ONTARIO, CANADA. Kalpasan ti misa, pagaaduan dagiti kakailian dagiti lako a nateng ni Manong Jimmy de Lara (nakarukob ken nakakipis), dati a taga-Laoag ngem agnaeden iti Scarborough, Ontario, Canada. Agduduma a nateng a nakairuaman ni Ilokano dagiti ilaklakona iti puestona iti sirok ti kayo a maple iti kada Domingo iti asideg ti simbaan ti St. Paschal Baylon iti Steeles Ave West, Thornhill. Adda tabungaw, sili, tarong, bunga ken bulong ti paria, utong, uong, bulong ti marunggay, saluyot, ken balangeg. Mangrugi ti panaglakolakona (ken sumagmamano a kakaduana nga Ilokano met laeng) iti arinunos ti spring agingga iti rugi ti winter. Bukodna a mula ken dagiti dadduma, gatgatangenna kadagiti adda mulana iti Scarborough met laeng idinto ta aggapu met iti Hawaii dagiti bulong ti marunggay. (JOHMAR R. ALVAREZ)
(Naipablaak iti Septiembre 1-15, 2019. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment