DoH, agawaten iti aplikasion para iti RN Heals

Kiniddaw ti Department of Health (DoH) kadagiti nars a nairamanen iti programa a Registered Nurses for Health Enhancement and Local Service (RN Heals) ti nasao a departamento a saandan nga uliten ti agaplikar tapno maipaayan iti gundaway dagiti dadduma a nars a saan pay a nairaman iti nasao a programa.

Indawat ti DoH daytoy gapu ta asideg manen ti panagidatag iti aplikasion para iti sumaruno nga RN Heals program— itoy a Nobiembre 1-30.

Segun iti pakaammo ti DoH, binalakadan ti departamento dagiti “beterano” iti RN Heals program, wenno dagiti napili iti Batch 1-3 ti nasao a programa, nga ikkanda iti gundaway dagiti dadduma a nars.

Naammuan nga iti napalabas a tallo a batch ti RN Heals, umabot iti 10,000 a nars ti naala iti Batch 1; 11,500 iti Batch 2; ken 10,000 iti Batch 3.

Para iti maikapat a batch, target ti DoH ti mangala iti 22,500 a rehistrado a nurse a maiwaras kadagiti marigrigat a komunidad iti pagilian.

Panggep ti RN Heals a manayonan ti puersa dagiti nars kadagiti pagagasan ti DoH ken dagiti lokal a turay.

Iti babaen ti programa, maikkan dagiti nars iti allowance a P8,000 malaksid iti PhilHealth insurance ken GSIS Group Accident insurance.

Yabaga met dagiti ospital ti DoH ti magastos iti kanen dagiti nars kabayatan a naka-duty dagitoy, idinto nga umawat iti nayon a tulong para iti pagtaengan ken taraon dagiti nars a maibaon kadagiti probinsia.

(Naipablaak iti Bannawag, Oktubre 8, 2012 a bilang.)

Agpasusokayo, impaganetget ti DoH, WHO ken UNICEF

Ipagpaganetget ita ti Department of Health (DoH), World Health Organization (WHO) ken United Nation Children’s Fund (UNICEF) ti panangpasuso koma dagiti inna kadagiti annakda a maladaga idinto nga impeksada ti pannakaalarmada iti baro a gakat a mangbaliktad iti maipakpakat a linteg a mangsalsalaknib kadagiti umili kontra iti agresibo a panagilako, manangallilaw nga anunsio, ken awanan pagibasaranna a pakaammo dagiti kompania ti gatas.

Iti nagkaysa a pakaammo ti DoH, WHO ken UNICEF, imbulgarda a baliwan ti consolidated draft ti “Comprehensive Program on Breastfeeding Practices and Regulating the Trade, Marketing and Promotions of Certain Foods for Infants and Children” ti maipakpakat a Milk Code of 1986 ken Expanded Breastfeeding Act of 2009.

Maatap nga itantandudo ti gakat ti pannakaikabassit ti pannakaipakat ti Milk Code kadagiti artificial feeding product ken di panagbayad iti lactation break dagiti agtrabtrabaho nga inna.

Kagiddan daytoy, kuna ti DoH, WHO ken UNICEF nga umabot iti 8,400 a biag ti masalakniban iti tinawen no tunggal pamilia a Filipino, pasusuenda dagiti maladaga.

(Naipablaak iti Bannawag, Septiembre 17, 2012 a bilang.)

Gudbay, malaria!

Natalek ti Department of Health (DoH)  nga agbalinton a malaria-free ti Filipinas iti tawen 2020.

Kinuna ni Health Secretary Enrique Ona a dakkel ti posibilidadna nga awanton ti kaso ti malaria iti pagilian agingga iti tawen 2020 kalpasan a nakairekordda iti 80% a bimmabaan dagiti kaso ti malaria iti tawen 2011.

Kuna ni Sekretario Ona a daytoy ti kababaan nga agpang ti malaria a nairekordda iti pagilian iti uneg ti 42 a tawen.

