Rosario, Lana, ken Imahen... Gumatangkayon!

ROSARIO, LANA, KEN IMAHEN... GUMATANGKAYON! Maysa daytoy baket kadagiti naalisto nga aglaklako iti rosario, lana, imahen, kandela, pulseras ken dadduma pay kadagiti agsangpet a debosianado manipud kadagiti nadumaduma nga ili iti Cagayan ken iti pagilian a sumuknal iti agdindinamag nga Apo Baket ken iti nadaeg a Simbaan ti Piat iti Piat, Cagayan. (Dexter Marin Fabito)


(Naipablaak iti Bannawag, Mayo 27, 2013 a bilang.)

MAYO 27, 2013

SARITA
6 Dagiti Banti
  Federico T. Ilac, Jr.

NOBELA
26 Ay, ni Reberen! (1)
     Ariel S. Tabag
32 Galiera Queen (12)
     Dionisio S. Bulong

DANIW
4 Ken ni Liwliwa
   Arnold C. Baxa
29 Daniw ken ni L
    Rosalie V. Calpito
30 Ti Burayok iti Pinsal
         Neyo Mario E. Valdez
48 Dandaniw a Para Ubbing
     Edelaine U. Duyor/Jobert M. Pacnis

SALAYSAY
8 Gapu Ta Daytoy ti Linteg (89)
    Hues Joven F. Costales (Ret.)
12 Ania, Adda Manen Nakalibas a Balud?
    Neyo Mario E. Valdez
40 Nadumaduma a Wagas ti Direkta a Panagmula
     Reynaldo E. Andres

KOMIKS
17 Tres Muchos (106)
20 Aritosan (30)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Pork & Spoon, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
10 Sabali nga Ili, Sabali nga Ugali
15 Tao, Lugar, Pasamak
24 Dap-ayan 2013: Maika-45 a Kombension Nasional ken Literary Seminar ti GUMIL Filipinas: “Agkaykaysa, Pumigpigsa” (3)
28 Siled ti Kararag
31 Ammom Met Laeng ti Agdengngeg?
33 Txtm8
35 Ti Gasatmo Ita a Lawas
36 Ammuem Pay Dagitoy
39 Wen, Sabali Itan ti Kindergarten!

4th Pasnaan: Mayo 29-31

Maangay ti 4th Pasnaan itoy a Mayo 29-31-26, 2013 (saan a Mayo 24-26 kas immunan a naipakaammo) iti Doña Josefa Edralin Marcos Elementary School, Currimao, Ilocos Norte. Pagtitinnulongan daytoy nga iwayat ti GUMIL Filipinas, NCCA, Bannawag, GUMIL Ilocos Norte ken DepEd Ilocos Norte-Currimao District, ken dadduma pay a mannurat nga Ilokano.

Sangapulo nga agdadamo a mannurat nga Ilokano ti napili a Fellow iti Maikapat a Pasnaan, ti workshop a para kadagiti mannurat nga Ilokano.

Dagiti Fellow: Alain Fontanilla Razalan (para iti Sarita a Para Ubbing), Io M. Jularbal (iti Sarita), Sheila Mae Ricarze (Sarita), Gorgonia B. Serrano (Sarita), Rosario A. Bingayen (Daniw a Para Ubbing), Mercy Vergara Yabes (Daniw), Rhea Rose D. Berroy (Daniw), Florenda Limog Pedro (Daniw), Roselyn Carillo Campano (Daniw), ken Romnick Mahor Asuncion (Daniw)

Addan iti maikapat a tawenna, ti Pasnaan ti agserbi a “pangmulian” iti pluma dagiti agdadamo a mannurat nga Ilokano tapno agballigi dagitoy a sumarsaruno a mangtagiben ken mangitandudo iti Literatura ken Lengguahe ni Ilokano. Agpaay met a panelist dagiti mabigbigbig a mannurat nga Ilokano a pakairamanan dagiti editor ti Bannawag.

Pudtol, Apayao

PUDTOL, APAYAO. Siaagawa dagiti agibilbilag iti daytoy a pribado a pagibilagan (paved dryer) iti irik, mais ken dadduma pay a bukbukel tapno maakas a dagus dagiti imbilagda a mais mais sakbay nga umay ti tudo. No tiempo ngamin ti panagaapit iti Abril ken Mayo iti Apayao, pasaray nainit ti bigat sa itudona iti malem. (Leilanie G. Adriano)


(Naipablaak iti Bannawag, Mayo 20, 2013 a bilang.)

Baro a gakat iti imigrasion iti US, pabor kadagiti Pinoy

Daytoy ti pammati dagiti eksperto iti imigrasion maipanggep iti maysa a probision ti maad-adal ita a baro nga Immigration Bill iti US Congress.

