Ginutigot ni Philippine Commission on Women (PCW) Commissioner Sandy Montano itay nabiit dagiti dadaulo dagiti LGU a mangparnuay iti ad-adu pay pagsapulan kadagiti masakupan dagitoy tapno materred ti panagtrabaho dagiti umili nangruna dagiti babbai iti ballasiw-taaw.
Kinuna ni Montano a saan koma a narigat no adu a Filipino a mapmapan agtrabaho iti ballasiw-taaw ti skilled workers. Ngem ti adatna, kaaduanna met a babbai ti mapan agtrabaho a kas domestic helpers, maysa a trabaho a napno iti peggad.
Innayonna a pudno a dakdakkel ti masapulan dagitoy a babbai iti sabali a pagilian no maidilig iti ganarenda iti pagilian ngem maisakripisio met ti salun-at, kinatalged, ken uray ti pamiliada.
Kinuna ni Montano a malaksid nga agpeggad dagiti DH iti posible a pannakaabusoda, mapukawan pay dagiti annak dagitoy iti umisu a pannarabay ti maysa nga ina.
Kinuna pay ni Montano nga agtultuloy met ti gannuat ti PCW a mangikabassit iti bilang dagiti babbai a mapan agtrabaho a kas DH iti sabali a pagilian babaen ti panangipaayda kadagiti wagas tapno makaganar dagitoy a kas iti pannakaipasdek dagiti Go Negosyo Centers iti rehion.
Maibatay pay ken ni Montano, agtinnulong ti PCW ken ti Department of Trade and Industry a mangipaay iti pagsapulan ken panagsanay ken kapadana kadagiti umili nangruna kadagiti babbai. Wagas daytoy a pangipasimudaagda a saan laeng a ti panagbalin nga OFW wenno DH ti mangsolbar kadagiti parikut gapu iti kinakurapay.
Iti sabali a bangir, kinuna ni Montano a manamnama a yalnag iti mabiit ti PCW ti Aruga Center a para kadagiti babbai ken ubbing.
(Naipablaak iti Oktubre 1-15, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment