4 a probinsia, 3 a siudad, 4 nga ili iti NL, “top performers”

Uppat a probinsia, tallo a siudad ken uppat nga ili iti Amianan ti innaganan itay nabiit ti Department of Interior and Local Government (DILG) a kas consistent top performing local government units (LGUs).

Karaman dagiti naagapad a probinsia kadagiti 10 a probinsia, ken karaman met dagiti siudad ken ili kadagiti 13 a siudad ken ili iti sibubukel a pagilian a nakagun-od kadagiti kangatuan nga iskor manipud pay idi 2009 agingga iti 2011 iti tinawen a Local Government Performance Management System (LGPMS) ti departamento.

Matingiting ti gapuanan dagitoy a gobierno lokal iti ranggoda manipud iti 1 (kababaan) agingga iti 5 (kangatuan). Maibasar ti gapuanan dagiti LGUs kadagitoy a tay-ak: administration, social governance, economic governance, ken dagiti panuli ti napintas a panangituray.

Dagiti probinsia iti Amianan a napadayawan: La Union (4.89), Pangasinan (4.87), Mountain Province (4.855), ken Ilocos Norte (4.828).

Dagiti siudad (component cities): Laoag (4.99), Vigan (4.921), San Fernando, La Union (4.81).

Dagiti ili: Ilagan, Isabela (4.92), Santol, La Union (4.89), San Mateo, Isabela (4.879), ken San Gabriel, La Union (4.820).

(Naipablaak iti Bannawag, Oktubre 1, 2012 a bilang.)

13 LGUs, dinayaw ti DILG

Karaman ti La Union, Ilocos Norte, Laoag City, Vigan City, Ilagan (Isabela)

Dinayaw ti Department of Interior and Local Government (DILG) ti 13 a local government units (probinsia, siudad ken munisipio) iti pagilian gapu iti agtultuloy a panagbalinda a top-performers, segun iti local government state of performance report iti napalabas a tallo a tawen.

Adtoy LGUs a napadayawan: dagiti probinsia ti La Union, Cavite, Albay ken Ilocos Norte; dagiti siudad ti Valenzuela, Makati, Angeles, Taguig, Davao, Laoag, Vigan, ken Cabanatuan; ken ti munisipio ti Ilagan iti Isabela.

Kuna ni DILG Secretary Jesse M. Robredo a dayawenna dagitoy nga LGUs gapu iti kinapingetda a mangitag-ay ken mangmantenir iti nangato a kalidad ti panangipaay kadagiti serbisio kadagiti naagapad a lokalidad.

(Naipablaak iti Bannawag, Agosto 27, 2012 a bilang.)

7 a polis iti Tanap, naital-o iti takem gapu iti kinaturedda

Pito a polis iti Cagayan Valley ti inaprobaran ti National Police Commission (NAPOLCOM) ti pannakaital-oda iti takem gapu iti “naisangsangayan a kinatured ken kinamaingel nga impamatmatda iti laksid ti panangipustada iti biagda ken iti labes ti sinapataanda a pagrebbengan.”

Mismo a ni Dept. of Interior and Local Government (DILG) Secretary ken NAPOLCOM Chairman Jesse Robredo ti nangipakaammo iti nasao a pannakaital-o dagiti pito a polis a kameng ti 2^nd Regional Public Safety Battalion and Regional Intelligence Division, Police Regional Office 2 iti Cagayan Valley.

Dagiti naital-o a polis: P/Insp. Rocky Balisi, SPO3 Marino Manuel, SPO1 Andres Yñigo, PO3 Bernardo Pescador, PO2 Domingo Callueng, PO2 Roy Ilano ken PO2 Charles Urmanita.

Kinuna ni NAPOLCOM Vice-Chairman ken Executive Officer Eduardo U. Escueta a ti nasao a grupo ti responsible iti pannakaraut ti grupo ni communist leader Jose Asko a nakapasamakan ti nadara a ranget idi Mayo 12, 2011 iti Brgy. Sto. Domingo, Piat, Cagayan a nangibunga iti pannakapatay ti lima, pannakasugat ti tallo ken pannakakemmeg ti awan sugatna a maysa a babai a kameng ti grupo ni Asko ken pannakasamsam dagiti nagduduma ti kalibrena a paltog, bala ken magasin, handheld radios, cellular phones, flash drives ken kuarta nga agdagup iti Php 98,940.25.

(Naipablaak iti Bannawag, Agosto 20, 2012 a bilang.)

Bulan ti Lengguahe, nakiddaw a rambakan dagiti amin nga LGUs

Kiniddaw ti Department of Interior and Local Government (DILG) kadagiti amin a local government units (LGUs) ti panangpaliiwda iti Buwan ng Wikang Pambansa ti pagilian iti daytoy umay nga Agosto a kas pangitandudo iti panangipateg iti pagilian ken iti nabaknang a pakasaritaanna.

Ti tema ti pannakalagip ti Buwan ng Wikang Pambansa ita tawen: “Tatag ng Wikang Filipino, Lakas ng Pagka Pilipino.” Idauluan ti Komisyon sa Wikang Filipino (KWF) ti selebrasion nga agpanggep a mangpapigsa iti lengguahe a Filipino tapno ad-adda pay a sumiken ti langenlangen dagiti umili a Filipino.

Para iti Agosto 1 agingga iti 7, maisentro ti parambak iti “Pitumpu’t Limang Taon sa Pagsusulong ng Wikang Filipino sa Edukasyong Filipino”; para iti Agosto 8 agingga iti 14, “Filipino at Iba Pang mga Wika sa Pilipinas: Lakas ng K to 12 at Mother Tongue Based-Multilingual Education (MTB-MLE)”; para iti Agosto 15-21, “Wikang Filipino at Iba Pang Wika sa Rehiyon: Wika ng Bayan sa Kapayapaan”’ para iti Agosto 22-28, “Wikang Filipino, Wikang Panlahat para sa Matatag na Lipunang Filipino”; ken para iti Agosto 29-31, “Wika ay Kakambal ng Kapayapaan sa Pagtahak sa Tuwid na Daan.”

(Naipablaak iti Bannawag, Agosto 6, 2012 a bilang.)

4 a siudad, 46 nga ili iti R-I naipaayan iti P58-M a pundo

Di nakurkurang ngem P58-milion ti pategna a Performance Challenge Fund (PCF) ti naited iti uppat a siudad ken 46 nga ili iti Kailokuan babaen ken ni Secretary of Interior and Local Government Jesse M. Robredo.

Ti pannakayawat ti pundo ti maysa kadagiti tampok ti “Tapatan on Disaster Preparedness and Climate Change Adaptation” nga inwayat ti DILG-Region I iti San Fernando City (La Union) itay nabiit.

Maibatay ken ni DILG Regional Director Corazon P. Guray, maikatlo a tawen itan a maipakpakat ti PCF. Maysa ti PCF a kas insentibo pinansial a para kadagiti LGUs a naipaayan iti Seal of Good Housekeeping (SGH) wenno napintas ti pannakapataray ti gobierno lokalda iti kasta, adda usarenda a pangpasayaat kadagiti programada iti turismo, local economic development, pannakakissay dagiti mapaspasamak a didigra gapu iti pungtot ti nakaparsuaan, ken iti umno a pannakaibelleng dagiti basura.

Dagiti uppat a siudad a naipaayan iti P3-milion a pundo: Laoag ken Batac iti Ilocos Norte, ken Urdaneta ken San Carlos iti Pangasinan.

Naipaayan met iti sag-P1-milion a pundo ti 6 nga ili iti Ilocos Norte, 10 iti Ilocos Sur, 6 iti La Union, ken 24 iti Pangasinan.

(Naipablaak iti Bannawag, Hulio 23, 2012 a bilang.)4 a siudad, 46 nga ili iti R-I naipaayan iti P58-M a pundo

Di nakurkurang ngem P58-milion ti pategna a Performance Challenge Fund (PCF) ti naited iti uppat a siudad ken 46 nga ili iti Kailokuan babaen ken ni Secretary of Interior and Local Government Jesse M. Robredo.

Ti pannakayawat ti pundo ti maysa kadagiti tampok ti “Tapatan on Disaster Preparedness and Climate Change Adaptation” nga inwayat ti DILG-Region I iti San Fernando City (La Union) itay nabiit.

Maibatay ken ni DILG Regional Director Corazon P. Guray, maikatlo a tawen itan a maipakpakat ti PCF. Maysa ti PCF a kas insentibo pinansial a para kadagiti LGUs a naipaayan iti Seal of Good Housekeeping (SGH) wenno napintas ti pannakapataray ti gobierno lokalda iti kasta, adda usarenda a pangpasayaat kadagiti programada iti turismo, local economic development, pannakakissay dagiti mapaspasamak a didigra gapu iti pungtot ti nakaparsuaan, ken iti umno a pannakaibelleng dagiti basura.

Dagiti uppat a siudad a naipaayan iti P3-milion a pundo: Laoag ken Batac iti Ilocos Norte, ken Urdaneta ken San Carlos iti Pangasinan.

Naipaayan met iti sag-P1-milion a pundo ti 6 nga ili iti Ilocos Norte, 10 iti Ilocos Sur, 6 iti La Union, ken 24 iti Pangasinan.

(Naipablaak iti Bannawag, Hulio 23, 2012 a bilang.)

Pannakabangon dagiti central fire station, naibilin

Nangipaulog ti Department of the Interior and Local Government (DILG) iti direktiba para iti liderato ti Bureau of Fire Protection (BFP) a mangibilbilin iti pannakaipasdek ti Central Fire Station (BFP-CFS) iti amin a lokalidad iti sibubukel a pagilian nangruna kadagiti ili nga awanan iti fire station.

Segun ken ni DILG Secretary Jesse Robredo, naipalaon iti direktiba ti pagalagadan a ti BFP-Central Fire Station (CFS) ti agserbi a sentro ti nagkaykaysa a sistema iti panagresponde kadagiti insidente ti uram ken sabsabali pay a kapadana nga insidente nga asideg iti munisipalidad nga awanan iti fire station.

Daytoy nga addang ni Robredo ti sungbat iti panagkurkurang dagiti fire station kadagiti 654 a local government unit iti sibubukel a pagilian ken 666 a sabsabali pay nga awanan iti fire truck.

Segun ken ni Robredo, iti pannakitinnulong ti District/Provincial Fire Marshal, masapul a maaddaan ti BFP Regional Director iti Central Fire Station nga asideg kadagiti munisipalidad nga awanan iti fire station segun iti kinaasideg ken kinalakana a madanon.

Kuna ni Robredo a ti kaasitgan a city/municipal fire station a nalaka a makadanon kadagitoy a munisipalidad ti maibilang a Central Fire Station, ket ti City/Municipal Fire Marshal (C/MFM) dayta a fire station ti agbalin a concurrent fire marshal.

Ti Central Fire Marshal ti makiuman iti nakatakem a Fire Prevention Officer ti munisipalidad nga awanan iti fire station para iti pannakaadal dagiti plano para iti insidente ti uram ken pannakaorganisar ti fire brigade.

Bannawag, Hulio 4, 2011, panid 38.