Dr. Zafaralla, padayawan ti GF a 2012 Pedro Bucaneg Awardee

Padayawan ti GUMIL Filipinas ni Dr. Paul Blanco Zafaralla, a 2012 Pedro Bucaneg Awardee bayat ti Maika-44 a Komperensia Nasional ti gunglo a maangay itoy nga Abril 20-22 iti Don Mariano Marcos Memorial State University, Bacnotan, La Union.

Ti Pedro Bucaneg Award ti kangatuan a pammadayaw a mabalin nga ipaay ti GF, ti gunglo dagiti mannurat nga Ilokano iti Filipinas ken iti ballasiw-taaw, iti asino man a mannurat nga Ilokano a dakkel ti naitulongna iti pannakasaluad ken pannakapadur-as ti Literatura Ilokana.

Ti met Leona Florentino Award (katukad ti Pedro Bucaneg Award) ti maipapaay kadagiti mannurat nga Ilokana, nga itoy a tawen, awan ti ipaayan ti GF iti kasta a pammadayaw.

Maysa a mannurat ken kritiko iti arte, natenneb iti Unibersidad ti Filipinas iti Diliman, Quezon City, ni PBZ a nagturposanna iti Fine Arts ken nanggun-odanna met laeng iti MA ken Ph.D. in Communication.

Nagretiro a Professor 10 iti Humanities iti UP Los Baños iti Laguna, mangisursuro ita ni PBZ, umuna nga Art Critic-in-Residence ti UP System, kadagiti unibersidad iti asideg ti Los Baños a pagtaenganna ken ti kaingungotna a ni UPLB Professor Emeritus iti Environmental Science, Dr. Macrina Tamayo-Zafaralla ken dagiti uppat nga annak ken innem nga appokoda.

Iti listaan dagiti immawat iti Pedro Bucaneg Award sipud idi 1978, 10 a tawen kalpasan ti pormal a pannakaipasdek ti GUMIL Filipinas, ni PBZ, tubo iti Barangay Upon, Pinili, Ilocos Norte, ti maika-71 a pangipaayan ti gunglo iti nasao a pammadayaw. (Ma. Rose A. Cabie)

(Naipablaak iti Bannawag, Abril 23, 2012 a bilang.)

Baro a Libro Maipanggep ken ni Dr. Godofredo S. Reyes

Ti akkub ti baro a libro a maipanggep ken ni Dr. Reyes. Baba: Ni Dr. Paul Blanco Zafaralla, autor ti libro.


Rimmuaren iti imprenta ti libro a Godofredo S. Reyes, MD, FPCS, RPCS, FICS, D.Hum. (HC): Pride of Ilocandia. Daytoy agpuskol iti 500-a-panid a libro, hardbound, ti opisial a biograpia ti mabigbig a doktor, Ama ti Medicare Law, delegado iti Constitutional Convention, Laureado a Mannaniw ti Ilokandia, malaksid kadagiti adu pay a pakabigbiganna. Nailaon pay iti agrukod iti 8-1/2” x 11” a libro ti ag-62-a-panid a napili a ladladawan (dekolor ken puraw-ken-nangisit) a pakataldiapan iti namaris a biag ti doktor a tubo iti Sta. Maria, Ilocos Sur, nga am-ammo pay kadagiti readers ti Bannawag a kas doktor dagiti marigrigat babaen daydi nalatak a kolumna a “Ti Salun-atyo.”

Ni Dr. Paul Blanco Zafaralla, mannurat met iti laeng iti Bannawag a tubo iti Pinili, Ilocos Norte, mabigbig nga art critic, autor dagiti libro, ken propesor iti humanities, art education, Philippine Literature ken World Literature iti Pamantasan ng Cabuyao, City of Cabuyao, ti nangsurat iti libro.

Mayalnag ti libro iti dua nga agsina a pasken. Umuna, iti St. Mary’s College, Sta. Maria, Ilocos Sur, itoy a Peb. 14, iti alas 9 iti bigat. Maigiddan daytoy iti maika-64 nga anibersario ti SMC a binangon ni Dr. Reyes, idi agtawen iti 30 ken agpapaay idi a Mayor ti Sta. Maria, kaduana ti sumagmamano a kakailianna.

Maangay ti maikadua a pannakayalnag ti libro iti BTVWWII Museum, Veterans Federation of the Philippines Compound, Taguig City, itoy a Peb. 15, iti alas 2 iti malem. Agpaay ni Col. Emmanuel V. de Ocampo, VFP President, a kas naisangayan a sangaili.

Adtoy ti makuna ti sumagmamano a mararaem a tattao maipanggep ken ni Dr. Reyes a nailanad iti nasao a libro:

National Scientist Ricardo M. Lantican: “Maiparang ni Dr. Godofredo S. Reyes itoy a libro a kas makipagili nga addaan iti adu a talento. Maysa a mararaem ken mabigbig a doktor ti medisina ken agpampanday-linteg idinto a kas pintor, inlanadna dagiti pampanunot ken riknana iti tradision ni Amorsolo. Uray pay idi maluomanen iti edad, intultuloyna latta ti panagpaayna kadagiti padana a beterano….”

Dati a Presidente ti Unibersidad ti Filipinas Emerlinda R. Roman: “Dagiti gapuanan ni Dr. Reyes, ipakitana ti ayat ken panangikumitna iti bagina nga agserbi—dagiti talugading a patiek a nakayanakanna ken ad-adda pay a nagpatak babaen ti adal a natawingna iti UP…. Pakaidayawantayo ti panagbalinna a pasettayo.”

Iti met surat ni UP Regent Gari M. Tiongco ken ni Dr. Reyes a nangipakaammuanna a maysa isuna kadagiti pito a napili a pakaipaayan ti 2009 Lifetime Achievement Award manipud iti UP Alumni Association: “Bigbigenmi dagiti gapuananyo iti napiliyo a tay-ak ken ti lideratoyo kadagiti gannuat a nakatulong iti pagsayaatan dagiti Filipino ken iti dakdakkel a gimong.” –O

(Naipablaak iti Bannawag, Pebrero 20, 2012 a bilang.)