Sagudayen ti nasao a probision, maikkan iti preperensia a maikkan iti visa ken makapagnaed iti Estados Unidos dagiti nakaadal ken manamnama a makatulong iti idudur-as ti nasao a pagilian.

Panggep ti nasao a probision a baliwan ti aglimapulo a tawenen a probision ti linteg iti imigrasion a mangited iti preperensia iti “family ties” wenno iti panagtitipon dagiti kameng ti maysa a pamilia.

Kuna dagiti eksperto iti imigrasion a no bilang maaprobaran ti nasao a singasing a “merit system,” mapaboran, kangrunaanna dagiti agnaed iti Asia, kas koma iti Filipinas, India ken China nga adu kadagiti umilina ti nakaadal ken addaan iti laing iti inhenieria ken teknolohia.

Kangrunaan met a mapukawan dagiti Mehikano ken dagiti Central American, kas kuna dagiti mangam-amiris iti singasing a  probision.


(Naipablaak iti Bannawag, Mayo 20, 2013 a bilang.)

Utong!

UTONG! Repreppeten dagitoy nga agapo ti Brgy. Ammubuan, Ballesteros, Cagayan dagiti kaburburasda a bunga ti utong kadagiti tambak ti piskeria iti abagatan ti pagtaenganda. Kangina ti utong kadagitoy a panawen ta manmano ti suplay. Panaraten dagiti bangkag itoy a deppaar ket di makapagbiag dagiti utong no kastoy a kalgaw isu a bentahe dagitoy nga agapo ta adda nadam-eg a tambak dagiti piskeria a pagmulmulaanda. Makita pay ti sangkabassit a bunga ti kalamansi a naburasda iti arubayanda. (Jobert M. Pacnis)


(Naipablaak iti Bannawag, Mayo 20, 2013 a bilang.)

Panagsapata ken umuna a regular meeting ti GF Board: Mayo19

Agsapata dagiti baro nga opisial ti GUMIL Filipinas, ti gunglo dagiti mannurat nga Ilokano iti Filipians ken ballasiw-taaw, iti Hotel Carmelita, Diversion Road, Pengue Ruyu, Tuguegarao City itoy a Mayo 19, 2013, 10 a,m. Ni PNP Regional Director Atty. Rodrigo P. De Gracia ti mangannong iti nasao a panagsapata.

Maaangay met ti umuna a regular a miting dagiti opisial ken kameng ti hunta direktiba ti gunglo kalpasan ti panagsapata tapno mapagsasaritaan dagiti proyekto ti liderato para iti panagtakemda iti dua a tawen (2013-2015). Mabukel met dagiti nadumaduma a komite a mangrienda kadagiti pakaseknan ti gunglo.

Ipaganetget ni Arthur P. Urata, Sr., baro a presidente ti gunglo, ti itatabuno dagiti amin a napili nga opisial: Mario Tejada (bise-presidente), Roy V. Aragon (sekretario-heneral,  Eden C. Bulong (tesorera), Estela Bisquera-Guerrero (auditor), Benjamin P. Pacris (business manager), Reynaldo E. Andres (PRO), ken dagiti kameng ti hunta direktiba a da Sherma E. Benosa, Emy Amad Z. Bucaneg, Eliseo B. Contillo, Freddie P. Masuli, Aileen R. Rambaud, Martin T. Rochina, Ariel S. Tabag ken Vilmer V. Viloria.

Maigunamgunam pay ti idadar-ay dagiti presidente dagiti sanga ti GF: Villamor Visaya (Isabela), Elizabeth M. Raquel (Ilocos Norte), Edilberto H. Angco (Ilocos Sur), Djuna R. Alcantara (La Union), Marianito Machacon (Pangasinan), Retired RTC Judge Vivencio Baclig (Metro Manila) ken Joey Guzman (Abra).
Manamnama met ti pannakiuman ti liderato kadagiti sanga ti GF iti ballasiw-taaw a kas kada Arnold Baxa (Maui), Rizal Fernandez (Oahu) ken Nexon D. Agcaoili (Hong Kong),

Mainaig iti daytoy, mapagpapatangan pay iti nasao a miting ti kasasaad dagiti saanen nga aktibo wenno adda parikutna a  gunglo a kas iti Hawaii, Guam, California, Greece, Nueva Vizcaya ken Baguio-Benguet tapno marisut amin a pakaseknan dagitoy iti kabiitan a panawen. (Reynaldo E. Andres)

(Naipablaak iti Bannawag, Mayo 20, 2013 a bilang.)