Ad-adda pay nga agsuek ti pisos?

No awan ti aramiden ti gobierno a pamuspusan, ad-adda pay nga agsuek ti balor ti pisos wenno ad-adda pay a ngumina dagiti magatgatang.

Kinuna ni Diputado ti Albay Joey Salceda a mabalin a magteng ti 6 porsiento nga implasion manipud iti 5.7 porsiento iti Hulio ken 5.2 porsiento iti Hunio. Kayatna a sawen ti 6 porsiento nga implasion, ti maysa a balay a gumangganar iti 5,000, agbalin laengen a kasla 4,700 daytoy gapu iti ingingina dagiti magatgatang.

Innayon ni Salceda nga agtultuloy ti ingingina dagiti magatgatang manipud iti Enero a panangipataw ti gobierno iti baro ken nangatngato a buis iti babaen ti kontrobersial a Tax Reform for Acceleration and Inclusion (TRAIN) law.

Daytoy met ti gapuna nga insingasing ni Speaker Gloria Macapagal-Arroyo itay nabiit a mangipaulogda iti linteg a mangikabassit iti taripa wenno buis dagiti maangkat a produkto tapno magutigot dagiti pribado a sektor nga agipastrek iti suplay.


(Naipablaak iti Bannawag iti Agosto 27, 2018 a bilang. Magatang ti pisikal a kopia kadagiti bookstore ken newsstand iti Kailokuan ken iti intero a pagilian ken ballasiw-taaw. Mabalin met nga i-download ti digital a kopia iti BUQO, MAGZTER ken PRESS READER.)