Trangkaso, ikasoyo koma, kuna ti DoH

Binallaagan ti Department of Health (DoH) ti publiko nga agannad kontra iti influenza wenno trangkaso nga agsaksaknap ken mangidatdateng ita iti didigra iti Estados Unidos.

Mainaig iti daytoy, imbalakad ni Health Secretary Enrique Ona kadagiti umili nga iti kanito a makariknada iti gurigor nga adda kakuyogna a sakit iti karabukob (sore throat) wenno uyek, naysaysaat laengen nga aginanada iti pagtaenganda.

Kinuna ni Secretary Ona a ti uyek wenno ti panagsakit ti karabukob ti kangrunaan a pagilasinan iti flu wenno influenza, maysa a sakit a gapu iti bayrus (viral illness) a nalaka nga agwaras babaen ti panagbaeng, panaguyek ken uray pay iti pannakisarsarita ti addaan iti trangkaso iti sabali a tao.

Mabalin pay a mayakar ti nasao a sakit maysa nga aldaw sakbay pay nga agparang dagiti pagilasinan ti nasao a sakit iti maysa a tao.

“Saan koma a barengbarengen ti trangkaso ta mabalin nga ipatay ti tao daytoy,” kinuna ni Ona idinto a kinuna a dagiti maladaga, masikog, senior citizen ken dagiti agsagsabaga iti sakit iti puso, kidney ken bara, ti nalaka a maakaran iti daytoy a sakit a mabalin pay nga agtinnag iti pneumonia.

Tapno malapdan ti pannakaiwaras ti sakit, kinuna ni Ona nga asino man nga agtrangkaso, nasken nga agtalinaed iti balayda ken aginana agingga iti maawan dagiti pagilasinan iti kaadda ti sakitna.

Nasken met nga agtalinaed koma a managdaldalus daytoy kas iti regular a panagbuggona, panangapputna iti ngiwat ken agongna no agbaeng wenno aguyek, ken panangliklikna iti pannakilangenna iti sabsabali.

Imbalakad pay ni Onia kadagiti senior citizen ti pananggundawayda iti flu vaccination program dagiti health center ti gobierno.

(Naipablaak iti Bannawag, Enero 28, 2013 a bilang.)

DoH, namallaag kontra sakit iti panagtutudo

Gapu iti ilalas-uden kadagiti bulan a matutudo, namalaag ti Departamento ti Salun-at (DoH) kadagiti umili nga agannad kadagiti sakit a mabalin a maalada iti tiempo ti tudtudo.

Partikular a binallaagan ti DoH dagiti nagannak a siguraduenda koma a natalged dagiti annak kontra kadagiti sakit a maala iti panawen ti panagtutudo, nangruna ket sumsumrek dagitoy iti eskuelaan.

Segun ken ni DoH Secretary Enrique Ona, masansan a dagiti sakit a maala iti tiempo ti tudtudo ket uyek, panateng, trangkaso, ken leptospirosis.

Namallaag met ti Sekretario nga agannad iti dengue fever a masansan met a mangbiktima iti panawen ti panagtutudo.

Balakad ni Ona a no madin ti marikrikna ti ubing, ken addaan makita a simtoma ti uyek ken panateng, dagus koman nga ikkan iti agas, ket saanen a pastreken iti eskuelaan.

Nasayaat met no agaruat kadagiti long sleeves ken leggings dagiti ubbing tapno saan a makagat iti lamok.

Innayon pay ni Ona a siguraduen koma dagiti nagannak nga adda balon dagiti ubbing a kapote ken payong a mausarda a proteksion iti tudo.

Bannawag, Hunio 27, 2011, panid 38.