagiti opisial inton Enero 14, 2012 iti Golden Coin Restaurant iti Waipahu.

Iti sabali a bangir, agsagsagana manen ti GUMIL Oahu iti panangipabuyana iti sarsuela a "Biag ni Sakada" iti Kapalama Elementary School, Honolulu, a mangrugi iti alas sais media ti sardam inton Nobiembre 26, 2011. (avefelicitasjr@gmail.com)

(Naipablaak iti Bannawag, Nobiembre 14, 2011 a bilang.)

BANNAWAG Nobiembre 14, 2011

SARITA
4 Ania Ketdin ni Inang!
Felix M. Eslava, Jr.

NOBELA
16 Dagiti Bituen iti Imatangda (3)
Jose A. Bragado
No kayatmo, pagsaritaanton ti panagkasarta, kinuna ni Melchor. Ket napakiet ni Maestra Pacing iti nangngegna.

32 El Guapito (42)
Dionisio S. Bulong
“Ibig mong sabihin, matutulog kayo ni Mandy sa iisang kuwarto?” kinuna ni Muyac ket nagkatawa laeng ni Laila.

DANIW
6 Natay
Nivea Urdas

18 Uray iti Tagainep Laeng
Romel A. Pascua

20 Agawidka Kadin, Imnas, iti Segga ti Papag
Johmar R. Alvarez

22 Biag ni Lam-ang (2)
Bersion ni Leopoldo Y. Yabes

SALAYSAY
8 Gapu Ta Daytoy ti Linteg (10)
Hues Joven F. Costales (Ret.)
Kalpasan ti panangpaltogna iti biktimana… Nagpayapay pay ni Apo Polis

12 Apay, Ma’am, a Nagrikep Metten ti Kolehiotayo?
Neyo Mario E. Valdez
Rumbeng a bantayan ti Commission on Higher Education ti kalidad dagiti kolehio ken unibersidadtayo. Ta, ne, arigna kapadatayon ti kalidad ti edukasion dagiti napangpanglaw pay ngem datayo a pagilian ditoy Asia.
(Basaen ti salaysay iti Bannawag. Ania met ti makunayo iti daytoy a tignay ti CHED?)

38 Nasken nga Adda Paglakuam iti Produktom
D.S. Bulong, Vilmer V. Viloria ken Roy V. Aragon
Ammuem ti sekreto ti Kamikailai Integrated Farm iti Enrile, Cagayan…

40 Naidumduma Daytoy a Barayti ti Bawang
Reynaldo E. Andres
No maladawka nga agmula iti bawang, nasayaat no daytoy a barayti ti imulam…

KOMIKS
24 Miks & Tiks
26 Dagiti Bannatiran iti Bantay Maoac-oacar (45)
28 Tres Muchos (26)

KOLUM
14 Dear Judge
Dear Judge,
Immutang ken ni tatang iti P100,000.00 ni uliteg (a kabsat ni nanang). Kas pammatalged iti pannakabayad ti nasao nga utang, insalda ni uliteg ti bukodna a talon ken ni tatang. Ngem saanda a nagaramid iti nakasurat a kontrata. Naaramid ti kontratada babaen iti sao laeng. Balido kadi ti salda? –Jaime
(Basaen ti sungbat ni Judge Baclig iti Bannawag.)

19 Dear Doc
Maysaak nga ina ti dua a lallaki— agtawen iti 8 ken 12. Adda iti haiskul ti inauna; adda iti elementaria ti inaudi. Mariribukanak ta napalalo ti panagayatda iti kompiuter. Panagkunak, nailuoddan.
Adda kadi makuna a “computer addiction”? Lawlawagandak koma maipanggep itoy. Ania ti aramidek tapno malapdak ti ad-adda pay a panagkarona?
Dios ti agngina iti anusyo nga agassawa a mangsungsungbat kadagiti suratmi. Maliwliwakami met a reader ta adu ti maadalmi. –Ms. Worried Mother ti Santiago City
(Basaen ti umuna a paset ti sungbat da Doc Gener ken Doc Lorna iti Bannawag.)

31 Okeyka, Apong
Kasano a Labanan ti Nakana a Leddaang?

34 TIPS
Ti Abokado a Kas “Hair Moisturizer”. Ala, wen, saanen a panawen ti abokado iti Filipinas. Ngem nasayaat a maammuam itan a nasayaat ti abokado a kas “hair moisturizer,” kas kuna dagiti eksperto iti panagtaripato iti buok. Ipaayan ti abokado iti naan-anay a dam-eg ken protina ti puon dagiti buok a mamagbalin iti buok a nalagda. Ti aramidem: paglaoken a nasayaat ti lasag ti naluom a bunga ti abokado ken lana ti niog. Daytoy ti isapsapom iti buokmo manipud iti puon agingga iti murdong. Kalpasanna, abungotam ti buokmo iti shower cap wenno plastic bag. Bay-an a kastoy iti 15 agingga iti 20 a minuto, sa kalpasanna, balnawan a naimbag ti buok. (REMEDIOS S. REYNO, Currimao, Ilocos Norte)
(Basaen iti Bannawag dagiti dadduma pay a tips nga inurnong ni Ma’am Eli.
Adda kadi met maiburayyo a tips kadagiti agbasbasa iti Bannawag? Ipatulodyo ken ni Ma’am
Eli.)

37 Kastoy, Kapid, Ditoy Hawaii
Nagpapintas ti Hawaii gapu iti APEC!

42 Padasem Daytoy, Kailian
Awan beach resort wenno underground river ti iliyo a mabalin a pasiaren dagiti turista? Padasenyo ti agaramid iti kas iti Dasoland…

44 Ading Kosinera
Padasenyo man daytoy, kas kuna ni Ading Kosinera:
PATOLA WITH CHICKEN STRIPS
Dagiti ramen:
2 kutsarita a bawang, naiw-iwa iti napino
2 kutsarita a sibuyas, nagalip iti napino
1 a pitso ti manok, naipaburek ken pirsapirsayen iti babassit
4-5 kutsara a patis
1 kilo a kabatiti (bilidan), naiw-iwa iti nagbubukel
2-3 kutsara a danum wenno nagpaburkan iti manok
3 kutsara a manteka
Panangisagana:
1. Igisar ti manok iti bawang ken sibuyas. Templaen iti patis.
2. Ipisok ti kabatiti. Ilaok a nasayaat.
3. Inayon ti danum wenno nagpaburkan iti manok. Ipaburek.
4. Adawen ken idasar a napudot.
(Adda kadi met paboritoyo a luto? Ibinglayyo man ti resipeyo ken ni Ading Kosinera iti: mercy_gano@yahoo.com tapno maramanan met dagiti agbasbasa iti Bannawag. Ilanadyo ti pudno a nagan ken adres iti pagtaengan ken e-mail address (no adda) agraman cp number-yo.)

PAGLINGLINGAYAN
45 Wanted a English Tutor, Kdp.
46 Showbiz
48 Sinniriban
48 Sapukas
48 Sudoku
48 Aggarakgaktayo

DADDUMA PAY
2 Ti Makunami
10 Uniporme iti Pagadalan, Nasken Kadi?
15 Tao, Lugar, Pasamak
17 Siled ti Kararag
21 Ti Naidumduma a Kape a Barako ti Malibcong
33 Txtm8
35 Ti Gasatmo Ita a Lawas
36 Ammuem Pay Dagitoy

“Semana ti Ar-aria,” ti IN: Okt. 25- Nob. 1

Rinambakan ti gobierno probinsial ti Ilocos Norte, iti panangidaulo ni Gob. Imee R. Marcos, ti “Semana ti Ar-aria” itay Oktubre 25 a nagpatingga iti Nobiembre 1, 2011.

Panggep ti nasao nga aktibidad ti pannakalagip ken pannakataginayon dagiti pammati ken kultura ni Ilokano no kasano a lagipenda ti Piesta dagiti Minatay ken Santo. Aw-awaganda pay ketdin daytoy iti Piesta dagiti Nabiag.

Ti eskediul ti parambak:

Idi Oktube 25 a pormal a nairugi ti libre a pannakaipabuya dagiti Filipino horror films (Sineng Pambansa Film Festival) babaen ti pannakitinnulong ti Film Development Council of the Philippines iti Robinsons Ilocos Norte Cinema 3 ken iti Teatro Ilocandia iti Mariano Marcos State University.

Idi met Oktubre 26, workshop iti Teatro Ilocandia babaen ti panangiwanwan dagiti mabigbig nga independent filmmaker, direktor ken aktor a kas kada Briccio Santos, Soxie Topacio, Brillante Mendoza, Martin Cabrera, Chito Roño, Joey Martinez, kdp. Naitultuloy met latta ti pannakaipabuya dagiti horror films.

Idi Oktubre 26, naangay ti pangrikep a programa (closing night) ti Sineng Pambansa Film Festival iti Malakanyang ti Amianan;

Iti alas siete iti rabii iti Oktubre 29: Ilocos Rocks Black Party iti U-belt, Rizal Park, Laoag City.

Iti alas siete ti rabii ti Oktubre 30: Beer-kini Fest iti Plaza del Norte.
Iti alas sais ti rabii ti Oktubre 31: Parada Iloca-locana (Grand horror costume parade) manipud iti Laoag City Public Cemetery agingga iti Kapitolio;

Ken iti Nobiembre 1: Tumba-tumba (Feast of the Dead) iti Paoay, Ilocos Norte. (Leilanie G. Adriano)

(Naipablaak iti Bannawag, Nobiembre 7, 2011 a bilang.)