(Naipablaak iti Bannawag, Septiembre 10, 2012 a bilang.)

Filipino, maika-9 a kalaingan a mannigarilio iti lubong

Iti laksid ti kaadda dagiti linteg a manglimitar iti panagsigarilio, karaman dagiti mannigarilio a Filipino kadagiti kalaingan a mannigarilio iti lubong— maikasiam, segun iti rekord nga impalgak ti American Cancer Society ken World Lung Foundation itay nabiit.

Daytoy met laeng a rekord (maibatay iti surbey a naiwayat idi 2009) ti impalgak ti Department of Health (DoH) a kas pangsusuposapna kadagiti iggemna a dokumento no apay a nasken koman a maaprobaran ti “sin tax bill” wenno pannakaingato ti buis ti sigarilio ken arak.

Iti nasao a surbey, umuna iti listaan dagiti mannigarilio dagiti Insik nga addaan iti bilang a 311,203,202. Sumaruno ditoy ti India, Indonesia, ti Russian Federation, Estados Unidos, Japan, Bangladesh, Pakistan, sa ti Filipinas nga adda iti maikasiam.

Iti surbey idi 2009, mapan a 17.4 a milion dagiti Filipino nga agtawen iti nasursurok ngem 15 ti agsigsigarilio; a 14.6-milion kadagitoy ti lallaki ken 2.8 milion dagiti babbai.

Sangapulo met a Filipino ti matmatay iti inaldaw gapu kadagiti sakit nga adda pakainaiganna iti panagsigarilio, kas kuna ti DoH.

(Naipablaak iti Bannawag, Hulio 9, 2012 a bilang.)

Photo: Ni Ariel S. Tabag, maysa a mannurat, bayat ti panagpayubyobna.

Agannad uray iti naipaburek a danum – DoH

Ballaag ti Department of Health (DoH) mainaig iti naipaburek a danum a maus-usar a kas inumen: Kuna ni Dr. Eduardo Janairo, regional director ti DoH Center for Health Development, nga uray naipaburek ti danum iti naikeddeng nga oras, mabalin a maipauneg latta dagiti toxic chemical a nailaok iti danum. Kunana a masapul a maipaburek ti danum iti lima agingga iti sangapulo a minuto wenno agingga iti duapulo a minuto. Sa inton lumamiis, maipaburek manen.

Kuna ni Janairo a pudno a mapapatay dagiti pathogen no maipaburek ti danum. Ti adatna, saan a maikkat ti kunana a turbidity wenno cloudiness. Ket mabalin a ti in-inumen, dagiti nabati iti proseso ti panagipaburek nga addaan iti imet nga arinsaed ti aluminium, ken toxic metal, kemikal kas iti lead, mercury ken asbestos a nangkontaminar iti danum. Masapul met ti enerhia iti panagpaburek iti danum ngem nangina unay daytoy.

Iti maysa a pakaammo, dinakamat ni Janairo a ti turbidity ket isu ti dam-eg ti likido gapu kadagiti rinet wenno di naburak a solido a saan a makita dagiti mata ti tao, a kas koma iti asuk iti angin.

Kuna pay daytoy a turbidity ti mangipalnaad iti kalidad ti danum. Kuna ngarud ti World Health Organization (WHO) Sustainable Development and Healthy Environments Water, Sanitation and Health Standards nga uray no naipaburek ti danum, makasapul latta daytoy turbid water iti mangdis-impektar a kemikal a kas iti chlorine solution. Nupay kasta, masapul met a mapalitnaw babaen ti panang-filter iti daytoy.

(Naipablaak iti Bannawawag, Nobiembre 21, 2011 a bilang)

1st Regional Massage Seminar iti R-2: Nob. 15

Maangay ti Ist Regional Massage Therapy Connection Seminar iti Cagayan Valley inton Nob. 15 nga addaan iti tema a “Massage Therapy As a Viable Career.”

Maangay ti seminar iti WaterWorld GrandResort and Hotel, Raniag, Ramon, Isabela.

Mainaig itoy, maawis dagiti massage therapist, massage center/spa owner, trainor, dagiti supervisor ken municipal health officer wenno pannakabagida nga umatendar iti seminar.

Pagtinnulongan ti Department of Health (DOH) ken ti Phil. Association of Licensed Massage Therapists (PALMT) iti pannakisinnaranay ti Spa Ysabella Wellness Center, mapagsasaritaanto iti seminar dagitoy: DOH guidelines for Massage and Wellness centers and for the Massage Therapists, Massage Therapy Curriculum , Licensure Examination, ken ti PALMT a kas mother organization.

Iti sabali a bangir, maangay met ti Special Seminar on Spa Supervisory Management inton Nob. 16 ken 17, 2011 iti met laeng WaterWorld GrandResort.
Para iti reserbasion/nayon nga impormasion, tumawag iti 078-682-7747/ 078-832-3212/ CP 0917-503-2191, 0922-846-1671 wenno iti 0922-808-8297.

(Naipablaak iti Bannawag, Nobiembre 14, 2011 a bilang.)

Health center, nakiddaw a maluktan para kadagiti biktima ti dengue

Kiniddaw ti Departamento ti Salun-at (DoH) kadagiti local government unit (LGUs) a luktanda dagiti health center iti lugarda uray iti agtapus ti lawas para iti dengue screening gapu iti agtultuloy a yaadu ti bilang dagiti biktima itoy a sakit.

Segun ken ni Dr. Eric Tayag, director ti DoH-National Epidemiology Center (NEC), kayatda a maliklikan ti sobra a panagdudupudop dagiti pasiente kadagiti ospital isu a panggepda ti maaddaan iti weekend screening.

Segun iti record ti DoH, addan 45,333 a kaso ti dengue iti pagilian manipud Enero agingga iti Agosto. Basbassit ketdi no idilig iti napalabas a tawen.

Nupay kasta, naiget latta ti panagbantay ti DoH nangruna itoy a bulan a makuna a “peak season” wenno kaaduan iti mabiktima iti nasao a sakit.

(Naipablaak iti Bannawag, Agosto 29, 2011 a bilang.)

“Electronic cigarette,” delikado iti salun-at, kuna ti Dept. of Health

Nangiruar ti Department of Health Regional Office 3 iti ballaag iti publiko, nangruna kadagiti agsigsigarilio a kayatdan a liklikan ti nasao a bisio, mainaig iti panagusar iti e-cigarette wenno electronic cigarette.

Iti maysa a press statement, kinuna ni DoH Regional Office 3 Director Rio Magpantay a saan a nasayaat iti salun-at ti maysa a tao ti panagusar iti e-cigarette.

Kuna ni Magpantay a saan a makatulong ti e-cigarette a mangliklik iti panagsigarilio ken saan a natalged nga usaren.

Segun kadagiti aglaklako iti e-cigarette, ti baro a gadget ti umno kadagiti mannigarilio a kayatdan a liklikan ti nasao a bisio gapu ta maibilang daytoy a “nicotine-free” ken kunada nga addaan iti e-juice a maibilang nga organiko.

Inlawlawag ni Magpantay a nupay di agipug-aw iti asuk ken addaan iti angot a kas iti pudno a sigarilio, addaan ti iruruar daytoy a vapor (alingasaw) ti e-cigarette kadagiti makasabidong a kemikal a mabalin a mangipaay iti kanser iti tao.

Tunawen ti e-cigarette ti maysa a likido a nicotine solution manipud iti maysa a disposable cartridge, a mangpaltuad iti alingasaw a susopen ti mannigarilio.

Masindian ti e-cigar iti ungto daytoy, ket no masusop, adda agrissik iti ungto daytoy isu nga aglanglanga a pudno a sigarilio.

Agdama a mailaklako ti e-cigarette kadagiti tiendaan iti Quiapo ken Divisoria iti Manila ken kadagiti dadduma pay a shopping mall iti Kamanilaan iti P350-P750 ti maysa. Mapan met a P15 ti refill a liquid solution ket makaited daytoy iti alingasaw agingga iti 200 a susop.

(Naipablaak iti Bannawag, Agosto 22, 2011 a bilang.)

Dengue, makontrol babaen ti panagdaldalus,kuna ti Dept. of Health

Iti laksid ti agtultuloy a yaadu dagiti mairepreport a kaso ti dengue iti pagilian, natalek ti Department of Health (DoH) nga agkuna a mabalin a makontrol ti panagwaras ti sakit, a maysa a pangta iti publiko.

Segun ken ni DoH Secretary Enrique Ona a no agtitinnulong laeng dagiti umili, makontrol ti yaadu ti kaso ti dengue.

“Pakaseknan ti amin ti dengue, ngem no agtitinnulongtayo, makontrol daytoy,” kuna ti Sekretario.

Kagiddan daytoy, kiniddaw ni Ona dagiti umili nga agtitinnulongda a mangdalus iti aglawlawda, kasta met dagiti para publiko a pagadalan, simbaan, tiendaan, ken dagiti komunidad, kas paset dagiti aktibidad ti DoH kontra iti dengue.

Impalagip ni Ona a ti kabilegan a panglaban iti nasao a sakit a maala manipud iti kagat ti lamok ket isu ti panagdaldalus ken panangdadael kadagiti lugar a mabalin a pagnaedan dagiti lamok a nagimet iti dengue.

Segun iti report ti DoH, nga iti umuna nga innem a bulan daytoy a tawen, umabot iti 27,071 dagiti kaso ti dengue iti pagilian.

Iti nasao a bilang, 172 ti kompirmado a natay.

Nababbaba ketdi ti nasao a bilang iti 4.2 porsiento no maidilig iti nairekord a 28,234 a kaso iti napalabas a tawen iti isu met laeng a tiempo.

Karaman kadagiti nabiktima ti sakit kadagiti agedad laeng iti awan pay maysa a bulan agingga iti 89 anios.

Ad-adu latta dagiti lallaki a mabiktima nga adda iti 53 porsiento iti pakabuklan a kaso gapu ta ti la pappapanan dagiti ubbing a lallaki; ngarud, masansan nga addada kadagiti lugar a pagaayat a pagnaedan dagiti lamok.

Nipablaak iti Bannawag, Hulio 4, 0 a bilang.

DoH, namallaag kontra sakit iti panagtutudo

Gapu iti ilalas-uden kadagiti bulan a matutudo, namalaag ti Departamento ti Salun-at (DoH) kadagiti umili nga agannad kadagiti sakit a mabalin a maalada iti tiempo ti tudtudo.

Partikular a binallaagan ti DoH dagiti nagannak a siguraduenda koma a natalged dagiti annak kontra kadagiti sakit a maala iti panawen ti panagtutudo, nangruna ket sumsumrek dagitoy iti eskuelaan.

Segun ken ni DoH Secretary Enrique Ona, masansan a dagiti sakit a maala iti tiempo ti tudtudo ket uyek, panateng, trangkaso, ken leptospirosis.

Namallaag met ti Sekretario nga agannad iti dengue fever a masansan met a mangbiktima iti panawen ti panagtutudo.

Balakad ni Ona a no madin ti marikrikna ti ubing, ken addaan makita a simtoma ti uyek ken panateng, dagus koman nga ikkan iti agas, ket saanen a pastreken iti eskuelaan.

Nasayaat met no agaruat kadagiti long sleeves ken leggings dagiti ubbing tapno saan a makagat iti lamok.

Innayon pay ni Ona a siguraduen koma dagiti nagannak nga adda balon dagiti ubbing a kapote ken payong a mausarda a proteksion iti tudo.

Bannawag, Hunio 27, 2011, panid 38.