Kuna ti gobierno: Ad-adu a produkto, saan a bassit a taripa ti mangibaba iti presio

Kuna ti Committee on Tariff and Related Matters itay nabiit a bassit laeng ti epektona ti ingingina dagiti magatgatang ti panangikabassit iti buis wenno taripa dagiti maangkat a karne, ikan, nateng ken dadduma pay a magatgatang.

Iti biang ni DTI Sec. Ramon Lopez, irekomendarna ketdi dagiti wagas a mangpaadu iti suplay wenno produkto nga ad-adda a marikna ti madagdagus nga epekto dagitoy.

Segun ken ni Lopez, kalpasan ti pannakiumanda kadagiti nadumaduma a maseknan kasta met iti agdama a kasasaad ti taripa, bassit laeng ti epektona no maibaba iti 5 porsiento ti taripa wenno buis dagiti maangkat a produkto. Ngarud, saan a solusion daytoy ti parikut iti ingingina dagiti magatgatang.

Kinuna ni Lopez a masapul a maiturong dagiti panagipamuspusan kadagiti praktikal a solusion tapno maibaba dagiti presio bayat ti pannakabalanse ti pagimbagan nga agpadpada dagiti konsiumer ken dagiti prodiuser.

Maipalagip nga inrekomendar ni Diputado ti Albay Joey Salceda nga awan koma ti buis dagiti maangkat a kangrunaan a magatgatang. Ni Dip. Salceda ti matalek ni Speaker Gloria Macapagal-Arroyo iti Kamara mainaig iti pananglaban iti ingingina dagiti magatgatang.

Sakbayna, iti pannakimiting ni Dip. Arroyo kadagiti kameng ti economic team iti Kamara, ginutigotna ni Presidente Rodrigo Duterte a mangaramid iti pamuspusan tapno matellay ti ingingina dagiti magatgatang.

Mainaig itoy, segun iti pakaammo ti DTI, nangipaulogen ti Department of Agriculture iti “certificate of necessity” a mangipalubos ti pannakaangkat ti agingga iti 17,000 tonelada a galunggong.

Kinuna ni Agriculture Sec. Emmanuel Piñol a kinalikagumanna ti pannakaamendar dagiti regulasion iti fisheries tapno mapalubosan ti pannakailako dagitoy maangkat nga ikan kadagiti tiendaan.

Binilin pay ni Piñol dagiti addaan kadagiti sertipiko ti panagangkat iti karne nga angkatenda ti maipalubos nga alokasionda. Naireport ngamin a kagudua laeng ti maipalubos nga alokasionda ti maang-angkat.


(Naipablaak iti Septiembre 3, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)